16/05/2026
АНУ-БНХАУ-ын оройн зоогийн хүлээн авалт дээр Илон Маск, Тим Кук нарын дунд хамгийн их анхаарал татсан хүн бол "Ленз Технологи" (Lens Technology)-ийг үүсгэн байгуулагч Жоу Чюньфэй байв. Тэрээр хөдөө үйлдвэрийн эгэл жирийн ажилчин охиноос Хятадын хамгийн баян эмэгтэй болж, бүхий л амжилтыг өөрийн зүтгэлээр, тэгээс эхлэн босгосон нэгэн юм.
Хунань мужийн ядуу буурай тосгонд төрсөн түүнийг 5 настай байхад нь ээж нь өөд болж, аав нь ослын улмаас хараагүй болжээ. Амьдралын эрхээр 16 настайдаа сургуулиа орхихоос өөр аргагүйд хүрсэн тэрээр Гуандун мужид шилний үйлдвэрийн угсрах шугам дээр ажиллахын зэрэгцээ шөнөөр бие даан суралцдаг байв. Яваандаа тэрээр цалингаасаа хуримтлуулсан 20,000 юаниа шавхан, найман төрөл садангийнхаа хамт цагны шил хийдэг жижигхэн урлан нээжээ.
2000-ад он гармагц гар утасны салбар эрчтэй хөгжсөн юм. Жоу "Ленз Технологи" компаниа байгуулж, Моторола (Motorola) компанийн V3 загварын утсанд тавигдах чанарын хатуу шаардлагыг хангахын тулд бүх зүйлээрээ дэнчин тавин ажиллав. Ингэснээр 100 сая ширхэг борлуулагдсан захиалгыг авч чадсан бөгөөд энэ нь түүний компанийг салбартаа тэргүүлэгч болоход түлхэц өгчээ.
Хамгийн том эргэлтийн цэг нь 2007 онд Стив Жобс анхны iPhone утсыг танилцуулах үед тохиосон юм. Жоугийн баг анхны iPhone-ий шилэн нүүрийг олноор үйлдвэрлэхийн тулд Apple-ийн инженерүүдтэй хамтран гурван сарын турш өдөр шөнөгүй зүтгэжээ. Энэхүү амжилт нь iPad, MacBook зэрэг бүтээгдэхүүнүүдийн урт хугацааны, асар том гэрээнүүдийг баталгаажуулж, Ланси компанийг дэлхийн хамгийн шилдэг мэдрэгчтэй шил үйлдвэрлэгч болгосон төдийгүй Жоуд Тим Кукийн хажууд суух суудлыг авчирсан юм.
Тэгвэл яагаад Маск түүний нөгөө талд сууж байсан бэ?
Ленз Технологи компани үйл ажиллагаагаа улам өргөжүүлж, ухаалаг төхөөрөмжүүд, автомашины салон болон робот техникийн салбарт хэдийн хөл тавьжээ. Тэд өдгөө Тесла (Tesla) зэрэг 30 гаруй автомашин үйлдвэрлэгчдэд цонх, төв удирдлагын дэлгэцийн шил нийлүүлж байгаагаас гадна роботын үе мөч, мэдрэгчүүдийг үйлдвэрлэж байна. Энэ нь Илон Маскийн бизнесийн чиглэлүүдтэй туйлын их давхцаж байгаа хэрэг юм.
Дунд сургуулиа ч төгсөж чадалгүй сургуулиас гарсан, ядуу зүдүү амьдралаас босож, юу ч үгүйгээс асар том эзэнт гүрнийг цогцлоосон охин. Санаанд багтамгүй 40 жилийн дараа тэрээр дэлхийн технологийн аваргуудын яг төвд нь сууж байна. Энэ бол Жоу Чюньфэйн түүх юм.
