09/08/2026
Монголын үндэсний шигшээ багуудын дэлхийн чансаа: 2026 оны зуны байдлаар.
Монголын багын спортын шигшээ багуудын олон улсын чансааг 2026 оны зун шинэчлэгдсэн албан ёсны мэдээллээр нэгтгэн харвал сонирхолтой үр дүн гарч байна.
Хөлбөмбөг, волейбол, сагсан бөмбөгийн 5х5 болон 3х3 гэсэн багын спортын дөрвөн төрөлд Монгол улс өөр өөр түвшинд хөгжиж байгаа нь тодорхой.
Хөлбөмбөгийн эрэгтэй шигшээ баг FIFA-гийн дэлхийн чансаанд ''190-д" жагсаж байна (2026 оны 7-р сарын 20-ны байдлаар).
Энэ нь дэлхийн 211 орны шигшээ багуудын доогуур түвшинд хамаарах бөгөөд 874.47 оноотойгоор Samoa, Aruba зэрэг багуудын ард, American Samoa, Bhutan-ы өмнө бичигдэж байна. Сүүлийн жилүүдэд 185–190-ийн хооронд хэлбэлзэж байгаа бөгөөд түүхэн дээд үзүүлэлт нь 2011 онд бүртгэгдсэн 160-р байр юм.
Волейболын хувьд эрэгтэй шигшээ баг FIVB-ийн чансаанд "132-р" байрт (2026 оны 8-р сарын 3), эмэгтэйчүүд "93-р" байрт (2026 оны 5-р сарын 24) тус тус жагсаж байна.
Эрэгтэй шигшээ Азийн бүсэд доогуур түвшинд байгаа бол эмэгтэйчүүд сүүлийн шинэчлэлтээр нэлээд байр ахисан үзүүлэлттэй. Хоёр баг ч том тэмцээнүүдэд тогтмол оролцож, туршлага хуримтлуулсаар байна.
Сагсан бөмбөгийн 5х5 төрөлд эрэгтэй шигшээ баг FIBA-ийн дэлхийн чансаанд "108-р" байрт (2026 оны 7-р сарын 13), эмэгтэйчүүд ойролцоогоор "72-р" байрт бичигдэж байна.
Энэ нь Азийн түвшинд дунд зэргийн байр суурьтай гэсэн үг. Гэхдээ Монголын сагсан бөмбөгийн жинхэнэ хүч 3х3 төрөлд илэрдэг.
3х3 сагсан бөмбөгт Монгол улс дэлхийн шилдэгүүдийн тоонд ордог.
FIBA 3x3-ийн холбооны чансаагаар (2026 оны 8-р сарын 1):
- Эрэгтэйчүүд "3-р" байр (Ази/Номхон далайн бүсэд 1-р)
- Эмэгтэйчүүд "9-р" байр
Энэ үзүүлэлт нь Монголын 3х3-ийн хөгжлийг тод харуулж байна. Улаанбаатар хотод зохиогдсон 2026 оны World Tour болон Women’s Series тэмцээнүүдэд Монгол багууд (Ulaanbaatar MMC Energy, Ulaanbaatar Amazons гэх мэт) өндөр амжилт үзүүлж, олон улсын түвшинд хүлээн зөвшөөрөгдсөөр байна.
Ерөнхийдөө Монголын шигшээ багууд хөлбөмбөг, волейбол, сагсан бөмбөгийн 5х5 төрлүүдэд дэлхийн дунд болон доод түвшинд байгаа бол 3х3 сагсан бөмбөгт дэлхийн шилдэг 10-т багтаж, тус улсын спортын хамгийн амжилттай төрлүүдийн нэг болжээ.
Ирээдүйд эдгээр төрлүүдийн хөгжил, залуу тамирчдын бэлтгэл, олон улсын тэмцээнүүдэд тогтмол оролцох нь чансааг ахиулахад чухал нөлөө үзүүлэх нь дамжиггүй.
Хөл бөмбөгийн холбоо бол хамгийн их санхүүжилттэй атлаа хөгжил нь ингээд сүүл мушигаад байдаг шалтгааныг дурдах илүүц бизээ.
