12/05/2026
Hukumar Rage Talauci da Samar da Arziki ta Jihar Adamawa (PAWECA) ta amince da kulla haɗin gwiwa da Cibiyar Binciken Masana’antu ta Tarayya da ke Oshodi (FIIRO), domin faɗaɗa shirye-shiryen horaswa da tallafa wa al’umma a fannoni daban-daban na sana’o’i.
An cimma wannan matsaya ne a ranar Talata, yayin wata ziyarar girmamawa da jami’an FIIRO s**a kai wa Darakta Janar na PAWECA, Dakta Michael Zira, a birnin Yola.
Dakta Zira ya ce haɗin gwiwar zai bai wa ɓangarorin biyu damar haɗa ƙarfi da ƙarfe domin ƙarfafa hanyoyin dogaro da kai da bunƙasa sana’o’i a jihar.
Ya bayyana cewa PAWECA ta riga ta horas da dubban matasa da masu digiri a sana’o’i daban-daban, tare da raba tallafin Naira 50,000 ga sama da mutane 200,000 a ƙarƙashin shirin Fintiri Business Wallet, domin tallafa wa ƙananan sana’o’i da kasuwanci.
Dakta Zira ya ce ziyarar ta zo a daidai lokacin da hukumar ke shirin fara wani sabon shiri mai suna “From Retirement to Wealth” (Daga Ritaya zuwa Arziki), wanda Gwamnan Jihar Adamawa, Ahmadu Umaru Fintiri, ya amince da shi kwanan nan.
Ya ce shirin, wanda shi Darakta Janar ɗin ya assasa, an tsara shi ne domin taimaka wa ma’aikatan gwamnati da ke gab da ritaya su samu hanyoyin dogaro da kai da samar da sana’o’in da za su ci gaba da yi bayan sun bar aiki.
Zira ya bukaci FIIRO da ta fara matakan ƙulla yarjejeniya a hukumance domin a samu sakamako mai amfani ga al’umma.
A nasa jawabin, Kodinetan Yankin FIIRO, Dakta Ajani Sakirdeen, ya ce cibiyar ta zaɓi PAWECA a matsayin babbar abokiyar hulɗa saboda muhimmancin rawar da take takawa wajen rage talauci da samar da aikin yi.
Ya ce FIIRO na gudanar da bincike kan albarkatun ƙasa, tare da samar da fasahohi da na’urori da ke taimakawa sarrafa abinci da kayayyakin noma, da kuma ƙirƙirar hanyoyin samar da masana’antu a matakin gwaji.
Sakirdeen ya ƙara da cewa cibiyar na kuma tallafa wa masana’antun cikin gida wajen amfani da sabbin fasahohi, tare da bayar da shawarwari da nazarin yiwuwar aiwatar da ayyukan kasuwanci.
Ya yaba wa Dakta Zira bisa jajircewarsa a aikin gwamnati da kuma yadda ya karɓi tawagar cikin mutunci.
