11/03/2025
"ආත්ම ගරුත්වය, විවිධත්වය සහ යහපත් පොලිස් සේවයක්"
LGBTIQ+ ප්රජාව සමග සම්බන්ධ වීමේදී ඔවුන්ගේ අයිතිවාසිකමක් ආරක්ෂා වන ආකාරයට පොලිස් නිලධාරීන් කටයුතු කරන්නේ කෙසේද?
මේ 2023 වර්ෂයේ සිට ශ්රී ලංකා පොලීසිය සමග එක්ව Equite ආයතනය සිදුකරන පුහුණුකරුවන් ලෙස පොලිස් නිලධාරීන්ව පුහුණු කිරීමේ වැඩසටහනේ දෙවෙනි අදියරේ සමාරම්භක අවස්ථාවයි.
2022 වර්ෂයේදී, ශ්රේෂ්ඨාධිකරණයේ නිර්දේශයක් මත එවකට පොලිස්පතිතුමා විසින් LGBTIQ+ ප්රජාව සමග සම්බන්ධ වීමේදී පොලිස් නිලධාරීන් අනුගමනය කළ යුතු ක්රියාමාර්ග සම්බන්ධයෙන් චක්රලේඛයක් නිකුත් කරනු ලැබීය. එමෙන්ම නීතිපතිවරයා විසින් පොලිස්පති වරයාට නිර්දේශ කර තිබුණේ LGBTIQ+ ප්රජාවගේ මානව හිමිකම් ආරක්ෂා කිරීම, සමානව සැලකීම සහ යහපත් පොලිස් සේවයක් පවත්වාගැනීම සම්බන්ධයෙන් පොලිස් නිලධාරීන් දැනුවත් කරන ලෙසයි.
ඒ අනුව, එවකට පොලිස්පති සී.ඩී.වික්රමරත්න මහතාගේ ඉල්ලීමක් පරිදි, නෙදර්ලන්ත තානාපති කාර්යාලයේ සම්බන්ධීකරණය, COC Netherlands ආයතනයේ විශේෂඥ සහාය මත ජාතික පොලිස් අභ්යාස ආයතනය මගින් Equite ආයතනය මෙම පුහුණු වැඩසටහන සඳහා සම්බන්ධ කරගන්නා ලදී.
මේ හා සමානව රාජ්ය සේවකයින් පුහුණු කරනු ලැබීමෙන් Equite ආයතනය සපුරා ඇති දේශීය හා ජාත්යන්තර සුදුසුකම් මත, 2023 වර්ෂයේ සිට මෙම පුහුණු පාඨමාලාව පවත්වාගෙන යනු ලැබේ.
නෙදර්ලන්ත තානාපති ගරු.බොනී හොබාර්ක් මහත්මිය, ශ්රී ලංකාවේ වැඩබලන පොලිස්පති නීතිඥ ප්රියන්ත වීරසූරිය, පොලිස් පුහුණු හා උසස් පුහුණු අංශ ප්රධානී ජ්යෙෂ්ඨ නියෝජ්ය පොලිස්පති සජිව මැදවත්ත, පොලිස් කාන්තා හා ළමා අපයෝජන නිවාරණ අංශ ප්රධානී නියෝජ්ය පොලිස්පති රේණුකා ජයසුන්දර, ජාතික පොලිස් අභ්යාස ආයතනයේ විධායක අධ්යක්ෂ ,නියෝජ්ය පොලිස්පති,නීතිඥ ජාලිය සේනාරත්න ඇතුළු උසස් පොලිස් නිලධාරීන් සහ Equite ආයතනයේ සභාපති තුෂාර මනෝජ්, විධායක අධ්යක්ෂ ආදිල් සුරාජ් ඇතුළු නිලධාරී මණ්ඩලය මෙම උත්සවයට සහභාගී විය.
මෙය ශ්රී ලංකාවේ LGBTIQ+ ප්රජා අයිතිවාසිකම් දිනාගැනීමේ ඉතිහාසයේ විශේෂ සංධිස්තානයක් ලෙස සැලකිය හැකිය.
