26/06/2026
Татварын багц хуулийн өөрчлөлт хувийн хэвшлийн хөгжлийг дэмжихэд чиглэсэн
Таварын багц хуульд нэмэлт, өөрчлөлт оруулах хуулийн төслийг УИХ-ын чуулганаар өчигдөр эцэслэн баталлаа. Энэ удаагийн нэмэлт, өөрчлөлтөд олон чухал өөрчлөлт орсон. Тухайлбал, Хувь хүний орлогын албан татвар дээр л гэхэд хөдөлмөрийн хөлсний доод хэмжээ буюу 792 мянган төгрөгтэй тэнцэх хэмжээтэй орлогоос татвар авахгүй байхаар тусгасан бол 2 сая хүртэлх төгрөгийн хэмжээнээс нэг хувь байхаар тусгасан байна. Энэхүү 792 мянга хүртэлх орлогын хөнгөлөлт ирэх оны нэгдүгээр сарын 1-нээс хэрэгжинэ. Харин 2 сая хүртэлх 2028 оны нэгдүгээр сарын 1-нээс хэрэгжиж эхлэхээр зохицуулсан. Ийнхүү хөдөлмөр эрхэлж байгаа нэг сая 30 мянган иргэн энэхүү хөнгөлөлтөд хамрагдах боломж бүрдэж байгаа юм.
Татварын багц хуультай холбоотойгоор сүүлийн хоёр жилийн хугацаанд гурван ч удаа УИХ-аас Ажлын хэсэг гаргаж ажиллуулсан. Уг хуулийг батлуулахад Ажлын хэсгүүдийн ахлагчаар ажилласан Х.Ганхуяг, П.Ганзориг, Д.Энхтүвшин нарын гишүүд тод дуу хоолой, байр суурьтай оролцож манлайлж ажилласан гэдгийг мэргэжилтнүүд онцолж буй. Шинэчлэгдсэн Татварын багц хууль нь татварын дарамтыг бууруулж, бизнесийн таатай орчныг бүрдүүлэх, ажлын байрыг нэмэгдүүлэх, эдийн засгийн идэвхжил, хувийн хэвшлийн хөгжлийг дэмжихэд чиглэсэн чухал эрх зүйн шинэчлэл болж байна.
