30/08/2021
ශ්රී ලංකාව වෙනුවෙන් ඉස්සෙල්ලම ඔලිම්පික් පදක්කමක් දිනලා දෙන්නේ මේජර් ඩන්කන් වයිට්. ඔහු 1948 අවුරුද්දේ ලන්ඩනයේ තිබ්බ ඔලිම්පික් උළෙලේදී මීටර් 400 කඩුලු පැනීම ඉසව්වෙන් දෙවැනියා වෙලා රිදී පදකක්මක් දිනනවා. ඒත් එදා මේජර් ඩන්කන් වයිට් තරග කරන්නේ ශ්රී ලංකා කියන නාමය යටතේ නෙමෙයි. සිලෝන් කියන නාමය යටතේ.
කොහොම හරි එදා ඉඳලා තවත් අවුරුදු 52 යනකම්ම අපි කිව්වේ ශ්රී ලංකාව වෙනුවෙන් ඔලිම්පික් පදක්කමක් දිනා දීපු එකම ක්රීඩකයා ඩන්කන් වයිට් කියලා.
ඒත් අවුරුදු 52 කට පස්සේ හරියටම කිව්වොත් 2000 අවුරුද්දේ සැප්තැම්බර් 28 වැනිදා ශ්රී ලංකා ක්රීඩා ඉතිහාසයට ඉතාමත් වැදගත් දිනයක් වුණා. කොළඹට කිලෝ මීටර් 60 ක් පමණ දුරින් පිහිටි උඩුවක කියන හද්දා පිටිසර ගමේ ඉපැදුණු දුප්පත් කෙල්ලෙක් එදා සිඩ්නි නුවර ඔලිම්පික් ක්රීඩාංගණයේදී ශ්රී ලංකා කියන නාමය ඉහළට ඔසවා තැබුවා. ඒ කෙල්ල තමයි සුසන්තික ජයසිංහ. ඒ ශ්රී ලංකාව ඔලිම්පික් තරගාවලියකදී දිනාගත්තු දෙවැනි රිදී පදක්කම.
ඇත්තටම එදා සුසන්තිකා සිඩ්නි ක්රීඩාංගණයේදී දිනාගත්තේ ලෝකඩ පදක්කම. ඒත් රන් පදක්කම දිනපු ඇමෙරිකාවේ මේරියන් ජෝන්ස් තහනම් උත්තේජක චෝදනාවට වැරැදිකරු වීම නිසා එයාට පදක්කම අහිමි වුණා. දෙවැනි ස්ථානයේ හිටපු බහමාස් ක්රීඩිකා පවුලිනී ඩේවිස්-තොම්සන් පළමුවැනියා වෙලා තෙවැනි ස්ථානයේ හිටපු සුසන්තිකාට රිදී පදක්කම ලැබුණා.
ඒ සිදුවීමෙන් අවුරුදු 21 කට පස්සේ ආපහු සැරයක් ශ්රී ලංකාවේ ඔලිම්පික් ඉතිහාසය රනින් සරසන්නට ගමකින් ආපු කොල්ලෙක්ට හැකියාව ලැබුණා. නිකන් නෙමෙයි, හෙල්ල වීසි කිරීමේ ඉසව්වෙන් ලෝක වාර්තාවකුත් එක්ක. ඒ කොල්ලා තමයි හේරත් මුදියන්සේලාගේ දිනේශ් ප්රියන්ත. දිනේශ් ප්රියන්ත දිනපු රන් පදක්කම, ශ්රී ලාංකික ක්රීඩකයෙක් හෝ ක්රීඩිකාවක් ඕනෑම ආකාරයක ඔලිම්පික් තරගාවලියකින් දිනාගත් පළමුවැනි රන් පදකක්ම ලෙසින්ද ඉතිහාස ගත වෙනවා.
දිනේශ් ප්රියන්ත උපත ලබන්නේ 1986 ජූලි 15 වැනිදා අනුරාධපුරයේ කාගම කියන ගමේ. ඔහු අධ්යාපනය ලබන්නේ කාගම ධාතුසේන මහා විද්යාලයෙන්. දිනේශ්ගේ පියා ඔහු කුඩා කාලයේදීම මියයනවා. ඒ නිසා දිනේශ් ගේ ළමා කාලය ඒත තරම් සුවපහසු එකක් වුණේ නැහැ.
පාසල් අධ්යාපනයෙන් පස්සේ දිනේශ් ශ්රී ලංකා යුද්ධ හමුදාවට එකතු වෙනවා. ඒ 2004 අවුරුද්දේ. එතකොට දිනේශ්ගේ වයස අවුරුදු 18 යි. පුහුණුවෙන් පස්සේ 3 වැනි ගජබා රෙජිමේන්තුවට අනුයුක්තව සේවය කරන දිනේශ් 2008 අවුරුද්ද වෙද්දි කෝප්රල්වරයෙක්. ඒත් මානුශීය මෙහෙයුමේ අවසන් අදියරේදී 2008 දෙසැම්බර් 16 වැනිදා කිලිනොච්චියේදී ඔහුගේ අතට බරපතළ විදිහට තුවාල වෙනවා. පතුරම් තුනක් ඔහුගේ දකුණු අත පසාරු කරගෙන යාම නිසා ආබාධිත තත්ත්වයට පත්වන දිනේශ් වෛද්ය හේතූන් මත යුද්ධ හමුදාවෙන් විශ්රාම යනව. එතකොට ඔහුට වයස අවුරුදු 22 යි. ගජබා රෙජිමේන්තුවේ ඉහළ නිලධාරීන්ගේ උපදෙස් මත තමයි ඔහු ක්රීඩාවට යොමු වෙන්නේ.
ඔහු මුලින්ම රන් පදක්කමක් දිනාගන්නේ මැලේසියාවේ පැවැති තරගාවලියකදී. ඊට පස්සේ ඔහු 2012 පැරාලිම්පික් තරගාවලියට සහභාගි වීමට උත්සාහ ගන්නවා. ඒත් ඒ වෙද්දි ඔහු ලෝක ශ්රේණිගත කිරීමේ ලැයිස්තුවට අතුළත් නොවූ නිසා ඊට අවස්ථාව ලැබෙන්නේ නැහැ. 2014 ආසියානු පැරා ක්රීඩාවලියට තරග දිනේශ් හෙල්ල වීසි කිරීමේ ඉසව්වෙන් 6 වැනියා වෙනවා.
2016 රියෝ පැරාලිම්පික් තරගාවලියට සහභාගි වෙනකොට දිනේශ්ගේ වයස අවුරුදු 29 ක්. එය ඔහුගේ පළමුවැනි පැරාලිම්පික් තරගාවලිය. එහිදී ඔහු මීටර් 58.23 ක් දුරට හෙල්ල වීසි කරලා ශ්රී ලංකාවට ලෝකඩ පදක්කම දිනා දෙනවා. ඒක ප්රදීප් සංජයගෙන් පස්සේ ශ්රී ලංකා පැරාලිම්පික් ක්රීඩකයෙක් දිනපු පළමුවැනි රිදී පදක්කම. ප්රදීප් සංජය ලෝකඩ පදක්කමක් දිනන්නේ 2012 පැරාලිම්පික් තරගාවලියේ මීටර් 400 ඉසව්වෙන්.
2017 අවුරුද්දේ ලෝක පැරා මළල ක්රීඩා ශූරතාවලිය, 2018 ආසියානු පැරා ක්රීඩාවලිය වගේම 2019 ලෝක පැරා මළල ක්රීඩා ශූරතාවලියේදී ඔහු රන් සහ රිදී පදක්කම් දිනනවා.
2020 පැරාලිම්පික් තරගාවලියට දිනේශ් සුදුසුකම් ලබන්නේ අත්දැකීම් බහුල ජ්යෙෂ්ඨ ක්රීඩකයෙක් ලෙසින්. ඒ නිසාම ක්රීඩකයන් 9 දෙනෙකුගෙන් යුත් කණ්ඩායමේ නායකයා මෙන්ම ධජය රැගෙන යන්නේ ලෙසින්ද කටයුතු කළේ දිනේශ්. මෙම තරගාවලියේදී හෙල්ල වීසි කිරීම F46 වර්ගීකරණය යටතේ තරග කළ දිනේශ් මීටර් 67.79 ක් දුරට හෙල්ල වීසි කරමින් ලෝක වාර්තාවක්ද සමගින් අපිට රන් පදක්කමක් දිනා දෙනවා.
ශ්රී ලංකාව ඔලිම්පික් පදක්කමක් වෙනුවෙන් බලන් ඉන්නේ අවුරුදු ගාණක ඉඳලා. ඔලිම්පික් රන් පදක්කමක් වෙනුවෙන් ශ්රී ලාංකික අපි කොච්චර ආශාවෙන් බලන් ඉන්නවද කිව්වොත්, පවුලට බරක් කියලා නොරටුන්ට හදාවඩා ගන්ඩ දීපු මැටිල්ඩා කාර්ල්සන් හදිසියේම ද්විත්ව පුරවැසියෙක් වෙලා අපිට මොකක් හරි පදක්කමක් දිනලා දෙයි කියලා අපි ලැජ්ජාව පැත්තකින් තියලා කට ඇරගෙන බලන් හිටියා. මැඩිල්ඩගේ කෝටි ගානක් වටින අශ්වයට කවි ලිවුවා. ඒත් අන්තිමේදී වුණේ අතපය හතර හොඳට තියෙන ක්රීඩකයෝ ටිකකුයි ක්රීඩාව වෙනුවෙන් මෙළෝ දෙයක් නොකරන නිලධාරී රංචුවකුයි අපේ සල්ලිවලින් ටෝකියෝව බලලා ආපු එක විතරයි.
සුසන්තිකාගේ රිදී පදක්කමෙන් පස්සේ අපිට පැරාලිම්පික් පදක්කමක් දිනලා දුන්නේ ප්රදීප් සංජය. ඊට පස්සේ 2016 දී දිනේශ් අපිට ලෝකඩ පදක්කමක් දිනලා දෙනවා. ඊට අවුරුදු 5 කට පස්සේ දිනේශ්ම ආපහු සැරයක් ලෝක වාර්තාවකුත් එක්ක ශ්රී ලංකාව රනින් සරසණවා.
දිනේශ් ප්රියන්ත...,
රට වෙනුවෙන් ආබාධිත වුණාට පස්සෙත්, රට වෙනුවෙන් රන් පදක්කමක් දිනලා දෙන්ඩත් පුලුවන් රණවරුවෙක්ට විතරමයි...
ජයග්රහණයක් පේන මානයකවත් නැති රටකට, හිත් පුරා සතුටු වෙන්න පුලුවන් ජයග්රහණයක් ලබලා දුන්නට බොහෝම ස්තුතියි සහෝදරයා.
- අනිල් කරුණාරත්න -
