07/08/2026
Nabungkag sa mga awtoridad ang usa ka dako nga network sa ilegal nga droga sa Central Mindanao human nasakmit ang gibanabanang usa ka kilo nga gidudahang shabu nga nagkantidad og ₱6.8 milyones ug pagkasikop sa tulo ka suspetsado sa gihimong buy-bust operation sa Barangay Rosary Heights 3, Cotabato City, niadtong Huwebes, Agosto 6.
Ang malampusong operasyon gipangulohan sa Philippine Drug Enforcement Agency Regional Office–Bangsamoro Autonomous Region in Muslim Mindanao (PDEA RO-BARMM) pinaagi sa PDEA Maguindanao del Norte Provincial Office.
Giila sa mga awtoridad ang mga dinakpan pinaagi lamang sa ilang mga alyas nga silang "Bai/Nori," 44; "Bai," 32; ug "Tato," 36, nga pulos lumulupyo sa Cotabato City. Matod sa PDEA, nagkunsabo ang tulo sa pag-apod-apod sa ilegal nga droga sa Cotabato City ug sa mga silingang lungsod sa Maguindanao del Norte ug North Cotabato.
Gawas sa usa ka kilo nga shabu, narekober usab sa mga operatiba gikan sa mga suspek ang:
Duha ka cell phone
Usa ka itom nga minivan
Usa ka ATM card
Ang marked money nga gigamit sa operasyon
Tulo ka ID card
Duha ka opisyal nga resibo gikan sa LTO ug
Deed of sale sa nasakmit nga sakyanan.
Ang operasyon nahimong malampuson tungod sa hiniusang pwersa sa nagkadaiyang ahensya lakip ang City Intelligence Team–RIU 15, City Drug Enforcement Unit ug City Intelligence Unit sa Cotabato City Police Office, NICA-BARMM, PNP Drug Enforcement Group–SOU 15, HPG, ug Marine Battalion Landing Team 6.
Kasamtangang nagtingkagol na sa selda ang tulo ka suspek ug mag-atubang sa kasong paglapas sa Section 5 (Sale of Dangerous Drugs), Article II sa Republic Act No. 9165 o ang Comprehensive Dangerous Drugs Act of 2002.
