20/08/2026
بورڈ امتحانی نظام کی شفافیت کی جانب اقدام
۔۔
پرائیویٹ ایجوکیشن نیٹ ورک جناب امتیاز ایوب صاحب، چیئرمین بورڈ آف انٹرمیڈیٹ اینڈ سیکنڈری ایجوکیشن کوہاٹ، کا تہہ دل سے شکر گزار ہے کہ نیٹ ورک کی جانب سے امتحانی نظام میں بہتری اور اصلاحات کے حوالے سے جو تجاویز ان کے سامنے رکھی گئیں، انہوں نے نہ صرف ان تجاویز کو سنجیدگی سے لیا بلکہ دن رات محنت اور خلوصِ نیت کے ساتھ انہیں عملی جامہ پہنانے کے لیے بھرپور اقدامات کیے۔
یہ امر ہمارے لیے باعثِ اطمینان ہے کہ چیئرمین کوہاٹ بورڈ کی جانب سے متعارف کرائی گئی متعدد اصلاحات کو اب وسیع پیمانے پر نافذ کرنے کی کوشش کی جا رہی ہے۔ آج سیکریٹری ایجوکیشن کی سطح پر بھی ان اصلاحات کو دیگر بورڈز تک منتقل اور Implement کیا جا رہا ہے، جو اس بات کا واضح ثبوت ہے کہ کوہاٹ بورڈ میں شروع کیے گئے اصلاحاتی اقدامات درست سمت میں ایک اہم پیش رفت ہیں۔
کوہاٹ بورڈ میں متعارف کرائی گئی اصلاحات، بالخصوص Show Papers کی Uploading، Practical Numbering میں شفافیت اور عملی امتحانات کی اہمیت کو دوبارہ اجاگر کرنا، یقیناً قابلِ تحسین اقدامات ہیں۔ جن شعبوں کی اہمیت وقت کے ساتھ کم ہوتی جا رہی تھی، ان کی اہمیت کو بحال کرنے اور انہیں شفاف و مؤثر بنانے کی کوشش ایک خوش آئند عمل ہے۔
ہم سمجھتے ہیں کہ امتحانی نظام میں حقیقی اصلاحات صرف نتائج بہتر بنانے کا نام نہیں بلکہ شفافیت، میرٹ، جواب دہی اور طلبہ کے مستقبل کے تحفظ کو یقینی بنانے کا نام ہے۔ اس حوالے سے چیئرمین کوہاٹ بورڈ جناب امتیاز ایوب صاحب کی کاوشیں ایک روشن اور بہتر تعلیمی مستقبل کی امید پیدا کرتی ہیں۔
پرائیویٹ ایجوکیشن نیٹ ورک ان اصلاحات کا خیرمقدم کرتا ہے اور امید رکھتا ہے کہ یہ اقدامات پورے صوبے میں امتحانی نظام کو مزید شفاف، مضبوط اور طلبہ دوست بنانے میں سنگِ میل ثابت ہوں گے۔
