27/05/2026
ඔයාට ජීවිතේ දිනන්න ඕන නම්… අරමුණක් හදාගන්න...
ජීවිතය කියන්නේ අහම්බයක් නෙවෙයි. දිශාවක් තිබිය යුතු, අරුතක් තිබිය යුතු, හෙටක් ගැන බලාපොරොත්තුවක් තිබිය යුතු ගමනක්. බොහෝ දෙනා ජීවිතේ මහන්සි වෙනවා, දුවනවා, සටන් කරනවා. ඒත් හැමෝම සතුටින් ජීවිතේ “දිනනවා” කියන්න බෑ... ඒකට හේතුව, ඔවුන්ට යන්න ඕන තැන ගැන පැහැදිලි අරමුණක් නැති වීම.
කැලේ මැද පාරක් නැතිව ඇවිදින කෙනෙක් වගේ, අරමුණක් නැති ජීවිතයක් හැම තැනම ගමන් කරනවා. ඒත් කිසිම තැනකට ළඟා වෙන්නේ නෑ. අද බොහෝ තරුණයන්ගේ මානසික ආතතිය, කලකිරීම, “මම කවුද?” කියන හිස් හැඟීම පවා ඇතිවෙන්නේ තමන්ගේ ජීවිතයට අරුතක් දෙන අරමුණක් නොමැති නිසයි.
මනෝවිද්යාවේ කියන විදියට, මිනිස් මනසට ජීවත්වෙන්න “හේතුවක්” අවශ්යයි. උදේ ඇහැරෙන හේතුවක්. වැටුණත් නැගිටින්න හේතුවක්. අමාරු දවස් වලත් ඉවසන්න හේතුවක්. ඒ හේතුව තමයි අරමුණ.
අරමුණක් තියෙන මිනිස්සු අසාර්ථකත්වයෙන් පවා පාඩම් ඉගෙන ගන්නවා. මොකද ඔවුන්ගේ අරමුණ තියෙන්නේ වැටුණු තැන නෙවෙයි, යන්න ඕන තැනට. ගල් ගැටෙන පාරක ගමන් කළත්, අවසානයේ ළඟා වෙන්න ඕන ඉලක්කය ඔවුන්ව ඉස්සරහට තල්ලු කරනවා. ඒ නිසාම අරමුණක් තියෙන ජීවිතයක් කියන්නේ බලාපොරොත්තුවෙන් පිරුණු ජීවිතයක්.
හැබැයි අරමුණක් කියන්නේ ලොකු ලොකු දේවල්ම වෙන්න ඕන කියලා නීතියක් නැහැ. ලෝකය වෙනස් කරන කෙනෙක් වෙන්නම ඕන නැහැ. සමහර කෙනෙක්ගේ අරමුණ හොඳ දෙමාපියෙක් වෙන එක වෙන්න පුළුවන්. තවත් කෙනෙක්ගේ අරමුණ තමා ආදරය නොලැබුණු දරුවන්ට ආදරය දෙන ගුරුවරයෙක් වෙන එක වෙන්න පුළුවන්. තවත් කෙනෙක්ට තමන්ගේ පවුල සතුටින් තියාගන්න එකම ලොකු ජයග්රහණයක් වෙන්න පුළුවන්.
වැදගත්ම දේ තමයි,,, ඒ අරමුණ “ඔයාගේ” වීම. අනිත් අයගේ සිහින අරගෙන ජීවිතේ ගොඩනඟන්න ගියොත්, කවදාහරි දවසක තමන්ම තමන්ට අහිමි වෙලා යනවා. ඒ නිසා තනිවෙලා හිතන්න. “මගේ හිත සතුටු වෙන්නේ මොන දේකදිද?”, “මම මොන කෙනෙක් වෙලා මැරෙන්න කැමතිද?” කියලා තමන්ගෙන්ම අහන්න.
අරමුණක් තියෙන මිනිස්සුන්ගේ ජීවිතෙත් පරිපූර්ණ නැහැ. ඔවුන්ටත් අඬන දවස් තියෙනවා. බිඳෙන අවස්ථා තියෙනවා. ඒත් වෙනස තියෙන්නේ, ඔවුන් නවතින්නේ නැති එක. මොකද ඔවුන් දන්නවා තමන් යන්නේ කොහෙටද කියලා.
ඉතින් ජීවිතේ දිනන්න ඕන නම්, මුලින්ම අරමුණක් හදාගන්න. අරමුණක් කියන්නේ හෙට දවසට දල්වන පුංචි පහනක්. ඒ පහන තිබුණොත් අඳුරුම රාත්රීන් වල පවා පාර හොයාගන්න පුළුවන්.
ජීවිතේ අමාරු වෙයි. මිනිස්සු තේරුම් නොගනී. සමහර වෙලාවට ඔයාටම ඔයාව සැක හිතෙයි. ඒත් අරමුණක් තියෙන තැන බිඳ වැටීමෙන් අවසාන වෙන්නෙ නෑ. ඒක නැවත නැගිටින්න ලැබෙන අවස්ථාවක් වෙනවා.
ඒ නිසා…
අදම ජීවිතේට අරමුණක් ඇතිකර ගන්න.
මොකද දිශාවක් තියෙන කෙනා, මන්දගාමීව ගියත්, කවදාහරි තමන්ගේ ගමනාන්තයට ළඟා වෙනවා.
✍️ ජයවාසු ⚡ 🧿
