09/09/2024
ဒီကနေ့ ရန်ကုန်ရောက် မန္တလေးသားနှစ်ယောက်နဲ့ ဧည့်သည် မန္တလေးသားတို့ မန္တလေးသားတွေဖွင့်ထားတဲ့ Classic Mandalay မှာ ချိန်းပြီး လက်ဖက်ရည်သောက်ကြပါတယ်။
ရန်ကုန်ရောက်နေတဲ့ မန္တလေးသားနှစ်ယောက် ကျွန်တော်နဲ့ အစ်ကိုကြီးကိုမျိုးညွန့်တို့က ဖားသားလဖုန်းကျောင်းသားတွေဖြစ်ပြီး မန္တလေးသားဧည့်သည်ကတော့ ကိုစိန်မြင့် (ရွှေချည်ထိုး) စိန်ပီတာကျောင်းထွက် ဖြစ်ပါတယ်။ တကယ်တော့ သူတို့နှစ်ယောက်စလုံးက ကျွန်တော့်ရဲ့ စီနီယာတွေ ဖြစ်ပါတယ်။ ကျွန်တော်က ကိုစိန်မြင့်ရဲ့ သူငယ်ချင်းဖြစ်တဲ့ ကိုဝင်း (မောင်ဝင်းမောင်-တမ္ပဝတီ) အထက်တန်းကျောင်းသားဘဝက မြေဖြူခဲလေးတွေနဲ့ ငါးရာ့ငါးဆယ်ဇာတ် အရုပ်ကလေးတွေ လုပ်ပေးတာကို တန်းစီပြီး ယူခဲ့ရတာဆိုတော့ သူတို့နဲ့က အရွယ် အတော်ကွာပါတယ်။ ဒါပေမယ့် လူငယ်ပေါင်း ပေါင်းခဲ့ကြတာ ဖြစ်ပါတယ်။ မန္တလေးက မခွာခင်အထိ နန်းရှေ့မှာရှိတဲ့ ဆရာဦးကြည်မြအိမ်မှာ မကြာခဏဆုံခဲ့ကြပြီး ၁၉၈၄ ကျွန်တော် ရန်ကုန်ရောက်တော့ ကိုစိန်မြင့်နဲ့ ကျွန်တော် ဝေးသွားပါတယ်။
ကျွန်တော် မြဝတီမှာ အယ်ဒီတာလုပ်နေတဲ့အချိန် သူနဲ့ကျွန်တော် နှစ်ခါပြန်တွေ့ရပါသေးတယ်။ ၁၉၈၉ ခုနှစ် ကမ္ဘာ့ကုလသမဂ္ဂရုံးမှာ ချိတ်ဖို့အတွက် ရွှေချည်ထိုးကားကြီး သွားပို့တုန်းကတစ်ကြိမ်နဲ့ ၁၉၉၂ ရန်ကုန် တပ်မတော်ခန်းမမှာ ကျေးလက်အနုပညာပြပွဲ လုပ်တုန်းကတစ်ကြိမ် ဖြစ်ပါတယ်။ အဲဒီနှစ်ကြိမ်နောက်ပိုင်း သူကျင်လည်ရာ ပတ်ဝန်းကျင်နဲ့ ကိုယ်ကျင်လည်ရာပတ်ဝန်းကျင် မတူတဲ့အတွက် မတွေ့ဖြစ်ကြတာ ဒီကနေ့အထိပါပဲ။ မတွေ့ဖြစ်တဲ့နှစ်ကို ရေတွက်ကြည့်ရင် ၃၂ နှစ် ရှိပြီ ဖြစ်ပါတယ်။
ပြီးခဲ့တဲ့ လပိုင်းကတော့ သူနဲ့ကျွန်တော် ပြန်ဆုံဖို့ အကြောင်းတစ်ခု ဖန်လာပါတယ်။ Print City က ပုံနှိပ်စာအုပ်တွေကို book drive စက်ကြီးနဲ့ဖတ်ပြီး ကွန်ပျူတာစာလုံးတွေ ပြန်ပြောင်းပေးတဲ့ ဝန်ဆောင်မှုလုပ်နေတော့ သူရေးတဲ့စာအုပ် “ပန်းချီခရီးနှင့် ဘဝရေစီး”ကို အသစ်ပြန်ထုတ်ချင်လို့ ကျွန်တော်တို့ Print City ကို မိတ်ဆွေတွေကတစ်ဆင့် လာအပ်ရာကနေ သူနဲ့ ပြန်လည်ရေစက်ဆုံရပါတယ်။
သူ့ရဲ့တခြားကိစ္စတွေနဲ့ ရန်ကုန်အလာ စာအုပ်ကိစ္စပါ ပြောဖြစ်ဖို့အကြောင်းဖန်လာတော့ သူရှိနေတဲ့ကာလအတွင်း ကျွန်တော့်ရဲ့ Print city မှာ လာထိုင်ရင်း စာအုပ်ကိစ္စပြောဖြစ်ပါတယ်။ စာအုပ်ကိစ္စက ခဏပဲ ဖြစ်ပေမယ့် ရှေးဟောင်းနှောင်းဖြစ်တွေ ပြောတာနဲ့ပဲ အချိန်ကုန်သွားပါတယ်။ သူဆက်ရေးနေတဲ့ မန္တလေးဆက်အကြောင်းအရာတွေမှာ ကျွန်တော်သိတာတွေ၊ သူမေ့နေတာတွေကို ပြောဖြစ်ကြပါတယ်။ သူနဲ့ကျွန်တော်က ကျင်လည်ရာဘဝတွေသာမတူတာ မန္တလေးသားတွေဆိုတော့ သူနဲ့ကိုယ် ကျင်လည်ခဲ့ကြတဲ့ ၁၉၆၅-၈၅ ကာလတွေကအကြောင်းတွေက ဖြတ်သန်းလာရပုံချင်းတူတဲ့အတွက် စကားအမျှင်မပြတ်ကြတော့ ဒီကနေ့ ထပ်ချိန်းပြီး လက်ဖက်ရည်သောက်ရင်း စကားဆက်ပြောဖြစ်ကြပါတယ်။ မန္တလေး ရှေးဖြစ်ဟောင်းတွေအပြင် ကျွန်တော်နဲ့ အလှမ်းဝေးတဲ့ ပန်းချီလောကအကြောင်းတွေ ပြောဖြစ်ကြပါတယ်။ အဲဒီမှာပဲ ကြိုးစားမှု၊ ကုသိုလ်ကံနဲ့ စန်း အကြောင်းသုံးပါးနဲ့ ကိုစိန်မြင့်ရဲ့ ဘဝဇာတ်ကြောင်းကို ဖျတ်ခနဲ၊ ဖျတ်ခနဲ အများကြီး တွေ့လိုက်ရပါတယ်။ စာအုပ်ထဲမှာ အဲဒီ စိတ်ဝင်စားစရာအကြောင်းတွေ တွေ့မြင်ရမှာ ဖြစ်ပါတယ်။
“ပန်းချီခရီးနှင့် ဘဝရေစီး” က နှစ်တွဲထွက်လာပါမယ်။ ပထမပိုင်းက ၂ဝ၁၈ ခုနှစ်ကစာအုပ်ကို ဒုတိယအကြိမ်ထုတ်ဝေမှာ ဖြစ်ပြီး ဒုတိယပိုင်းကတော့ ဆောင်းပါးအသစ်၊ အကြောင်းအရာသစ်တွေ ဖြစ်ပါတယ်။ ၂ဝ၂၄ ထဲမှာ နှစ်အုပ်စလုံး ထွက်လာဖို့ ရှိပါတယ်။
