13/08/2026
देउवाको सन्देश : कांग्रेसलाई एकताबद्ध बनाउँदै पुस्तान्तरण र सुधारमा जोड
काठमाडौं — नेपाली कांग्रेसका सभापति शेरबहादुर देउवाले पार्टी र देशमा देखिएको पछिल्लो राजनीतिक परिस्थितिलाई आत्मसमीक्षा गर्दै कांग्रेसलाई थप एकताबद्ध, जिम्मेवार र जनमुखी बनाउने प्रतिबद्धता व्यक्त गरेका छन्।
स्वास्थ्य उपचारपछि सार्वजनिक सन्देश जारी गर्दै देउवाले युवापुस्ताको असन्तुष्टि र आवाजलाई गम्भीरतापूर्वक लिनुपर्ने बताएका छन्। उनले युवाले चाहेको परिवर्तनलाई आत्मसात् गर्दै युवा सहभागिता, नेतृत्व हस्तान्तरण र पुस्तान्तरणलाई सहज बनाउने धारणा राखेका छन्।
देउवाले नेपाली कांग्रेस लोकतन्त्र, राष्ट्रियता र संविधानको संरक्षणका लागि निरन्तर संघर्ष गर्दै आएको उल्लेख गर्दै वर्तमान संविधान लामो राजनीतिक संघर्षको उपलब्धि भएकाले यसको संरक्षण र आवश्यक सुधार राष्ट्रिय सहमतिका आधारमा गर्नुपर्ने बताएका छन्।
उनले पार्टीभित्र निराश भएका नेता–कार्यकर्तालाई पुनः एकताबद्ध भएर अघि बढ्न आग्रह गर्दै विगतका कमजोरी स्वीकारेर आत्मसमीक्षा र सुधारको यात्रालाई निरन्तरता दिने प्रतिबद्धता जनाएका छन्।
सन्देशमा देउवाले राष्ट्रिय एकता, लोकतन्त्र, नागरिक अधिकार, संविधान र कानुनी शासनलाई केन्द्रमा राखेर देश निर्माणमा सबै पक्ष मिलेर अघि बढ्नुपर्नेमा जोड दिएका छन्। उनले आफ्नो राजनीतिक जीवनका अनुभव नयाँ पुस्तालाई हस्तान्तरण गर्दै नागरिकको सर्वोपरि हितमा काम गर्ने प्रतिबद्धता पनि व्यक्त गरेका छन्।
