16/08/2026
بخدمت جناب ڈپٹی کمشنر صاحب ضلع اوکاڑہ
موضوع: دربار بالا پیر روڈ کی فوری تعمیر و بحالی کے لیے درخواست
جنابِ عالی!
باادب گزارش ہے کہ دربار بالا پیر روڈ جو متعدد دیہات اور علاقوں کو اوکاڑہ اور رینالہ خورد شہر سے ملانے والا ایک اہم اور واحد ذریعہ ہے گزشتہ تقریباً دس سال سے تعمیر و مرمت نہ ہونے کے باعث انتہائی خستہ حالی کا شکار ہے تقریباً 12 کلومیٹر طویل اس سڑک پر جگہ جگہ گہرے گڑھے پڑ چکے ہیں جس کے باعث شہریوں کو شدید سفری مشکلات کا سامنا ہے اور 12 کلومیٹر کا فاصلہ طے کرنے میں ڈیڑھ گھنٹے تک کا وقت لگ جاتا ہے
اس خراب سڑک سے روزانہ شہریوں، طلبہ و طالبات، مریضوں، سرکاری و نجی ملازمین اور دربار بالا پیر پر آنے والے زائرین کو گزرنا پڑتا ہے خصوصاً ایمرجنسی کی صورت میں ایمبولینس اور دیگر گاڑیوں کو شدید مشکلات پیش آتی ہیں جس سے مریضوں کو بروقت ہسپتال پہنچانے میں قیمتی وقت ضائع ہونے کا خدشہ رہتا ہے
سڑک کی خستہ حالی کے باعث حادثات کا خطرہ بھی ہر وقت موجود رہتا ہے جبکہ شہریوں کی گاڑیوں کو بھی نقصان پہنچ رہا ہے طلبہ و طالبات کو تعلیمی اداروں تک پہنچنے میں تاخیر اور زائرین کو دربار تک رسائی میں دشواری کا سامنا کرنا پڑتا ہے
اہل علاقہ کا کہنا ہے کہ دربار بالا پیر سے متعلقہ محکمے کو ہفتہ وار بنیادوں پر خاطر خواہ آمدن حاصل ہوتی ہے تاہم اس کے باوجود دربار تک پہنچنے والی اہم سڑک طویل عرصے سے تعمیر و مرمت کی منتظر ہے
لہٰذا جنابِ عالی سے مؤدبانہ گزارش ہے کہ دربار بالا پیر روڈ کی موجودہ صورتحال کا فوری نوٹس لیتے ہوئے متعلقہ محکمہ کو سڑک کا موقع پر معائنہ کرنے، تخمینہ تیار کرنے اور اس کی فوری تعمیر و بحالی کے لیے ضروری فنڈز اور عملی اقدامات کی ہدایات جاری فرمائی جائیں تاکہ اہل علاقہ، طلبہ، مریضوں اور زائرین کو درپیش سفری مشکلات کا خاتمہ ہو سکے
درخواست گزار:
اہل علاقہ و زائرینِ دربار بالا پیر
تحصیل اوکاڑہ
