12/09/2025
ڈیرہ اسماعیل خان: پرائیویٹ سکول ایسوسی ایشن کی پریس کانفرنس، نتائج میں بے ضابطگیوں کا الزام
ڈیرہ اسماعیل خان میں پرائیویٹ سکول ایسوسی ایشن نے پریس کانفرنس کرتے ہوئے بورڈ امتحانات میں بے ضابطگیوں اور شفافیت کی کمی پر شدید تحفظات کا اظہار کیا ہے۔ رہنماؤں نے الزام عائد کیا کہ ایسے طلبہ جو 95 فیصد نمبر کے حقدار تھے، ان کے مارکس کم کر کے 80 فیصد تک محدود کر دیے گئے، جس سے ہونہار طلبہ کے مستقبل کو نقصان پہنچایا گیا۔
پریس کانفرنس میں بتایا گیا کہ نتائج کو اس طرح سے ظاہر کیا گیا کہ مجموعی اگریگیٹ مثبت دکھائی دے، لیکن اصل مارکس جان بوجھ کر کم کیے گئے۔ اس حوالے سے والدین اور طلبہ سخت ذہنی دباؤ کا شکار ہیں۔
ایسوسی ایشن نے اپنے تین نکاتی مطالبات پیش کیے:
طلبہ کو ان کے پیپرز شو کیے جائیں تاکہ نتائج کی شفافیت یقینی ہو۔ٹاپر طلبہ کے پیپرز بورڈ کی ویب سائٹ پر اپ لوڈ کیے جائیں۔ فیس کم کی جائے، جیسا کہ پشاور بورڈ میں 600 روپے ہے لیکن ڈیرہ بورڈ میں 800 روپے وصول کی جا رہی ہے۔
رہنماؤں نے کہا کہ نتائج پر اعتراضات اٹھانے کے بعد 48 گھنٹے گزر گئے لیکن بورڈ حکام کی جانب سے صرف دعوے اور بیانات سامنے آئے، کوئی عملی اقدام نہیں کیا گیا۔ ان کا کہنا تھا کہ اگر دو دن کے اندر ایگزیکٹو آرڈر جاری نہ کیا گیا تو پرائیویٹ سکول ایسوسی ایشن وزیراعلیٰ اور گورنر خیبر پختونخوا سے رجوع کرے گی اور طلبہ کے حق کے لیے ہر فورم پر آواز بلند کی جائے گی۔
ایسوسی ایشن نے وزیراعلیٰ اور گورنر خیبر پختونخوا سے مطالبہ کیا کہ وہ معاملے کا فوری نوٹس لیں اور بورڈ حکام کو ہدایت کریں کہ دو دن کے اندر اندر اس مسئلے کو حل کیا جائے، بصورت دیگر احتجاجی تحریک چلانے کا اعلان کیا گیا ہے۔
