21/04/2025
BA, A SAMUN DUNIYA DA SANYIN JIKI, SAI DA ƘOƘARI.
Ba ƙarfin zuciyar Hi**er ba ce,
Ko dabarar Stalin,
Ko kwaikwayon wayon Churchill,
Sai dai wutar da ke ƙirjin matashi, Mai son Jajircewa akan abinda yake so.
Wanda ya ƙi dogaro da tsammani, Yayi Fafutuka da Gumin dake Fita a jikinsa ,
Ya tashi da safe da sunan:
"Zan nemi na kaina!"
Ba don ya ga hanya a buɗe ba,
Amma don yasan cewa duk Wani Bango Za'a iya Keta Hanya ta jikinsa a wuce duk ƙarfinsa.
Kar ka raina ƙanƙantar sana'a,
Kar ka ɗauki dinki ko aski a matsayin ƙasƙanci,
Kar ka yi tunanin shan ruwa da tsintar kwalabe
Ya fi mutunci da za a samu a Libya ko Aljeriya.
Sana'ar da ka raina anan ka kasa jajircewa akanta ko a can ƙasashen da kake hange ko darajar Wanda s**a kai Rabin su ba zaka samu ba.
Ba kowanne ke da Sa'a ba idan wani yayi rawa ya samu kuɗi wani na jakki zai ci.
Duk mai hakuri yana girbi.
Kamar yadda dundu take karyewa,
A hankali kuma take zama kasko,
Haka sana’a take — a hankali ake gina ta.
In ka dage da gaskiya,
Ka rungumi aiki — ko ɗinki ne, ko suya, ko gyaran waya —
Wallahi zakaci nasara fiye da wanda ya haura hamadar Sahara,
Ya bar gida da fata, amma ya dawo da baƙin ciki.
Fita daga ƙasa ba laifi ba ne,
Amma idan ta zama dole —
To ka sani: akwai wahala da azaba,
Rayuwa bata da tausayi,
Kuma ba duk wanda ya fita ke dawowa da dariya.
Amma kai matashi!
Ka tsaya — ka jajirce — ka nemi na halal,
Duniya ba ta jin kuka,
Amma tana lale marhabin da ƙoƙari.
Ka zama dutse a ruwa,
Ka zama murya a shiru,
Ka zama gwarzo a cikin rayuwa,
Domin duk mai hakuri,
Allah baya barinsa a baya.
