01/02/2026
حيدرآباد:
حيدرآباد ليبر ڪورٽ نمبر 6 گذريل ٽن مهينن کان جج کان سواءِ هلندڙ هجڻ سبب پورهيتن لاءِ انصاف جو دروازو بند بڻيل آهي. جج جي مقرري نه ٿيڻ ڪري حيدرآباد ريجن جي سوين پورهيتن جا ڪيس دانسته طور رولڙي جو شڪار بڻايا ويا آهن، جنهن جو سڌو سنئون اثر هزارين غريب پورهيت خاندانن تي پئجي رهيو آهي.
ليبر ڪورٽ ۾ ٻڌڻي نه ٿيڻ سبب متاثر پورهيت گريجوئيٽي، پگهارن جا بقايا ۽ ٻيون قانوني مراعتون حاصل ڪرڻ کان محروم آهن. ڪيترائي پورهيت بيروزگاري جو شڪار بڻجي چڪا آهن، جڏهن ته سندن گهرن ۾ فاقاڪشي جهڙي المناڪ صورتحال پيدا ٿي چڪي آهي، پر وس وارا اختيارين اڃا تائين خاموش تماشائي بڻيل آهن.
پيپلز ليبر بيورو حيدرآباد ڊويزن جي جنرل سيڪريٽري، مزدور اڳواڻ ۽ وڪيل اڪبر ميمڻ ميڊيا سان ڳالهائيندي سخت لفظن ۾ چيو ته جيڪڏهن فوري طور ليبر ڪورٽ نمبر 6 ۾ جج جي مقرري نه ڪئي وئي ته اهو پورهيتن سان کليل ناانصافي هوندي. هن چيف جسٽس هاءِ ڪورٽ سنڌ ۽ ٻين ذميوار اختيارين کان مطالبو ڪيو ته هو پورهيتن جي صبر کي ڪمزوري نه سمجهن ۽ ترت قدم کڻن.
هوڏانهن متاثر پورهيتن سميت حيدرآباد ريجن جي مختلف مزدور فيڊريشنن جي اڳواڻن واضح چتاءُ ڏنو آهي ته جيڪڏهن هڪ هفتي اندر ليبر ڪورٽ نمبر 6 ۾ ايماندار، بي داغ ۽ پورهيت دوست جج مقرر نه ڪيو ويو ته حيدرآباد پريس ڪلب اڳيان احتجاجي ڪئمپ قائم ڪري سخت کان سخت احتجاج ڪيو ويندو، جنهن جي مڪمل ذميواري وس وارن اختيارين تي هوندي.
