09/06/2026
"MAS MARANGAL PA ANG KARGADOR KAYSA NAKA-BARONG" — RETIRED GENERAL ROMEO POQUIZ
Nagkaroon ng panibagong bangayan sa social media matapos tawagin ni Senador Raffy Tulfo na mga "kargador" ang mga retiradong sundalo na kabilang sa tinaguriang Brave 18, kaugnay ng kanilang mga alegasyon sa umano'y kickback scheme sa mga flood control project.
Ang pahayag ni Tulfo ay tumutukoy sa umano'y papel ng ilang testigo sa pagbibitbit ng mga maleta na naglalaman ng pera, bagay na naging sentro ng kanilang mga testimonya sa isinagawang pagdinig sa Senado.
Bilang tugon, naglabas ng matapang na mensahe si retired Major General Romeo Poquiz sa pamamagitan ng isang quote card na ibinahagi sa social media. Sa naturang pahayag, iginiit niya na mas marangal pa ang isang kargador na kumikita sa pamamagitan ng marangal na paghahanapbuhay kaysa sa mga opisyal na nagsusuot ng barong at tinatawag na "Honorable" ngunit umano'y sangkot sa paglustay ng pondo ng bayan.
Ang naging komento ng retiradong heneral ay mabilis na kumalat online at nagdulot ng magkakaibang reaksiyon mula sa mga netizen, lalo na sa gitna ng nagpapatuloy na kontrobersiya tungkol sa mga alegasyon ng katiwalian sa flood control projects.
Samantala, nananatiling matatag si Atty. Levi Baligod, legal counsel ng Brave 18, sa paninindigang may sapat at matibay silang ebidensya upang suportahan ang mga paratang na kanilang inilahad laban sa mga sangkot sa umano'y anomalya.
Patuloy namang inaabangan ng publiko ang mga susunod na pagdinig at mga posibleng bagong rebelasyon kaugnay ng isyung patuloy na umiinit sa Senado at sa social media. Ctto:
