Aanch News, Karachi (2026)

22/05/2026

سونے کی قیمت میں بڑا اضافہ
سونے کی قیمت میں بڑا اضافہ ہوا ہے۔ ہزاروں روپے کے یکمشت اضافے سے سونے کی فی تولہ قیمت 4 لاکھ 75 ہزار کی بلند سطح پر پہنچ گئی جبکہ جمعرات کو جاری کردہ سونے کے یہ نرخ آج دوپہر تک برقرار رہیں گے۔آل پاکستان صرافہ جیمز اینڈ جیولرز ایسوسی ایشن کے مطابق جمعرات 21 مئی 2026 کو 24 قیراط سونے کی فی تولہ قیمت میں 5 ہزار روپے کا اضافہ ہوا، جس کے بعد نئی قیمت 4 لاکھ 75 ہزار 362 روپے ہو گئی ہے۔اسی طرح 24 قیراط کے حامل 10 گرام سونے کی قیمت میں 4 ہزار 287 روپے اضافہ دیکھا گیا، جس کے بعد نئی قیمت 4 لاکھ 7 ہزار 546 روپے ہو گئی۔ جبکہ 22 قیراط کے حامل 10 گرام سونے کی قیمت 3 ہزار 930 روپے اضافے کے بعد 3 لاکھ 73 ہزار 597 روپے کی سطح پر پہنچ گئی۔

دوسری جانب چاندی کی قیمتوں میں بھی اضافہ ہوا ہے۔ 24 قیراط چاندی کی فی تولہ قیمت 60 روپے بڑھ کر 8 ہزار 34 روپے ہو گئی، جبکہ 10 گرام چاندی 51 روپے اضافے کے بعد 6 ہزار 887 روپے پر پہنچ گئی۔بین الاقوامی مارکیٹ میں بھی سونے کی قیمت میں اضافہ دیکھا گیا، جہاں فی اونس سونا 50 ڈالر اضافے کے بعد 4 ہزار 530 ڈالرز کا ہو گیا۔ اسی طرح چاندی کی عالمی قیمت میں 0.60 ڈالر اضافہ ہوا.جس کے بعد نئی قیمت 75.50 ڈالرز کی سطح پر آ گئی۔

22/05/2026

مومنہ اقبال کی شادی کی تاریخ سامنے آ گئی
پاکستانی شوبز انڈسٹری کی معروف اداکارہ مومنہ اقبال کی شادی کی تاریخ سامنے آ گئی۔

گزشتہ کچھ دنوں سے سوشل میڈیا پر مومنہ اقبال کی شادی کی خبریں گردش کر رہی تھیں اور اب اداکارہ کی بہن رمشا اقبال نے ان خبروں کی تصدیق کر دی ہے۔

شادی سے قبل اداکارہ اس وقت اپنی زندگی کے ایک مشکل وقت کا سامنا کر رہی ہیں اور حال ہی میں انہوں نے انکشاف کیا ہے کہ ایک بااثر سیاسی شخصیت کی جانب سے اُنہیں اور ان کی فیملی کو جان سے مارنے کی دھمکیاں دی جا رہی ہیں۔

مومنہ اقبال نے اس حوالے سے ایک انسٹا اسٹوری بھی شیئر کی تھی جس کے بعد محکمۂ پولیس نے فوری کارروائی کی اور اب امید ہے کہ یہ معاملہ جلد حل ہو جائے گا۔

مومنہ اقبال کے کیس کی پیروی ان کی بہن رمشا اقبال کر رہی ہیں جو کہ پیشے سے وکیل ہیں۔

حال ہی میں رمشا اقبال نے کیس میں ہونے والی پیشرفت کے حوالے سے میڈیا سے بات کرتے ہوئے اداکارہ کی شادی کے بارے میں بھی بتایا۔

اُنہوں نے بتایا کہ کیس میں کارروائی کے دوران جواب مثبت تھا، حمایت کرنے پر میڈیا کا شکریہ، ہم نے تمام ثبوت فراہم کر دیے ہیں، ایم پی اے کو بھی بلایا گیا ہے۔

رمشا اقبال نے بتایا کہ ہم اس معاملے کو میڈیا پر زیادہ اجاگر نہیں کرنا چاہتے، ہم نے مشکلات کا سامنا کیا لیکن حمایت بھی حاصل ہوئی اور حکومت کی طرف سے سیکیورٹی بھی ملی۔

اُنہوں نے بتایا کہ مومنہ اقبال کے سسرال والوں کو بھی سیکیورٹی فراہم کی گئی، کیونکہ اُنہیں بھی دھمکیاں دی گئی ہیں، مومنہ کی شادی محمد حمزہ حبیبی سے ہو رہی ہے اور نکاح یکم جون کو ہو گا، یہ شادی خاندان کی رضا مندی سے طے ہوئی ہے اور مومنہ کے ہونے والے شوہر ہمارے رشتے دار نہیں ہیں۔

رمشا اقبال نے بتایا کہ مومنہ اقبال کا کیس میں لڑوں گی، میں نے بیرونِ ملک سے وکالت کی ڈگری مکمل کی ہے اور مجھے پاکستان میں قانون کا تجربہ بھی ہے۔

22/05/2026

انمول پنکی کے مبینہ شوہر رانا محمد اکرم کے خلاف مقدمہ درج کرنے کا حکم
لاہور : انمول پنکی کے مبینہ شوہر رانا محمد اکرم کے خلاف مقدمہ درج کرنے کا حکم دے دیا گیا ، سابق پولیس افسر پر گھر میں غیر قانونی چھاپہ مارنے اور زبردستی داخل ہونے کا الزام ہے۔

تفصیلات کے مطابق لاہور کی سیشن عدالت نے ایک بڑا حکم جاری کرتے ہوئے انمول عرف پنکی کے مبینہ شوہر آرگنائزڈ کرائم یونٹ کے سابق ڈی ایس پی رانا محمد اکرم کے خلاف فوری طور پر ایف آئی آر درج کرنے کا حکم دے دیا ہے۔

عدالت نے خاتون یاسمین تبسم کی درخواست پر متعلقہ ایس ایچ او کو قانون کے مطابق سخت کارروائی کی ہدایت کی ہے۔

متاثرہ خاتون یاسمین تبسم نے عدالت میں دائر درخواست میں سابق پولیس افسر پر انتہائی سنگین الزامات عائد کیے ہیں۔

درخواست میں سابق ڈی ایس پی رانا محمد اکرم پر مبینہ طور پر گھر میں غیر قانونی طریقے سے داخل ہونے اور چادر و چار دیواری کا تقدس پامال کرتے ہوئے چھاپہ مارنے کا الزام ہے۔

اس کے ساتھ سابق پولیس افسر پر شہریوں کو غیر قانونی حراست میں رکھنے اور گھر سے 55 لاکھ روپے مالیت کا قیمتی سامان زبردستی لے جانے کے سنگین الزامات بھی عائد کیے گئے ہیں۔

سیشن عدالت کے معزز جج نے تحریری حکم نامے میں واضح کیا کہ سی سی پی او آفس اور انٹرنل اکاؤنٹیبلٹی بیورو کی رپورٹس میں بھی سابق ڈی ایس پی کی جانب سے کی جانے والی بے ضابطگیوں کی واضح نشاندہی کی گئی ہے۔

دورانِ سماعت سابق پولیس افسر کے وکیل کی جانب سے ریٹائرمنٹ کا عذر پیش کیے جانے پر عدالت نے تاریخی ریمارکس دیتے ہوئے کہا "ریٹائرمنٹ کسی بھی شخص کے خلاف لگائے گئے الزامات کی قانونی حیثیت کو ختم نہیں کرتی۔”

عدالت نے اپنے فیصلے میں مزید لکھا کہ مدعیہ کی شکایت میں قابلِ دست اندازی پولیس جرائم کے واضح اور پکے عناصر موجود ہیں، لہٰذا پولیس فوری طور پر قانون کے مطابق کارروائی عمل میں لائے۔

22/05/2026

پنجاب حکومت کا سی سی ڈی کے حوالے سے بڑا فیصلہ
پنجاب حکومت نے بڑا فیصلہ کیا ہے، غیرت کے نام پر قتل کے کیسز کی تحقیقات اب سی سی ڈی کرے گی۔

پنجاب حکومت نے کرائم کنٹرول ڈیپارٹمنٹ (سی سی ڈی) کے دائرہ کار کو مزید وسیع کرنے کا فیصلہ کیا ہے، جس کے تحت اب صوبے میں غیرت کے نام پر ہونے والے قتل کے تمام واقعات کی تفتیش یہ کونسل یا محکمہ کرے گا۔

ذرائع کے مطابق حکومت کے نئے فیصلے کے تحت اب پنجاب بھر میں غیرت کے نام پر قتل کا ہر واقعہ باقاعدہ طور پر سی سی ڈی کے حوالے کیا جائے گا تاکہ ان ہائی پروفائل کیسز کی شفاف اور جاندار طریقے سے تحقیقات کو یقینی بنایا جا سکے۔

واضح رہے کہ اس سے قبل سی سی ڈی کا دائرہ کار صرف منظم جرائم، عادی مجرمان کی سرگرمیوں اور منشیات کے بڑے کیسز تک محدود تھا، تاہم اب اس میں غیرت کے نام پر قتل جیسے سنگین سماجی جرم کو بھی شامل کر لیا گیا ہے۔

22/05/2026

کوکین کوئین پنکی کیس، پنجاب میں دو بڑی گرفتاریاں
اینٹی نارکوٹکس فورس (اے این ایف) نے بدنام زمانہ ‘کوکین کوئین پنکی’ کیس میں تفتیش کا دائرہ وسیع کرتے ہوئے پنجاب سے دو اہم ملزمان کو گرفتار کر لیا ہے۔

ذرائع کے مطابق اے این ایف کے ہاتھوں گرفتار ہونے والے یہ دونوں ملزمان غیر ملکی ہیں جن کا تعلق نائیجیریا سے بتایا جاتا ہے۔ ابتدائی معلومات کے مطابق گرفتار کیے گئے دونوں غیر ملکی ملزمان لاہور کے ایک بڑے ڈرگ نیٹ ورک سے منسلک تھے اور صوبے میں منشیات کی سپلائی میں ملوث تھے۔

ذرائع کا مزید کہنا ہے کہ یہ گرفتاریاں مرکزی ملزمہ پنکی کے موبائل فون سے حاصل ہونے والے ڈیٹا اور اہم معلومات کی روشنی میں عمل میں لائی گئی ہیں، جس کے بعد اس ہائی پروفائل کیس میں تفتیش کا دائرہ مزید وسیع کر دیا گیا ہے۔

اے این ایف نیٹ ورک سے جڑے دیگر ملزمان کی گرفتاری کے لیے بھی چھاپے مار رہی ہے۔

22/05/2026

کراچی میں قربانی کا جانور خریدنے کے لیے جانے والا شہری لٹ گیاشہر قائد میں قربانی کا جانور خریدنے کے لیے جانے والا شہری لٹ گیا، مزاحمت کرنے ڈکیت نے تیز دھار آلے کے وار سے زخمی کردیا۔

کراچی میں عیدِ قربان کے قریب آتے ہی اسٹریٹ کرمنلز سرگرم ہو گئے ہیں۔ گزشتہ روز لانڈھی کے علاقے اسماعیل گوٹھ کے قریب قربانی کا جانور خریدنے کے لیے جانے والے ایک شہری سے لاکھوں روپے لوٹ لیے گئے اور مزاحمت کرنے پر ملزمان نے تیز دھار آلے کے وار کر کے شہری کو زخمی کر دیا۔

متاثرہ شہری کے مطابق وہ رقم لے کر جا رہا تھا کہ موٹر سائیکل پر سوار دو ملزمان نے اسے گھیر لیا اور اس سے 2 لاکھ 80 ہزار روپے کی نقدی چھین لی۔

شہری نے بتایا کہ جب اس نے مزاحمت کی تو ملزمان نے اس پر فائرنگ کرنے کی کوشش کی لیکن خوش قسمتی سے گولی نہیں چلی۔ اس کے بعد ملزمان نے اپنے پاس موجود تیز دھار آلے سے اس پر وار کر دیا، جس سے وہ زخمی ہو گیا۔

شہری نے پولیس کے رویے پر شدید مایوسی کا اظہار کرتے ہوئے بتایا کہ انہوں نے واقعے کے فوری بعد پولیس ہیلپ لائن پر کال کی، جس پر لانڈھی تھانے کی پولیس موقع پر پہنچی۔

تاہم پولیس اہلکاروں نے یہ کہہ کر کوئی بھی قانونی کارروائی کرنے سے انکار کر دیا کہ یہ علاقہ ان کی حدود میں نہیں آتا، حالانکہ واردات کی جگہ پر خود لانڈھی تھانے کی حدود کا بورڈ آویزاں تھا۔

متاثرہ شہری کا مزید کہنا تھا کہ انہوں نے حدود کے اسی تنازع کی وجہ سے شرافی گوٹھ تھانے سے رابطہ نہیں کیا، کیونکہ انہیں ڈر تھا کہ وہ بھی یہی کہہ کر ٹال دیں گے کہ یہ حدود ان کی نہیں بلکہ لانڈھی تھانے کی ہے۔ پولیس کی اس بے حسی کی وجہ سے زخمی شہری انصاف کے لیے دربدر ہے۔

22/05/2026

وزیراعظم شہباز شریف کل 4 روزہ تاریخی دورے پر چین روانہ ہوں گے
اسلام آباد: وزیراعظم شہباز شریف چار روزہ دورے پر کل چین روانہ ہوں گے، جہاں وہ پاک چین 75 سالہ تعلقات کی تکمیل کے تناظر میں کانفرنس میں شرکت کریں گے۔

تفصیلات کے مطابق وزیراعظم شہباز شریف پاک چین سفارتی تعلقات کی 75 ویں سالگرہ کے تاریخی موقع پر کل سے چین کا چار روزہ انتہائی اہم اور سرکاری دورہ کریں گے۔

اس دورے کا مقصد دونوں برادر ممالک کے مابین سدابہار اسٹریٹیجک شراکت داری، سی پیک کے دوسرے مرحلے اور تجارتی روابط کو نئی بلندیوں پر لے جانا ہے۔

چین کی وزارتِ خارجہ کے ترجمان گو جیا کُن نے وزیراعظم کے دورے کی تصدیق کرتے ہوئے پاکستان اور چین کو "سدابہار اسٹریٹیجک شراکت دار اور بہترین دوست” قرار دیا ہے۔

چینی ترجمان کا کہنا تھا کہ دونوں ملکوں نے ہمیشہ ہر امتحان کا ڈٹ کر مقابلہ کیا ہے اور سی پیک کے تحت باہمی تعاون کے بہترین نتائج حاصل ہوئے ہیں۔

انہوں نے امید ظاہر کی کہ اس دورے سے دونوں ممالک کی روایتی دوستی اور ہر شعبے میں تعاون مزید گہرا ہوگا۔

دورے کے دوران وزیراعظم شہباز شریف بیجنگ اور ہینگجو (صوبہ ژی جیانگ) کا دورہ کریں گے ، جہاں وزیراعظم بیجنگ میں چینی صدر شی جن پنگ اور اپنے چینی ہم منصب لی چیانگ سے الگ الگ ملاقاتیں کریں گے، جس میں باہمی دلچسپی کے امور اور علاقائی صورتحال پر تفصیلی گفتگو ہوگی۔

وزیراعظم پاک چین دوستی کے 75 سال مکمل ہونے کے تناظر میں منعقدہ خصوصی کانفرنس اور تقریب میں شرکت کریں گے۔

اس کے علاوہ وزیراعظم دورے کے دوران مشہور چینی کمپنی ’علی بابا‘ کے سربراہ سے بھی خصوصی ملاقات کریں گے۔

اس دورے کا ایک اہم ترین پہلو معاشی تعاون کو فروغ دینا ہے۔ دورے کے دوران ایک بڑی بزنس ٹو بزنس کانفرنس منعقد ہوگی جس میں پاکستان سے 80 سے زائد مایہ ناز کاروباری شخصیات اور کمپنیاں شرکت کر رہی ہیں۔

اس کانفرنس کے دوران دونوں ممالک کے کاروباری اداروں کے مابین تجارت اور سرمایہ کاری کے کئی اہم معاہدوں پر دستخط کیے جائیں گے۔

سیاسی ماہرین کے مطابق وزیراعظم شہباز شریف کا یہ دورہ نئے دور میں دونوں ممالک کے مشترکہ مستقبل کو ایک نئی سمت فراہم کرے گا اور اس سے پاکستان میں چینی سرمایہ کاری کے ایک نئے باب کا آغاز ہوگا۔

22/05/2026

سندھ میں خطرناک ہیٹ ویو کا الرٹ،
پارہ 50 ڈگری تک جانے کا خدشہ

محکمۂ موسمیات نے سندھ بھر میں شدید گرمی کی لہر کے حوالے سے الرٹ جاری کرتے ہوئے خبردار کیا ہے کہ 25 مئی سے بالائی فضا میں ہائی پریشر سسٹم بننے کے باعث صوبے کے بیشتر اضلاع شدید ہیٹ ویو کی لپیٹ میں آ سکتے ہیں۔

محکمۂ موسمیات کے مطابق 25 سے 31 مئی کے دوران سندھ کے مختلف علاقوں میں درجۂ حرارت معمول سے 4 سے 6 ڈگری سینٹی گریڈ زیادہ رہنے کا امکان ہے، جبکہ بعض شہروں میں پارہ 50 ڈگری سینٹی گریڈ تک پہنچ سکتا ہے۔

رپورٹ کے مطابق سکھر، شکار پور، جیکب آباد، لاڑکانہ اور دادو میں درجۂ حرارت 47 سے 50 ڈگری سینٹی گریڈ تک جانے کی پیشگوئی کی گئی ہے۔

اسی طرح شہید بینظیر آباد، خیر پور، گھوٹکی اور نوشہرو فیروز میں بھی شدید گرمی کی لہر متوقع ہے، جبکہ حیدر آباد، بدین، تھر پارکر، عمر کوٹ اور میر پور خاص میں پارہ 44 سے 47 ڈگری سینٹی گریڈ تک رہنے کا امکان ظاہر کیا گیا ہے۔

محکمۂ موسمیات نے بتایا ہے کہ مٹیاری، ٹنڈو محمد خان، جامشورو اور سانگھڑ میں بھی درجۂ حرارت 47 ڈگری سینٹی گریڈ تک پہنچ سکتا ہے۔

دوسری جانب کراچی میں آئندہ 3 روز کے دوران موسم گرم اور مرطوب رہنے کا امکان ہے۔

محکمۂ موسمیات کے مطابق آج شہرِ قائد کا زیادہ سے زیادہ درجۂ حرارت 36 ڈگری سینٹی گریڈ تک جا سکتا ہے، جبکہ ہفتے اور اتوار کو درجۂ حرارت 35 سے 37 ڈگری سینٹی گریڈ کے درمیان رہنے کی توقع ہے۔

ہیٹ ویو کے پیشِ نظر محکمۂ موسمیات نے شہریوں، خصوصاً بچوں، خواتین، بزرگوں اور بیمار افراد کو احتیاطی تدابیر اختیار کرنے کی ہدایت کی ہے، زمینداروں اور کسانوں کو بھی فصلوں اور مویشیوں کی خصوصی دیکھ بھال کرنے کی ہدایت کی ہے۔

22/05/2026

انمول پنکی کی آج جوڈیشل مجسٹریٹ کی عدالت میں پیشی ، سیکیورٹی کے سخت انتظامات
کراچی : کوکین کوئین انمول عرف پنکی کو مزید جسمانی ریمانڈ کیلئے آج جوڈیشل مجسٹریٹ کی عدالت میں پیش کیا جائے گا، جس کے پیش نظر سینٹرل جیل کے باہر سیکیورٹی سخت کردی گئی ہے۔

تفصیلات کے مطابق ’کوکین کوئین‘ کے نام سے جانی جانے والی ملزمہ انمول عرف پنکی کو جسمانی ریمانڈ ختم ہونے پر آج عدالت میں پیش کیا جائے گا۔

جہاں پولیس کی جانب سے ملزمہ کے خلاف درج سنگین مقدمات میں مزید جسمانی ریمانڈ کی استدعا کی جائے گی۔

ڈسٹرکٹ اینڈ سیشن جج جنوبی نے پولیس کی درخواست پر اہم فیصلہ سناتے ہوئے ملزمہ انمول عرف پنکی کو سٹی کورٹ لانے کے بجائے سینٹرل جیل میں قائم جوڈیشل کمپلیکس میں ہی جوڈیشل مجسٹریٹ کے سامنے پیش کرنے کی اجازت دے دی ہے۔

پولیس نے عدالت میں موقف اختیار کیا تھا کہ ملزمہ انتہائی ہائی پروفائل ہے اور اسے سٹی کورٹ میں پیش کرنا سیکیورٹی کے لحاظ سے شدید خطرے کا باعث بن سکتا ہے۔

اس درخواست پر درخشاں، گزری، گارڈن اور ڈیفنس تھانوں کی پولیس نے جوڈیشل کمپلیکس میں پیشی کی باقاعدہ اجازت طلب کی تھی، جسے عدالت نے منظور کر لیا۔

ملزمہ کی پیشی کے پیش نظر سینٹرل جیل کے باہر اور اطراف میں سیکیورٹی کے انتہائی سخت انتظامات کیے گئے ہیں۔ پولیس کی بھاری نفری تعینات ہے اور جیل کی طرف آنے جانے والی تمام گاڑیوں کی کڑی تلاشی لی جا رہی ہے۔

پولیس حکام کے مطابق ملزمہ اس وقت پولیس کی تحویل میں ہے اور آج عدالت میں تفتیشی افسران کی جانب سے کیس میں ہونے والی اب تک کی پیشرفت رپورٹ بھی پیش کی جائے گی۔ ملزمہ کے خلاف جرائم کی طویل فہرست ہے:

ملزمہ کے خلاف مختلف تھانوں میں 13 سے 16 سے زائد مقدمات درج ہیں ، جس میں منشیات کی بین الاقوامی اسمگلنگ اور سپلائی کے علاوہ قتل جیسے سنگین مقدمات شامل ہیں۔

ملزمہ کے خلاف شہر کے پوش اور دیگر علاقوں جن میں درخشاں، گزری، گارڈن، ڈیفنس اور بغدادی شامل ہیں، کارروائیاں اور مقدمات رجسٹرڈ ہیں۔

پولیس ذرائع کا کہنا ہے کہ ملزمہ سے منشیات نیٹ ورک کے حوالے سے اہم معلومات ملی ہیں، جس کی بنیاد پر نیٹ ورک کے دیگر کارندوں کی گرفتاری کے لیے آج عدالت سے مزید جسمانی ریمانڈ کی استدعا کی جائے گی۔

22/05/2026

دریائے چناب میں سیلاب کا خدشہ ،
ہائی الرٹ نافذ کر دیا گیا

سیالکوٹ: سلال ڈیم کے سپل وے گیٹس کھولنے سے دریائے چناب میں پانی کی سطح 3 میٹر تک بڑھنے کا امکان ہہے ، جس کے باعث ہائی الرٹ نافذ کر دیا گیا۔

تفصیلات کے مطابق سلال ڈیم کے سپل وے گیٹس کھولنے اور مرالہ بیراج پر سلٹ فلشنگ کے خدشے کے پیش نظر ضلعی انتظامیہ نے اہم فلڈ ایڈوائزری جاری کرتے ہوئے مرالہ بیراج اور ملحقہ علاقوں میں ہائی الرٹ نافذ کر دیا ہے۔

ڈپٹی کمشنر سیالکوٹ صبا اصغر علی نے کہا کہ سلال ڈیم کے سپل وے گیٹس کھولنے کی وجہ سے دریائے چناب میں پانی کی سطح 3 میٹر تک بلند ہونے کا امکان ہے۔ اس صورتحال کے پیش نظر مرالہ بیراج، بجوات اور اس کے ارد گرد کے تمام ملحقہ علاقوں کو ہائی الرٹ پر رکھ دیا گیا ہے۔

کسی بھی ممکنہ خطرے سے نمٹنے کے لیے ڈپٹی کمشنر نے درج ذیل ہنگامی احکامات جاری کردیے ہیں۔

جس میں کہا گیا کہ ہے کہ متعلقہ محکموں کو نہری نظام اور پانی کے بہاؤ کی 24 گھنٹے مسلسل نگرانی یقینی بنانے کی ہدایت کی گئی ہے ، بیراج گیٹس، ٹیلی میٹری سسٹم اور فلڈ سیفٹی کے تمام انتظامات کو فوری طور پر فعال کر دیا گیا ہے۔

صورتحال پر کڑی نظر رکھنے اور ہنگامی امداد کے لیے پیرا فورس کو بھی نگرانی کے خصوصی فرائض سونپ دیے گئے ہیں۔

پی ڈی ایم اے محکمہ موسمیات اور ضلعی اداروں کے درمیان رابطوں کو مزید مؤثر بنانے کی ہدایات جاری کی گئی ہیں۔

ڈپٹی کمشنر سیالکوٹ نے شہریوں سے اپیل کی ہے کہ وہ دریاؤں اور نہروں کے قریب غیر ضروری نقل و حرکت سے سخت گریز کریں۔

ضلعی سطح پر ڈسٹرکٹ ایمرجنسی کنٹرول روم کو مکمل طور پر فعال کر دیا گیا ہے, کسی بھی ہنگامی صورتحال یا معلومات کے حصول کے لیے شہری فوری طور پر متعلقہ نمبرز پر رابطہ کر سکتے ہیں۔

Aanch News

22/05/2026

22/05/2026

22/05/2026

22/05/2026

22/05/2026

22/05/2026

22/05/2026

22/05/2026

22/05/2026

22/05/2026

Address

Telephone

Website

Alerts

Contact The Business

Shortcuts

Share