21/02/2026
Meta က Messenger.com ကို ဧပြီလမှာ ပိတ်သိမ်းမည်
ကွန်ပျူတာ ဘရောက်ဇာကနေ Messenger.com ကို သုံးပြီး စာပို့နေကျသူတွေအတွက်တော့ သတင်းဆိုးတစ်ခု ထွက်ပေါ်လာပါတယ်။ လာမယ့် ၂၀၂၆ ခုနှစ် ဧပြီလကစပြီး Meta ဟာ Messenger.com ဝက်ဘ်ဆိုက်ကို အပြီးတိုင် ရပ်ဆိုင်းလိုက်တော့မှာပါ။ အဲဒီအချိန်ကစပြီး ဝက်ဘ်ဆိုက်ကနေ စာပို့ချင်တယ်ဆိုရင် (https://facebook.com/messages) ကနေတစ်ဆင့် ဖေ့စ်ဘွတ်ခ်ထဲကို မဖြစ်မနေ ဝင်ရောက်ပြီးမှသာ သုံးခွင့်ရတော့မှာ ဖြစ်ပါတယ်။ မိုဘိုင်းဖုန်း အက်ပ်တွေမှာတော့ ပုံမှန်အတိုင်း ဆက်သုံးလို့ ရနေဦးမှာပါ။
ဒီလိုပြောင်းလဲလိုက်တဲ့အတွက် ဖေ့စ်ဘွတ်ခ်အကောင့်နဲ့ မချိတ်ထားဘဲ Messenger သီးသန့်သုံးနေသူတွေဆိုရင် ဖုန်းအက်ပ်ကနေပဲ စာဆက်ပို့လို့ ရတော့မှာပါ။ ဒါပေမဲ့ ပလက်ဖောင်း အပြောင်းအလဲဖြစ်သွားလို့ စာတွေ ပျောက်သွားမလားဆိုပြီးတော့ စိုးရိမ်စရာတော့ မလိုပါဘူး။ အရင်က Chat History တွေကို Backup လုပ်တုန်းက ပေးခဲ့တဲ့ PIN နံပါတ်ကို သုံးပြီးတော့ မိမိရဲ့ စာဟောင်းတွေကို ပြန်လည်ရယူနိုင်မှာ ဖြစ်ပါတယ်။
တကယ်တော့ Meta ဟာ Windows နဲ့ Mac တွေအတွက် သီးသန့်ထုတ်ထားတဲ့ Messenger အက်ပ်တွေကို အရင်လတွေကတည်းက ရပ်ဆိုင်းခဲ့တာဖြစ်ပြီး အခုလို ဝက်ဘ်ဆိုက်ကိုပါ ထပ်ပိတ်လိုက်တာပါ။ ဒီလုပ်ရပ်ကြောင့် အသုံးပြုသူတွေကြားမှာတော့ မကျေနပ်သံတွေ ထွက်ပေါ်နေပါတယ်။ အထူးသဖြင့် ဖေ့စ်ဘွတ်ခ်သုံးရတာ ငြီးငွေ့လို့ အကောင့်ကို ပိတ် (Deactivate) ထားပြီး Messenger သီးသန့်ပဲ သုံးနေတဲ့သူတွေဟာ ကွန်ပျူတာကနေ စာပို့ဖို့အတွက် ဖေ့စ်ဘွတ်ခ်ကို ပြန်သုံးရမယ့် အခြေအနေကို လုံးဝသဘောမကျကြပါဘူး။
သုံးစွဲသူတွေဘက်က ဘယ်လောက်ပဲ အဆင်မပြေဖြစ်နေပါစေ စီးပွားရေးရှုထောင့်အရ ကြည့်ရင်တော့ Meta အတွက် ပလက်ဖောင်းတွေ လျှော့ချလိုက်နိုင်တဲ့အတွက် ပြုပြင်ထိန်းသိမ်းစရိတ်တွေ အများကြီး သက်သာသွားမှာပါ။ စိတ်ဝင်စားစရာကောင်းတာက Meta ဟာ ၂၀၁၁ ခုနှစ်တုန်းက Messenger ကို ဖေ့စ်ဘွတ်ခ်ကနေ ခွဲထုတ်ပြီး သီးသန့်အက်ပ်အဖြစ် တွန်းအားပေးခဲ့ပေမဲ့ အခု ၂၀၂၃ နောက်ပိုင်းမှာတော့ အဲဒီ Messenger ကို ဖေ့စ်ဘွတ်ခ်ထဲ ပြန်သွင်းဖို့ ကြိုးစားလာတာဟာ သူတို့ရဲ့ မဟာဗျူဟာတွေ တဖြည်းဖြည်း ပြောင်းလဲလာတာကို သိသိသာသာ မြင်တွေ့ရပါတယ်။
Ref : Nation Thailand
#ဘန်ကောက်လမ်းညွှန်ကိုစိုင်း
Hang out anytime, anywhere - Messenger makes it easy and fun to stay close to your favorite people.
