12/06/2021
කොරෝනා මැද්දේ රුසියාවට ගිය ඇමති විමල් ලංකාවට තෑගි ගෙනත්...
පසුගිය සතියේ රුසියාවේ පීටර්ස්බර්ග් නගරයේ පැවැති '24 වැනි ශාන්ත පීටර්ස්බර්ග් අන්තර්ජාතික ආර්ථික සමුළුවට'(SPIEF 2021) ශ්රී ලංකාව නියෝජනය කරමින් ජාතික නිදහස් පෙරමුණේ නායක, කර්මාන්ත අමාත්ය විමල් වීරවංශ මහතා ප්රමුඛ නියෝජිත පිරිසක් සහභාගී වූහ. මුදල් හා රාජ්ය ව්යවසාය ප්රතිසංස්කරණ රාජ්ය අමාත්ය අජිත් නිවාඩ් කබ්රාල්, කර්මාන්ත අමාත්යාංශයේ අතිරේක ලේකම් රංජිත් විමලසූරිය, කර්මාන්ත අමාත්ය සම්බන්ධීකරණ ලේකම් අනුෂ්ක ගුණසිංහ යන මහත්වරු මෙන්ම රුසියාවේ ශ්රී ලංකා තානාපති මහාචාර්ය එම්. ඩී. ළමාවංශ මහතා ද එම සමුළු නියෝජිත පිරිසට අයත් ය.
මෙම සිව් දින සමුළුවෙහි සමුළු සැසිවාරයන්ට සිය උපරිම දායකත්වය සැපයූ ශ්රී ලංකා රාජ්යතාන්ත්රික පිරිසට ඒ හා සමගාමීව රුසියානු රජයේ ඉහළ පෙළේ රාජ්යතාන්ත්රිකයන් සමඟ ද්විපාර්ශ්වික සාකච්ඡා දෙකකට ද අවස්ථා උදාවිය. පළමුවැන්න පැවතියේ රුසියානු රජයේ කර්මාන්ත හා වෙළෙඳ ක්ෂේත්රයට අදාළ රාජ්යතන්ත්රිකයන් පිරිසක් සමගිනි.
"ඉතා උසස් තත්වයෙන් යුත් ඛනිජවැලි නිධි අප රට සතු වෙනවා. මා කර්මාන්ත අමාත්යවරයා ලෙස සැලසුම් කර ඇත්තේ ඛනිජවැලි අමුද්රව්ය ලෙස අපනයනය නවතා, ඛනිජවැලි ආශ්රිත වටිනාකම් එකතු කළ කර්මාන්ත ශ්රි ලංකාව තුළ ඇරඹීමටයි. ලොව ඛනිජවැලි ආශ්රිත කර්මාන්ත ක්ෂේත්රයේ ඉහළම තාක්ෂණය ඔබ රට සතුයි. මම කැමතියි මේ අවස්ථාවේ රුසියන් රජයට ශ්රී ලංකාව තුළ ඛනිජවැලි ආශ්රිත වටිනාකම් එකතු කළ ව්යාපාර ඇරඹීම සඳහා පැමිණෙන ලෙස ඇරයුම් කිරීමට." ඉහත සාකච්ඡාවේදී ඇමති වීරවංශ මහතා එසේ සඳහන් කළේ මෙරට කර්මාන්ත ක්ෂේත්රයේ ඉදිරි සැලසුම් පිළිබඳව ද පැහැදිලි කරමිනි.
"එහි දී රුසියානු ආයෝජකයන්ට අවශ්ය සියලු පහසුකම් සපුරා දීමට අපට මැදිහත් විය හැකියි" මුදල් රාජ්ය අමාත්යවරයා ද ඉහත සාකච්ඡාවේදී තහවුරුවක් ලබා දෙන ලද්දේ එසේය.
එම කරුණ සම්බන්ධයෙන් එකඟතාවකට පැමිණීමෙන් පසුව ශ්රී ලංකාව තුළ බර යන්ත්රෝපකරණ නිෂ්පාදනාගාරයක් අරඹා නිදහස් වෙළඳ ගිවිසුම් ද යොදා ගනිමින් එම නිෂ්පාදන ඉන්දියාව ඇතුළු දකුණු ආසියානු රටවලට අපනයනය කිරීමේ හැකියාව පිළිබඳව ද මෙහිදී සාකච්ඡාවට බඳුන් විය.
තවද තේ, රබර් වැනි අපනයනයන්ට අමතරව ශ්රී ලංකාවෙන් රුසියාවට සිදු කෙරෙන අපනයන ප්රමාණය වැඩි කර ගැනීමට ගත හැකි පියවර පිළිබඳව ද මෙහිදී අවධානය යොමු විය. "ශ්රී ලංකාව තුළ මේ වනවිට දේශීය නිෂ්පාදකයන් බලගැන්වීමේ වැඩපිළිවෙළක් ක්රියාත්මකයි. 'මේඩ් ඉන් ශ්රී ලංකා' නමැති මෙම වැඩපිළිවෙළ යටතේ දේශීය නිෂ්පාදකයන්ගේ ප්රමිතියෙන් ඉහළ නිෂ්පාදන සඳහා අපි කර්මාන්ත අමාත්යාංශය ලෙස 'මේඩ් ඉන් ශ්රී ලංකා' සන්නාමය ලබා දෙනවා. එම ප්රමිතියෙන් උසස් නිෂ්පාදන රුසියාවට අපනයනය කිරීමට අපට පියවර ගත හැකියි" එහිදී වීරවංශ අමාත්යවරයා පෙන්වා දුන්නේය.
ඒ අනුව මෙරට සුළු හා මධ්ය පරිමාණ ව්යවසායකයන්ගේ ප්රමිතියෙන් ඉහළ නිෂ්පාදන ඔන්ලයින් ක්රමවේදයක් ඔස්සේ රුසියානු ඉහළ පෙළේ වෙළෙඳ ව්යාපාරිකයන් පිරිසක් වෙත ප්රදර්ශනය කර ඔවුන්ගේ ඇණවුම් ලබා ගැනීම මසක් ඇතුළත සිදු කිරීමට දෙපාර්ශ්වයම එකඟ වූහ.
මුල් සාකච්ඡාවෙන් අනතුරුව දෙවන ද්විපාර්ශ්වික සාකච්ඡාව පැවතියේ රුසියානු රජයේ නියෝජිත, එහි ජාත්යන්තර කටයුතු පිළිබඳ යුරේසියානු මහජන සභාවේ නියෝජ්ය මහලේකම්, රුසියානු වාණිජ හා කර්මාන්ත මණ්ඩලයේ ස්වාභාවික කළමනාකරණ සහ පරිසර විද්යාව පිළිබඳ කමිටුවේ නියෝජ්ය සභාපති ස්ටැනිස්ලව් කොරොලෙව් මහතාගේ සහභාගීත්වයෙනි. මෙම තීරණාත්මක සාකච්ඡාවේදී මුල් සාකච්ඡාවේ කරුණු යළි අවධාරණය කෙරිණි.
"අප ශ්රී ලංකාව තුළ සිදු වෙමින් පවතින සාධනීය වෙනස්කම් දෙසත් ඔබේ කණ්ඩායම මෙම ආර්ථික සමුළුව තුළ සිදුකළ ඉදිරිපත් කිරීම් දෙසත් ගැඹුරින් සලකා බැලුවා. ඒ අනුව මා ඊළඟ 'ශාන්ත පීටර්ස්බර්ග් ජාත්යන්තර ආර්ථික සමුළුවේ විශේෂ නියෝජිතයා (Special Guest) වීමේ අවස්ථාව ශ්රී ලංකාවට හිමිකර දීමට කටයුතු කරනවා. මෙම සාකච්ඡාව එම කටයුත්තේ සමාරම්භක සාකච්ඡාව ලෙස සලකන්න" කොරොලෙව් මහතා සතුටින් දැනුම් දුන්නේය.
"ගෝලීය ආර්ථික න්යාය පත්රයේ ප්රධානතම කරුණු සාකච්ඡා කිරීමට හා ඒවාට ගෝලීය සහයෝගීතාවයෙන් ශක්ය විසඳුම් යෝජනා කිරීමට රාජ්ය තාන්ත්රිකයන්ට අනගි අවස්ථාවක් ලබා දෙන ප්රමුඛතම ගෝලීය ආර්ථික වේදිකාව බවට මේ වන විට 1997 ඇරඹි 'ශාන්ත පීටර්ස්බර්ග් අන්තර්ජාතික ආර්ථික සමුළුව' පත්ව තිබෙනවා. එහි ඊළඟ වසරේ විශේෂ නියෝජිතයා වීමට ලැබීම අපේ රටට ලැබුණු අනගි අවස්ථාවක්. එය ශ්රී ලංකාවේ කර්මාන්ත හා ආයෝජන ක්ෂේත්රයන්හි ප්රවර්ධනයට විශාල පිටිවහලක් වේවි" රුසියන් රජයේ නියෝජිතයාට ශ්රී ලංකාවේ කෘතවේදීත්වය පුදමින් ඇමති විමල් වීරවංශ මහතා පැවසුවේය.
@අබර
