26/01/2026
පොල් ගසේ කරටිය හීන් වෙලාද..?, කොළ විකෘති වෙලාද..? මෙහෙම වෙන බොහෝ අවස්ථාවල රෝගයක්ම නෙවෙයි...බෝරෝන් ඌනතාවක්ද විය හැක.
📌බෝරෝන් යනු පොල් ගසට අවශ්‍ය ක්ෂුද්‍ර පෝෂක ද්‍රව්‍යයක් වන අතර පත්‍ර නිසි ලෙස විවෘත වීම, මල් හා පොල් ගෙඩි නිසි වර්ධනය වීම ආදිය සදහා ප්‍රධානවම බලපායි.
📌පොල් වල බෝරෝන් ඌනතාව ඇතිවෙන්නේ ඇයි?
දිගු කාලයක් එකම NPK පොහොර පමණක් යෙදීම, වැලි සහිත පස, අධික වර්ෂාව නිසා පසෙන් සේදී යාම, පසෙහි pH අගය වැඩිවීම (ක්ෂාරීය පස), කාබනික ද්‍රව්‍ය අඩුවීම, වියළි කාලය දිගු වීමෙන් බෝරෝන් අවශෝෂණය කල නොහැකිවීම.
📌බෝරෝන් ඌනතාවයේ ලක්ෂණ
(මෙය බොහෝ විට රෝගයක් ලෙස වරදවා හඳුනාගනී)
▪️කොළ හීන්, කෙටි, වක්‍ර වීම
▪️කරටිය සම්පූර්ණයෙන් විවෘත නොවීම.
▪️කොළ රැලිවීම / කඩාවැටීම
▪️කොළ අග කළු පැහැයට / වියළි ස්වභාවයට පත්වීම
▪️ඇට්ටි ගොඩක් පොකුරු ලෙස සෑදීම
▪️පත්‍ර කෙලවර කොකු ආකාරයට සෑදීම
▪️ගස උසට නොවැඩීම
▪️කඳ සිහින් වීම
▪️මුළු ගසම කුඩා දුර්වල පෙනුම
▪️මල් වැටීම හා ඵලදාව අඩුවීම
▪️ගෙඩි විකෘති ආකාරයට හැදීම
📌 බෝරෝන් ඌනතාව දිගුකාලීන වුවහොත්, ගස මැරෙන තත්ත්වයටත් පත්විය හැක.
👉පයිටොප්ලාස්මා රෝගය නිසාද මෙම ලක්ශණ පෙන්විය හැක. පොහොර යෙදීමෙන් ගස සුව වෙයි නම් බෝරෝන් ඌනතාව වේ.
📌බෝරෝන් ඌනතාවට ප්‍රතිකාර කිරීම.
▪️බොරැක්ස් කුඩු හෝ බෝරික් ඇසිඩ් යොදාගැනේ. පසට යෙදීමේදී වැඩුණු පොල් ගසක් සඳහා බොරැක්ස් 25–30 g / ගසකට / වසරකට වරක් දැමීම. කොම්පෝස්ට් හෝ වැලි සමඟ මිශ්‍ර කර ගස වටා අඩි 3–4 රවුමක් ලෙස යෙදිය යුතුය
⚠️ අධික ප්‍රමාණයෙන් දාන්න එපා..බෝරෝන් විෂ විය හැක.
👉දැඩි ඌනතාවයක් සහිත ගහක් නම් දියර පොහොරක් ලෙස පත්‍ර වලට ස්ප්‍රේ කරන්න. ඉක්මනින් ප්‍රතිචාර ලබාගත හැක.
▪️බොරැක්ස් 5 g ක් වතුර ලීටර් 10 ක් සමග මිශ්‍රකර මාස 2–3 කට වරක් උදේ හෝ සවස ස්ප්‍රේකරන්න.
