04/06/2026
Nagpahigayon ang Municipal Peace and Order Council (MPOC) ug Municipal Anti-Drug Abuse Council (MADAC) sa Tubod og planning workshop alang sa paghimo sa Peace and Order and Public Safety (POPS) Plan 2027 niadtong Hunyo 3, 2026 sa DILG Office, Tubod.
Gitambongan kini sa mga representante gikan sa Philippine National Police (PNP), Armed Forces of the Philippines (AFP), Bureau of Fire Protection (BFP), Bureau of Jail Management and Penology (BJMP), Municipal Health Office (MHO), DILG, ug uban pang mga miyembro sa MPOC ug MADAC.
Tumong sa maong workshop ang pagrepaso sa kasamtangang kahimtang sa kalinaw, kahapsay, ug kaluwasan sa lungsod, pag-ila sa mga prayoridad nga isyu ug hagit nga kinahanglan matubag, ug pagplano sa mga estratehiya, programa, proyekto, ug kalihokan nga ipatuman sa umaabot nga tuig.
Lakip usab sa gitinguhang mab-ot sa kalihokan ang pag-andam ug paghuman sa draft sa POPS Plan 2027 nga ipresentar ug pagahimoon nga opisyal nga plano pinaagi sa Municipal Peace and Order Council.
Atol sa workshop, girepaso sa mga partisipante ang kasamtangang โฑ5 milyon nga badyet alang sa mga programa sa kalinaw, kahapsay ug kaluwasan, ug giila ang mga prayoridad nga isyu ug mga interbensyon nga kinahanglan ilakip sa POPS Plan 2027.
Gihisgutan usab ang panginahanglan sa pag-align sa mga programa sa mga requirements sa Seal of Good Local Governance (SGLG), Peace and Order Council Audit, Anti-Drug Abuse Council Audit, ug uban pang national assessment tools aron masiguro nga matubag sa lokal nga panggamhanan ang tanang gikinahanglang indicators.
Lakip sa mga gipunting nga prayoridad alang sa umaabot nga plano mao ang kampanya batok sa ilegal nga droga, pagpalig-on sa Barangay Intelligence Network (BIN), paglikay sa violent extremism, suporta sa mga Persons Deprived of Liberty (PDLs), road safety, fire safety, ug mga kalihokan nga may kalabutan sa environmental ug human security concerns.
Gisusi usab sa konseho ang mga kakulangan sa kasamtangang plano, lakip ang posibilidad sa pagbutang og badyet alang sa Closed-Circuit Television (CCTV) systems ug dugang suporta sa operasyon sa local jail aron mas mapalig-on ang public safety programs sa lungsod.
Gidasig usab ang matag ahensya nga magpasa og mga program proposals nga adunay klarong mga tumong, estratehiya, timeline, ug budgetary requirements nga nagsunod sa SMART principles o Specific, Measurable, Attainable, Realistic, ug Time-bound nga mga target.
Sumala sa mga opisyal, draft pa lamang ang gihimong plano ug pagahisgutan pa kini sa umaabot nga mga miting sa wala pa kini ipresentar kang Mayor Dionisio Y. Cabahug, Jr. ug sa Municipal Peace and Order Council alang sa pinal nga pag-apruba.
Pinaagi niini nga inisyatibo, nagpadayon ang LGU Tubod sa pagpalig-on sa mga programa ug polisiya nga nagtumong sa pagmintinar sa kalinaw, kahapsay, ug kaluwasan sa tanang mga lungsoranon.
