28/05/2026
ٽنڊومحمدخان (پريس رليز) سنڌ پبلڪ پارٽي جي مرڪزي آفيس ٽنڊومحمدخان ۾ عيدالاضحيٰ جي ٻئي ڏينهن پارٽي ڪارڪنن، سياسي ساٿين، دوستن ۽ شهرين وڏي انگ ۾ آمد ڪري پارٽي ڪنوينر اشفاق سرهندي سان عيد ملي ۽ نيڪ خواهشن جو اظهار ڪيو۔
ان موقعي تي خوشگوار ۽ محبت ڀريو ماحول ڏسڻ ۾ آيو، جتي ڪارڪنن ۽ شهرين پاران سنڌ جي امن، ڀائيچاري ۽ خوشحالي لاءِ دعائون پڻ گهريون ويون۔
پارٽي ڪنوينر اشفاق سرهندي عيد ملڻ لاءِ ايندڙ مهمانن جا ٿورا مڃيندي چيو ته “سنڌ جي سڃاڻپ محبت، رواداري، ڀائيچاري ۽ انسانيت آهي۔ ڪنهن وٽ وڃي عيد مبارڪ ڏيڻ اصل ۾ ان شخص کي محبتن، عزتن ۽ پنهنجائپ سان مانائتو ڪرڻ هوندو آهي۔”
هن وڌيڪ چيو ته سياسي اختلافن کان مٿانهون ٿي هڪ ٻئي سان محبت، احترام ۽ سماجي هم آهنگي کي هٿي ڏيڻ وقت جي اهم ضرورت آهي، ڇو ته سنڌ جي ڌرتي هميشه امن، پيار ۽ اخوت جو درس ڏنو آهي۔
تقريب دوران مختلف علائقن مان آيل ماڻهن پاران پارٽي قيادت سان ملاقاتون ڪري عيد جون مبارڪون ڏنيون ويون، جڏهن ته گڏيل طور ملڪ ۽ سنڌ جي بهتري لاءِ نيڪ تمنائن جو اظهار پڻ ڪيو ويو۔
