19/03/2022
السلام عليكم ورحمة الله وبركاته اخواني المقاولين اخواتي المقاولات عائلة الصفحة
❌ أكبر خطأ تقدر ديرو فالتجارة الالكترونية هو تقلب على المنتج الرابح..
غادي ضيع بزاااف ديال الوقت, تمارة و ملي غاتلقا داك المنتج لي كانسميوه رابح, غادي طلق ليه الأدس و غادي تقاتل مع الأدس مزيااااان و غادي يجيوك مبيعات و غادي تقاتل باش تأكدهوم و توصلهم و غادي تربح في الأخير (احتمال يوقع هادشي راه قليل كيفما كانعرفوا كاملين)
و من بعد هاد العمل و الاجتهاد كامل و بداية تحقيق الربح غادي يدوز واحد الأسبوع و لا 2 و غادي يبدا تجيك المبيعة غالية, الفايسبوك يبدا ياكل الفلوس و المبيعات كايقلالو, و غادي تبدا طير و تنزل باش تحافظ على نفس النتبيجة ديالك و لكن للأسف ما غاتقدرش و غادي توقف الحملة الاعلانية كاملة و غادي تقول المنتج تحرق و غادي تحبس كلشي و ضرب حسابك.
💰 غادي تلقاك من بعد ما تخلص كلشي ربحتي 200 درهم و لا 700 درهم في اسبوع, من بعد أسبوع ديال الحرب العالمية الثالثة.
هادشي لي درنا راه أحسن الاحتمالات لأن الأسوء هو أنك ما غاتجيب تا مبيعة و تكون خاسر.
و لكن مع ذلك أحسن الاحتمالات, راه تا واحد ما غايقبل هادشي, اسبوع ديال الحرب من اجل 500 درهم, يعني خاصك دوز الحرب العالمية 4 مرات فالشهر الا بغيتي تصور صالير ديال سيكيريتي, (نخدم سيكيريتي افضل بصراحة).
◀️ الفكرة لي بغيت نوصل ليكم أن المنتج الرابح هو لي غادي نخدم عليه شهر و يبقى خدام العام كامل و لا عامين علاش لا؟ و بما ان هذا المنتج لا يوجد من بين منتجات التجارة الالكترونية فالحل هو ...
نقلب على تجارة رابحة ماشي منتج رابح, و نتعامل مع التجارة الالكترونية على انها تجارة حقيقية, نختار تخصص واحد نركز عليه و نجح والديه, ما غاديش نتسناه أنا ينجح بوحدو, أنا لي غادي نجح التجارة ديالي.
❓❓ شكون فنظركم لي كاينجح واش الشخص لي كاتشوفوه كل مرة مجرب مشروع؟ مرة داير سناك, مرة داير محل ملابس, مرة داير ملبنة, و لا داك لي كايكون كايفهم فالهواتف مثلا و كايفتح محل و كايبقا فيه لمدة سنة سنتين 5 سنوات.
بالتأكيد الشخص الثاني لأانه كاين ما يسمى بالتراكم كايراكم تجربة و سمعة و كايعرفوه الناس و كايبداو شي يوريه لشي حتا كايتشهر, اما النوع الاول كانسميوه سبع صنايع و الرزق ضايع.
💡 نصيحتي تخصصوا في مجال واحد كاتفهمو فيه مزيان هاداك هو المجال المربح, ما غاديش يربحك فالبداية و لكن تأكد أنه غادي يربحك مزياااان مع الوقت.
ما كاتفهم فوالو تعلم, تعلم, تعلم, حتى تولي تفهم.
الله يوفقنا و يوفقكم شباب.
Keys2success مفتاح النجاح
