03/08/2026
.گلشنِ داؤد، یونین کونسل 175،manawan پولیس ٹریننگ سینٹر سے ملحقہ علاقہ گزشتہ کافی عرصے سے شدید مسائل کا شکار ہے۔ سیوریج لائن بچھانے کے بعد تاحال گلیوں کی تعمیر نہیں کی گئی، جس کے نتیجے میں جگہ جگہ گہرے گڑھے بن چکے ہیں اور سڑک مکمل طور پر ٹوٹ پھوٹ کا شکار ہے۔
ان گڑھوں کی وجہ سے گاڑیوں، موٹر سائیکلوں، رکشوں اور ایمبولینس سمیت دیگر ضروری گاڑیوں کی آمد و رفت انتہائی دشوار ہو چکی ہے۔ بارش کے دوران یہ گڑھے پانی سے بھر جاتے ہیں، جس سے ان کی گہرائی کا اندازہ لگانا ممکن نہیں رہتا اور حادثات کا خطرہ کئی گنا بڑھ جاتا ہے۔ بچے، بزرگ، خواتین اور موٹر سائیکل سوار روزانہ شدید خطرات کا سامنا کرتے ہیں، جبکہ کسی بھی وقت جان و مال کا ناقابلِ تلافی نقصان ہو سکتا ہے۔
علاقہ مکینوں کو شدید گرد و غبار، کیچڑ، گندے پانی اور سیوریج سے متعلق مسائل کا بھی سامنا ہے، جس سے نہ صرف روزمرہ زندگی متاثر ہو رہی ہے بلکہ صحت عامہ کے مسائل بھی جنم لے رہے ہیں۔ شہریوں کو اپنے گھروں تک پہنچنے میں بھی شدید مشکلات پیش آ رہی ہیں، جبکہ گاڑیوں کو بھی مسلسل نقصان پہنچ رہا ہے۔
لہٰذا آپ سے پُرزور اپیل ہے کہ اس مسئلے کا فوری نوٹس لیتے ہوئے گلشنِ داؤد، یونین کونسل 175، ماناواں پولیس ٹریننگ سینٹر سے ملحقہ علاقے میں بلند سطح (Raised Level) پر معیاری PCC سڑک تعمیر کروائی جائے تاکہ بارش کے پانی کے جمع ہونے کا مسئلہ مستقل طور پر حل ہو، آمد و رفت محفوظ بنائی جا سکے اور کسی بھی ممکنہ جانی یا مالی نقصان سے قبل اس سنگین مسئلے کا مستقل حل نکالا جا سکے۔
اہلِ علاقہ آپ کی فوری توجہ اور عملی اقدام کے منتظر ہیں۔
