25/08/2026
ضلعی سطح مقابلہ نعت خوانی ضلع اٹک
اٹک ( )جشنِ عید میلاد النبی ﷺ کی بابرکت مناسبت سے ڈپٹی کمشنر اٹک کی خصوصی ہدایات پر، ایڈمنسٹریٹر ضلع کونسل اٹک اور محکمۂ تعلیم کے زیرِ اہتمام ضلع اٹک میں ضلعی سطح کے شاندار مقابلۂ نعت خوانی کا انعقاد کیا گیا۔ اس روح پرور تقریب کی ایک نمایاں خصوصیت یہ رہی کہ ڈاکٹر محمد اظہر، چیف ایگزیکٹو آفیسر، ڈسٹرکٹ ایجوکیشن اتھارٹی اٹک کی جانب سے پوزیشن حاصل کرنے والے طلبہ و طالبات کے لیے اعلان کردہ مجموعی طور پر دو لاکھ روپے کے نقد انعامات بھی تقسیم کیے گئے۔ ڈاکٹر محمد اظہر کی خصوصی دلچسپی اور حوصلہ افزائی کا مقصد نوجوان نسل کے دلوں میں عشقِ رسول ﷺ کی شمع کو مزید فروزاں کرنا، دینی و اخلاقی اقدار کو مستحکم کرنا اور باصلاحیت طلبہ و طالبات کی بھرپور حوصلہ افزائی کرنا تھاتقریب کے مہمانِ خصوصی اسسٹنٹ کمشنر تحصیل اٹک عارف قریشی تھے، جبکہ ڈی ای او سیکنڈری جناب الطاف حسین، ڈپٹی ڈی ای اوز سیکنڈری جناب عابد خان اور جناب منیر احمد سمیت محکمۂ تعلیم کے افسران، اساتذہ اور طلبہ و طالبات نے بڑی تعداد میں شرکت کی۔ نعتِ رسولِ مقبول ﷺ کی پُرسوز صداؤں نے تقریب کو ایک خوبصورت ، روحانی اور پُرنور ماحول عطا کیا۔ضلعی مقابلے میں ضلع اٹک کی تمام تحصیلوں سے 18 طلبہ اور 18 طالبات، مجموعی طور پر 36 شرکاء نے حصہ لیا۔ یہ تمام طلبہ و طالبات اپنے اپنے تحصیل سطح کے مقابلوں میں نمایاں کامیابی حاصل کرنے کے بعد ضلعی سطح تک پہنچے تھے، جس کے باعث مقابلہ نہایت معیاری، دلچسپ اور مسابقتی رہا۔مقابلے میں طلبہ اور طالبات کی دونوں کیٹیگریز کے لیے علیحدہ علیحدہ ایک لاکھ روپے کے نقد انعامات مقرر کیے گئے تھے۔ ہر کیٹیگری میں پہلی پوزیشن کے لیے 50 ہزار روپے، دوسری پوزیشن کے لیے 30 ہزار روپے جبکہ تیسری پوزیشن کے لیے 20 ہزار روپے کا نقد انعام رکھا گیا۔طلباء کیٹیگری کے نتائج پہلی پوزیشن نشیمن عباس گورنمنٹ ہائی سکول نمبر 1 جنڈ 50,000 روپے، دوسری پوزیشن علی وارث گورنمنٹ ہائی سکول نمبر 1، فتح جنگ 30,000 روپے، تیسری پوزیشن محمد حسنین گورنمنٹ اسلامیہ ہائی سکول اٹک20,000 روپےجبکہ طالبات کیٹیگری کے نتائج
پہلی پوزیشن دیا رباب ٹیکنیکل کالج، اٹک 50,000 روپے، دوسری پوزیشن علیشہ بی بی، گورنمنٹ گرلز ہائی سکول نمبر 2، اٹک30,000 روپے، تیسری پوزیشن کشف زہرہ گورنمنٹ گرلز ہائی سکول نمبر 2فتح جنگ 20,000 روپے
مقابلے کے انعقاد اور انتظامی امور کو بہترین انداز میں پایۂ تکمیل تک پہنچانے میں جناب مہتاب حسین ملک، ایجوکیشن آفیسر، اور جناب علی حسن، ہیڈماسٹر گورنمنٹ ہائی سکول شکردرہ نے بطور آرگنائزر اہم کردار ادا کیا۔ ان کی محنت اور بہترین انتظامی صلاحیتوں کے باعث پروگرام کو نظم و ضبط، شفافیت اور حسنِ انتظام کے ساتھ منعقد کیا گیا۔تقریب کے اختتام پر نمایاں پوزیشنیں حاصل کرنے والے طلبہ و طالبات میں ڈاکٹر محمد اظہر، چیف ایگزیکٹو آفیسر ڈسٹرکٹ ایجوکیشن اتھارٹی اٹک کی جانب سے اعلان کردہ نقد انعامات اور اعزازات تقسیم کیے گئے۔ اس موقع پر کامیاب طلبہ و طالبات کو مبارکباد پیش کرتے ہوئے اساتذہ، والدین اور منتظمین کی کاوشوں کو بھی بھرپور انداز میں سراہا گیا۔یہ شاندار، روح پرور اور بابرکت تقریب نہ صرف جشنِ عید میلاد النبی ﷺ کی خوشیوں کو دوبالا کرنے کا ذریعہ بنی بلکہ ضلع اٹک کے تعلیمی اداروں میں عشقِ رسول ﷺ، سیرتِ طیبہ ﷺ سے وابستگی، دینی و اخلاقی تربیت اور مثبت تخلیقی سرگرمیوں کے فروغ کی ایک خوبصورت مثال بھی ثابت ہوئی۔ ایسے پروگرام نوجوان نسل کی صلاحیتوں کو نکھارنے کے ساتھ ان کے دلوں میں محبتِ رسول ﷺ کی وہ روشنی پیدا کرتے ہیں جو کردار سازی اور بہترین معاشرے کی بنیاد بنتی ہے۔
