13/06/2020
မျက်မှန်ဖြစ်ပေါ်လာသည့်သမိုင်း.......(အပိုင်း၂)
(12) ရာစုလောက်တွင် တရုတ်တရားသူကြီးများသည် မီးခိုးရောင်သလင်းကျောက်နှင့်ပြုလုပ်ထားသောမျက်မှန်များကို မျက်မြင်သက်သေများအားမေးမြန်းသည့် အချိန်တွင် တပ်ဆင်ခဲ့ကြသည်။ ဒီလိုတပ်ဆင်ခြင်းဟာ သူတို့ကိုယ်သူတို့ လျှို့ဝှက်နက်နဲသောပုံစံဖြစ်စေသည် ဟု ယုံကြည်ကြပြီး မျက်မြင်သက်သေများအားလိမ်လည်မပြောနိုင်စေရန်ရည်ရွယ်သည်။နှစ်ပေါင်း (၁၀၀) ကြာပြီးသည့်နောက် "တရုတ်ပြည်သို့ Marco Polo ၏ခရီးစဉ်များအကြောင်း" မှတ်တမ်းများအရ Marco Poloသည်တရုတ်ပြည်၌ သက်ကြီးရွယ်အိုများမျက်မှန်တပ်ဆင်ထားသည်ကိုတွေ့မြင်ခဲ့ရသည်ဟု တချို့ကဆိုကြသည်။ သို့သော် Marco Polo ၏ ခရီးသွားစာအုပ်များကို အသေအချာစစ်ဆေးခဲ့သူများသည် မျက်မှန်နှင့်ပတ်သတ်သည့် အကြောင်းအရာများကို ဖော်ပြထားခြင်း မရှိဟုဆိုသောကြောင့် အဆိုပါအယူအဆများကိုလိမ်လည်လှည့်ဖျားမှုအဖြစ်မှတ်ယူကြသည်။
ရက်အတိအကျအနေနှင့် အငြင်းပွားဖွယ်ရှိသော်လည်း ပထမဆုံးသောမျက်မှန်သည် အီတလီ၌ (1268) မှ (1300) အတွင်း စတင်တီထွင်ခဲ့ကြသည်ဟု အကြမ်းဖျင်းသတ်မှတ်ခဲ့ကြသည်။
ထိုမျက်မှန်များမှာ အခြေခံအားဖြင့် စာဖတ်ကျောက်တုံး( မှန်ဘီလူး ) နှစ်ခုကို အလယ်က ပတ္တာနှင့် ဆက်၍ နှာခေါင်းရိုးပေါ်တွင် ဟန်ချက်ညီအောင်တင်ကာအသုံးပြုရသော ပုံစံဖြစ်သည်။
(14)ရာစုအလယ်ပိုင်းလောက်၌ Tommaso da Modena ဆွဲခဲ့သောပန်းချီများတွင် ထိုမျက်မှန်များတပ်ဆင်ထားသောလူပုံများကို အစောဆုံးအနေဖြင့် တွေ့နိုင်ပါသည်။ Tommaso da Modena ဟာ ဘုန်းကြီးများ လက်ရေးစာမူဖတ်ရန်အတွက် တစ်ဖက်တပ်မျက်မှန်နှင့် ပတ္တာတပ်အစုံလိုက်မျက်မှန်များကို တပ်ဆင်စေခဲ့သူပဲဖြစ်သည်။
ဒီမျက်မှန်တီထွင်မှုကို အီတလီမှတဆင့် Belgium, Netherlands, Luxembourg, Germany, Spain, France နှင့် England အစရှိသည့် နိုင်ငံများအားမိတ်ဆက်ပေးခဲ့ပါသည်။ ထိုမျက်မှန်များတွင် မှန်ဘီလူးခုံးများကိုအသုံးပြုထားသောကြောင့် ပုံနှိပ်စာများနှင့် အရာဝတ္ထုများကို ပိုမိုထင်ရှားစေသည်။ England ရှိမျက်မှန်ရောင်းချသူများကတော့ စာကြည့်မျက်မှန်များသည် အသက်လေးဆယ်ကျော်များအတွက် အထောက်အကူဖြစ်သည်ဟု စတင်ကြော်ငြာခဲ့သည်။ (1629)ခန့်၌ မျက်မှန်ပြုလုပ်သူများအသင်းအဖွဲ့ကို “ သက်ကြီးရွယ်အိုများအတွက်ကောင်းချီး” ဟူသောဆောင်ပုဒ်ဖြင့် စတင်ဖွဲ့စည်းခဲ့သည်။
