04/03/2026
March 3, 2026
Duha ka indibidwal ang nasikop sa buy-bust operation nga gipahigayon sa Purok 2, Barangay Lumbo, Valencia City, Bukidnon alas 11:07 sa gabii niadtong Marso 3, 2026.
Ang mga nadakpan giila sa mga awtoridad nga sila si alyas “Odin,” 21 anyos, residente sa Barangay Buklad, Tagum, Davao Oriental, ug alyas “Joar,” 24 anyos, residente sa Barangay Lumbo, Valencia City. Ang operasyon gipangulohan sa Valencia City Police Station, uban sa suporta sa City Anti-Drugs Special Unit Team (CADSUT) ubos sa opisina sa City Mayor ug koordinasyon sa Provincial Intelligence Unit (PIU) sa Bukidnon Police Provincial Office. Ang operasyon gihimo pinasikad sa PDEA Pre-Operation Number 11-00-03032026-043.
Nakompiskar gikan sa mga suspek ang gituohang ilegal nga droga nga adunay gibanabanang kantidad nga ₱142,800. Ang mga nadakpan karon anaa na sa kustodiya sa Valencia City Police Station alang sa hustong disposisyon ug pagsang-at sa angay nga kaso batok kanila.
Padayon ang malig-on nga paningkamot sa Lokal nga Pangagamhanan sa Dakbayan sa Valencia ubos sa liderato ni Mayor Amie Galario, kauban ang Sangguniang Panlungsod nga gipangulohan ni Vice Mayor Greizl Galario-Fernandez, sa paghatag og suporta sa kapulisan ug sa pagpalig-on sa mga anti-drug operations aron masiguro ang kaluwasan ug kaayohan sa katawhan batok sa iligal nga droga.
Note: Dili dayon ipakita ang nawong o tinuod nga ngalan sa mga nadakpan aron maprotektahan ang ilang legal nga katungod ug privacy, samtang ginasiguro nga ang ipagawas nga impormasyon magpabilin nga factual ug neutral.
