18/08/2026
KBP NAGPAHANUMDOM SANG RESPONSIBLE REPORTING SA SCHOOL SHOOTING SA ZAMBOANGA CITY
by: Reynold Arca
Nagpagwa sang statement ang Kapisanan ng mga Brodkaster ng Pilipinas ukon KBP parte sa responsable nga pagreport kag pagsunod sa kasuguan kasunod sang insidente sang school shooting sa Zamboanga City kaina sang aga, Martes, Agosto 18, 2026.
Ginpahanumdoman sang KBP ang tanan nga news outlets, journalists, content creators kag social media users nga kinahanglan unahon ang dignidad kag mga kinamatarong sang tawo, ilabi na gid ang mga menor de edad, kaysa sa views, likes ukon pauna una sa pagpagwa sang balita.
Suno sa KBP, ang pagprotekta sa human dignity kag rights sang mga menor de edad kinahanglan may absolute precedence ukon pinakauna nga konsiderasyon sa pagreport sang amo nga mga sensitibo nga insidente.
Ginpahanumduman man ang mga nagabalita nga mangin responsable sa pagkuha kag pagpagwa sang impormasyon, ilabi na sa mga detalye nga mahimo makahatag sang dugang nga trauma ukon makalapas sa privacy kag mga kinamatarong sang mga biktima kag ila pamilya.
Ginpahanumdom sang KBP nga ang responsibilidad sang media indi lamang ang paghatag sang balita nga madasig, kundi ang pagreport sini nga husto, responsable kag may respeto sa dignidad sang mga apektado.
