14/09/2026
گورنمنٹ ہائی سکول نمبر 1 شاہکوٹ نے STEAM School Journey کے اہداف کامیابی سے مکمل کر لیے
شاہکوٹ (نمائندہ خصوصی)
جدید تعلیمی تقاضوں سے ہم آہنگی اور طلبہ میں سائنسی و تخلیقی صلاحیتوں کے فروغ کے لیے گورنمنٹ ہائی سکول نمبر 1 شاہکوٹ نے STEAM School Journey کے مقررہ اہداف کامیابی سے مکمل کر لیے۔ اس تاریخی سنگِ میل کی تکمیل پر سکول میں ایک پروقار تقریب کا انعقاد کیا گیا، جس میں تعلیمی میدان میں نمایاں خدمات انجام دینے والے اساتذہ اور فوکل پرسنز کو اعزازی تعریفی سرٹیفکیٹس سے نوازا گیا۔
یہ اعزازات چیف ایگزیکٹو آفیسر ڈسٹرکٹ ایجوکیشن اتھارٹی ننکانہ صاحب شفقت محمود اور ڈسٹرکٹ ایجوکیشن آفیسر سیکنڈری شکیل احمد رضوی کی جانب سے تفویض کیے گئے تھے۔ تقریب کے دوران معزز شخصیات رانا محمد اکرم خان، غلام مصطفیٰ، محمد نواز اور محمد اویس قرنی نے تعریفی اسناد اور ایوارڈز سٹیم فوکل پرسن سر غلام فرید کو پیش کیے اور ان کی محنت، جفاکشی اور قائدانہ کردار کو خراجِ تحسین پیش کیا۔
اس موقع پر سابق پرنسپل ڈاکٹر محمد اعجاز نے گورنمنٹ ہائی سکول نمبر 1 شاہکوٹ کے پرنسپل عابد حسین کو STEAM Pakistan کی جانب سے ملنے والا خصوصی ایوارڈ بھی پیش کیا۔
تقریب سے خطاب کرتے ہوئے پرنسپل عابد حسین نے کہا کہ گورنمنٹ ہائی سکول نمبر 1 شاہکوٹ میں STEAM پروگرام کے تحت طلبہ کو خطے کی معروف اور منفرد تجربہ گاہ M.P. Lab میں سائنس، ٹیکنالوجی، انجینئرنگ، آرٹس اور ریاضی کے مختلف تصورات عملی تجربات اور تخلیقی سرگرمیوں کے ذریعے سکھائے جا رہے ہیں۔
انہوں نے کہا کہ عصرِ حاضر میں روایتی رٹہ بازی کے بجائے طلبہ کو سائنسی فہم، عملی مہارت، تحقیق اور مسائل کے حل کی صلاحیتوں سے آراستہ کرنا وقت کی اہم ضرورت ہے۔ STEAM پروگرام طلبہ میں تنقیدی سوچ، جستجو اور نئے خیالات پیدا کرنے کی صلاحیت کو فروغ دے رہا ہے۔ یہ سرگرمیاں بچوں کو محض کتابی علم حاصل کرنے کے بجائے مستقبل کے تخلیقی اور باصلاحیت معمار بنانے میں معاون ثابت ہو رہی ہیں۔
پرنسپل نے اساتذہ اور طلبہ کی شبانہ روز محنت کو سراہتے ہوئے اس عزم کا اظہار کیا کہ گورنمنٹ ہائی سکول نمبر 1 شاہکوٹ میں جاری عملی تعلیمی تجربات سے خطے کے دیگر تعلیمی ادارے بھی بھرپور استفادہ کریں گے۔
ستارہ کیا، مہر کیا، نگم کیا
یہ سب تو ہیں مرے دل کی لگی کا ساماں!
وہ علم جس سے ہوتی ہے دل کی بیداری
وہی ہے معرفتِ کائنات کا ساماں!
حوالہ: گورنمنٹ ہائی سکول نمبر 1 شاہکوٹ؛ ایڈیٹر: روزنامہ حاوی رپورٹ لاہور؛ چیف ایڈیٹر: احوالِ شاہکوٹ ڈیجیٹل نیوز نیٹورک؛ عاشق بھٹی؛ 14 ستمبر 2026
.
