26/09/2026
URANIUM-BEARING MINERALS, NATUKLASAN SA LARAP, CAMARINES NORTE
JOSE PANGANIBAN, Camarines Norte - Natukoy ng mga Pilipinong siyentista ang uranium-bearing minerals sa Bessemer, Larap, Jose Panganiban, Camarines Norte, kasabay ng matagumpay na laboratory testing ng proseso para mapataas ang konsentrasyon ng uranium sa nakuhang materyal.
Isinagawa ang pag-aaral ng mga mananaliksik mula sa Department of Science and Technology-Philippine Nuclear Research Institute (DOST-PNRI), University of the Philippines Diliman, at Akita University sa Japan.
Kinumpirma ng mga mananaliksik na uraninite ang pangunahing mineral na naglalaman ng uranium sa mga surface deposit na sinuri. Mula sa orihinal na materyal na may 244 parts per million (ppm) ng uranium, napataas ito sa 305 ppm gamit ang kombinasyon ng flotation at magnetic separation, habang nasa 73 porsyento ng uranium ang na-recover sa final product.
Gayunman, nilinaw ng mga mananaliksik na ang nabuong materyal ay hindi pa yellowcake at hindi rin nuclear fuel. Kailangan pa itong sumailalim sa karagdagang proseso gaya ng leaching at purification upang makagawa ng uranium concentrate.
Samantala, hindi pa rin natutukoy ng pag-aaral kung gaano karami ang uranium na matatagpuan sa ilalim ng Larap. Surface deposits lamang ang sinuri kaya hindi pa matukoy ang lalim, kapal, at lawak ng uranium-bearing zones sa ilalim ng lupa.
Kailangan pa ng mas detalyadong geological, radiometric, at geophysical surveys, gayundin ng systematic drilling at pagsusuri sa drill cores upang matukoy ang aktuwal na laki at uranium content ng deposito.
Kung makapagtatala ng makabuluhang uranium resource ang mga susunod na pagsusuri, kakailanganin pa ring pag-aralan ang economic viability ng pagmimina at processing, environmental at radiological impacts, regulatory requirements, at epekto nito sa mga komunidad bago isaalang-alang ang anumang development.
May iba pang potensyal na mineral na nakita sa materyal, kabilang ang copper, molybdenum, at magnetite, na nahiwalay din sa isinagawang laboratory process.
Dumating ang pag-aaral habang pinag-aaralan ng Pilipinas ang posibleng paggamit ng nuclear power bilang bahagi ng energy mix ng bansa. Sa ilalim ng Philippine Energy Plan, target ng pamahalaan ang hindi bababa sa 1,200 megawatts ng nuclear power capacity pagsapit ng 2032.
Binigyang-diin naman ng mga mananaliksik na hindi nangangahulugan ang pag-aaral na handa na ang Pilipinas na gumawa ng sarili nitong nuclear fuel. Sa halip, nagbibigay ito ng karagdagang impormasyon tungkol sa uranium mineralization sa bansa, sa mga prosesong maaaring gamitin upang mapataas ang uranium concentration, at sa mga susunod pang hakbang upang matukoy kung karapat-dapat itong sumailalim sa mas malawak na exploration.
Ang pag-aaral na pinamagatang “Integrated magnetic separation-flotation process for uranium preconcentration from Cu–Mo sulfidic and magnetite-bearing sample” ay inilathala sa 2026 Special Issue on Nuclear Science and Technology ng SciEnggJ. Pinondohan ito sa pamamagitan ng DOST Grants-in-Aid Program sa ilalim ng NuCycle Program-NuMER Project at isinagawa ng UP Diliman Department of Mining, Metallurgical and Materials Engineering at DOST-PNRI.
(Source: Techwatchph)
