01/12/2025
बुहारीको शंकास्पद मृ'त्यु: जनकपुरधाममा ससुरा पक्राउ, माइतीपक्षले लगाए ह'त्या आरोप
जनकपुरधाम। जनकपुरधाम उपमहानगरपालिका-४ कटैयाचौरी निवासी २७ वर्षीया रोशनी झाको शंकास्पद मृत्युको घटनामा प्रहरीले उनका ससुरा रुद्रनारायण मिश्रलाई नियन्त्रणमा लिएको छ। रोशनीको माइतीपक्षले उनको हत्या भएको आरोप लगाएपछि प्रहरीले अनुसन्धानका लागि मिश्रलाई पक्राउ गरेको हो।
बिहीबार राति ससुरालीमै रोशनीको रहस्यमय मृत्यु भएको थियो। घर पक्षले रोशनी भर्याङबाट लडेर सिकिस्त भएकी र उपचारको क्रममा गोदाबरी अस्पतालमा चिकित्सकले मृत घोषणा गरेको दाबी गरेको छ। तर, माइतीपक्षले भने रोशनीका श्रीमान् प्रशान्त मिश्र, ससुरा रुद्रनारायणलगायतका आफन्तले घाँटी थिचेर हत्या गरेको आरोप लगाएका छन्।
माइतीपक्षले ससुराली पक्षले सुरुमा ‘आत्महत्या’ भनेर पन्छिन खोजेको र हत्याको प्रमाण नष्ट पार्न घटनास्थलमा कपडा तथा अन्य सामान जलाएको दाबीसमेत गरेको छ। रोशनीका मामा पंकज झाका अनुसार घटनास्थलमा जलाइएका अवशेषहरू फेला परेका छन् भने आरोपीहरूले पटक-पटक आफ्नो अभिव्यक्ति परिवर्तन गरेका छन्।
प्रहरीको प्रारम्भिक अनुसन्धानले पनि घटनालाई शंकास्पद मानेको छ। पीडित परिवारले रोशनीका श्रीमान् प्रशान्त, डा. धिरज झा, प्रशान्तकी बहिनी र भिनाजुले प्रमाण नष्ट गर्न भूमिका खेलेको आरोप लगाउँदै किटानी जाहेरी दिने तयारी गरिरहेका छन्।
चौतर्फी दबाबपछि घटनाको अनुगमन गर्न घटनास्थल पुगेका एसपीले घरमै रहेका रोशनीका ससुरा रुद्रनारायण मिश्रलाई नियन्त्रणमा लिएको स्रोतले जनाएको छ। माइतीपक्षले रोशनीको हत्यारालाई कडा कारबाही र न्याय दिलाउन प्रहरीसँग माग गरिरहेका छन्।
