A - Sanin TV

04/06/2026

තද සුළං සහ රළු මුහුදු ප්‍රදේශ පිළිබඳව අවවාදාත්මක නිවේදනයක් කාලගුණ විද්‍යා දෙපාර්තමේන්තුව විසින් නිකුත් කර තිබේ.

මුලතිව් සිට කන්කසන්තුරය, මන්නාරම, පුත්තලම, කොළඹ, ගාල්ල සහ, හම්බන්තොට හරහා පොතුවිල් දක්වා වෙරළට ඔබ්බෙන් වන මුහුදු ප්‍රදේශ වලට සුළගේ වේගය විටින් විට පැයට කිලෝමීටර් 50-60 දක්වා වැඩි වන අතර එම මුහුදු ප්‍රදේශ විටින් විට රළු වනු ඇති බවයි අදාළ නිවේදනයේ දක්වා ඇත්තේ.

මන්නාරම සිට කොළඹ, ගාල්ල සහ හම්බන්තොට හරහා පොතුවිල් දක්වා වෙරළට ඔබ්බෙන් වන මුහුදු ප්‍රදේශවල මුහුදු රළ උස මීටර් 2 - 3 ක් පමණ ඉහළ යාමේ හැකියාවක් පවතින බවද එහි සඳහන්.

ධීවර සහ නාවික ප්‍රජාවට අවධානයෙන් කටයුතු කරන ලෙසට එහි දක්වා තිඛෙන අතර, මෙම අනතුරු ඇඟවීමේ නිවේදනය අද (04) පෙරවරු 10.30 සිට හෙට (05) පෙරවරු 10.30 දක්වා වලංගු වන බවයි වැඩිදුරටත් වාර්තා වන්නේ.
#සැණින් #එසැණින්

04/06/2026

හිටපු ජනාධිපති මහින්ද රාජප්පක්ෂගේ පුත් යෝෂිතරාප්පක්ෂට එරෙහිව මුදල් විශුද්ධිකරණය වැළැක්වීමේ පනත යටතේ ගොනු කර තිබෙන නඩුව යලිත් ජුලි මස 09 වැනිදා දක්වා කල් තැබීමට කොළඹ මහාධිකරණය නියම කර තිබේ.

මෙම නඩුව අද (04) කොළඹ මහාධිකරණ විනිසුරු උදේශ් රණතුංග ඉදිරියේ කැඳවනු ලැබුණු අතර, එහිදී නියෝජ්‍ය සොලිසිටර් ජෙනරාල් ජනක බණ්ඩාර අධිකරණයට දන්වා සිටියේ මෙම නඩුවේ විත්තිකරු විසින් ඉදිරිපත් කළ ප්‍රතිශෝධන පෙත්සමක් ඊයේ (03) අභියාචනාධිකරණය හමුවේ කැඳවනු ලැබූ අවස්ථාවේදී එය ජුනි මස 16 වැනිදා විභාගයට ගැනීමට අභියාචනාධිකරණය තීන්දු කළ බවයි.

එදින තෙක් මෙම නඩුවේ සාක්ෂි මෙහෙයවීම නොකරන බවට පැමිණිල්ල විසින් අභියාවනාධිකරණයට දැනුම් දී ඇති බවත්, ඒ අනුව මෙම නඩුවේ සාක්ෂි කැඳවීමකින් තොරව නඩුව කල් තබන ලෙසත් ඔහු අධිකරණයෙන් ඉල්ලීමක් කළා.

ඒ අනුව, අභියාවනාධිකරණයේ තීරණය ලැබෙන තෙක් මෙම නඩුව ජූලි මස 09 වැනිදා දක්වා කල් තැබීමට නියම කළ මහාධිකරණ විනිසුරුවරයා සාක්ෂිකරුවන්ට එදින අධිකරණය හමුවේ පෙනී සිටින ලෙසත් නියම කරනු ලැබුවා.

රුපියල් ලක්ෂ 730 කට අධික වටිනාකමකින් යුත් ඉඩම් කට්ටි පහක් අයථා ලෙස අත්පත් කර ගැනීම තුළින්, මුදල් විශුද්ධිකරණය වැළැක්වීමේ පනත යටතේ වරදක් සිදු කළ බවට චෝදනා කරමින්, නීතිපතිවරයා විසින් යෝෂිත රාජප්පක්ෂට විරුද්ධව මෙම නඩුව ගොනු කර ඇති බවයි වැඩිදුරටත් සඳහන් වන්නේ.
#සැණින් #එසැණින්

04/06/2026

ශ්‍රී ලංකා විභාග දෙපාර්තමේන්තුව මගින් පවත්වනු ලබන විභාග සඳහා අයදුම් කිරීමේදී ජාතික හැඳුනුම්පත් අංකය ඇතුලත් කිරීම අනිවාර්යය කර ඇති බව එම දෙපාර්තමේන්තුව පවසයි.

ඒ අනුව, 2026 දෙසැම්බර් මාසයේදී පැවැත්වීමට නියමිත 2026 අ.පො.ස සාමාන්‍ය පෙළ විභාගය සඳහා ඉල්ලුම් කිරීමට අපේක්ෂිත අයදුම්කරුවන් සඳහා ජාතික හැඳුනුම්පත් සකස් කර ගැනීමට උපදෙස් ලබාදෙන ලෙසට සියලුම විදුහල්පතිවරුන් වෙත මේ වන විටත් දැනුම් දී ඇති බවයි විභාග දෙපාර්තමේන්තුව සඳහන් කර සිටින්නේ.

2026 අ.පො.ස සාමාන්‍ය පෙළ විභාගය සඳහා අයදුම්පත් කැඳවීම ආරම්භ වීමට පෙර, තම ජාතික හැඳුනුම්පත සකස් කර ගැනීම සියලුම පාසල් සහ පෞද්ගලික අයදුම්කරුවන්ගේ වගකීමක් බවයි ශ්‍රී ලංකා විභාග දෙපාර්තමේන්තුව නිවේදනය කරන්නේ.
#සැණින් #එසැණින්

04/06/2026

සුවසැරිය 1990 හදිසි ගිලන්රථ සේවාව අක්‍රිය කර ඇති බවට පලවන සමාජ මාධ්‍ය වාර්තා සම්පූර්ණයෙන්ම ප්‍රතික්ෂේප කරන බව එම සේවාවේ කළමනාකාරිත්වය විසින් නිවේදනයක් නිකුත් කර තිබේ.

සුවසැරිය 1990 හදිසි ගිලන්රථ සේවාව දිවයින පුරා මෙහෙයුම් අඛණ්ඩව සිදුකරන බවත්, මෙසේ සංසරණය වන පළ කිරීමේ සම්පූර්ණයෙන්ම අසත්‍ය සහ මහජනතාව නොමඟ යවන සුළු බවයි එම සේවාවේ සභාපතිවරයා ඇතුළු අධ්‍යක්ෂ මණ්ඩලය එම නිවේදනය මගින් සඳහන් කර ඇත්තේ.

සුවසැරීය සේවාව දිවයින පුරා සම්පූර්ණයෙන්ම ක්‍රියාත්මක වන බවත්, වැඩිදියුණු කළ කාර්යක්ෂමතාවයකින් යුතුව සුපුරුදු ආකාරයෙන් සේවාවන් සපයන බවත් ඔවුන් අවධාරණය කර සිටිනවා.
#සැණින් #එසැණින් #සුවසැරිය

04/06/2026

අඟුරුවාතොට, බටගොඩ ප්‍රදේශයේ වැඩිහිටි රැඳවුම් මධ්‍යස්ථානයක හටගත් ගින්නෙන් පුද්ගලයන් 11 දෙනෙකු මිය ගොස්, තවත් තිදෙනෙකු අතුරුදන්ව ඇති බව පොලිසිය පවසයි.

එම ගින්නෙන් තුවාල ලැබූ 07 දෙනෙකු මේ වන විට හොරණ දිස්ත‍්‍රික් රෝහලේ ප්‍රතිකාර ලබන බවද පොලිසිය සඳහන් කර සිටියා.

එමෙන්ම එම මධ්‍යස්ථානයේ සිටි පුද්ගලයන් 51 දෙනෙකු පමණ නිරුපද්‍රිත ව බේරාගෙන ඇති අතර, මේ වන විට ඔවුන් ආරක්ෂිත ස්ථානයක් වෙත යොමු කර ඇති බවයි වාර්තා වන්නේ.

අඟුරුවාතොට, බටගොඩ ප්‍රදේශයේ පිහිටි 'මව්පිය සෙවන සෙනෙහසේ කැදැල්ල' වැඩිහිටි රැඳවුම් මධ්‍යස්ථානයේ ඊයේ (03) පස්වරුවේ හදිසි ගින්නක් හටගත්තා.

ගිනි නිවීමේ භටයන් සහ ප්‍රදේශවාසීන්ගේ සහාය ඇතිව ගින්න මැඩ පැවැත්වීමට කටයුතු කර ඇති අතර, ගින්නෙන් එම මධ්‍යස්ථානයට විශාල ලෙස හානි සිදුවී ඇති බවයි සඳහන් වන්නේ.

ගින්න ඇති වන අවස්ථාවේ අදාළ මධ්‍යස්ථානය තුළ පුද්ගලයන් 72 දෙනෙකු පමණ සිට ඇති අතර, පෞද්ගලික ආයතනයක් ලෙස පවත්වා ගෙන ගොස් ඇති එම මධ්‍යස්ථානය තුළ මානසික ආබාධ සහිත පුද්ගලයන් ද සිට ඇති බවයි වැඩිදුරටත් වාර්තා වන්නේ.
#සැණින් #එසැණින් #සෙනෙහසේකැඳැල්ල

04/06/2026

කුවේට් ජාත්‍යන්තර ගුවන් තොටුපොළට එල්ලවූ ප්‍රහාරයෙන් තුවාල ලැබූ පිරිස අතර ශ්‍රී ලාංකිකයින් තිදෙනෙක්.
- කුවේට්හි ශ්‍රී ලංකා තානාපති කාර්යාලය -
#සැණින් #එසැණින්

04/06/2026

අඟූරුවාතොට වැඩිහිටි නිවාසයේ ඇති වූ ගින්න සම්බන්ධයෙන් ස්ථානීය පරීක්ෂණ අද (04)
#සැණින් #එසැණින්

04/06/2026

අද (04) කාලගුණ අනාවැකිය ✍️

බස්නාහිර, සබරගමුව සහ වයඹ පළාත්වලත්, ගාල්ල, මාතර, මහනුවර සහ නුවරඑළිය දිස්ත්‍රික්කවලත් විටින් විට වැසි හෝ ගිගුරුම් සහිත වැසි ඇති වන බව කාලගුණ විද්‍යා දෙපාර්තමේන්තුව පවසයි.

බස්නාහිර සහ සබරගමුව පළාත්වලත්, ගාල්ල, මාතර, මහනුවර සහ නුවරඑළිය දිස්ත‍්‍රික්කවලත් ඇතැම් ස්ථානවලට මි.මී 100 ක පමණ තද වැසි ඇති විය හැකි බවයි සඳහන් වෙන්නේ.

මධ්‍යම කඳුකරයේ බටහිර බෑවුම් ප්‍රදේශවලත්, උතුරු සහ උතුරු-මැද පළාත්වලත්, හම්බන්තොට සහ ත‍්‍රිකුණාමලය දිස්ත්‍රික්කවලත් විටින් විට හමන පැ.කි.මී. 40-50 පමණ තද සුළං ඇති විය හැකි අතර, සෙසු ප්‍රදේශවල විටින් විට හමන පැ.කි.මී. 30-40 පමණ තරමක තද සුළං ඇති විය හැකි අතර,

ගිගුරුම් සහිත වැසි සමග ඇතිවිය හැකි තාවකාලික තද සුළං වලින් සහ අකුණු මඟින් සිදු වන අනතුරු අවම කර ගැනීමට අවශ්‍ය පියවර ගන්නා ලෙසට කාලගුණ විද්‍යා දෙපාර්තමේන්තුව මහජනතාවගෙන් කාරුණිකව ඉල්ලා සිටී.
#සැණින් #එසැණින්

03/06/2026

03/06/2026

හොරණ අඟුරුවාතොට වැඩිහිටි නිවාසයේ ගින්නෙහි 🎬 දර්ශණ..
#සැණින් #එසැණින් ゚viralシ