08/10/2025
سعر اللوقو كم؟✨
ابدأ بلوقو مش احترافي الان ولا استثمر في بدايتي وابدا صح؟✨
طيب هل أقدر ابني بزنس قوي باستخدام استيكرات او تغليف احترافي بدلا عن لوقو مؤقت لان ميزانيتي الان محدودة؟✨
اهلا وسهلا و السلام عليكم ✨
اليوم جيتكم انا و كباية الشاي عشان نجاوب على على السؤال الاكثر اثارة لجدل
كتير بنات بسالوني من سعر اللوقو وبقرروا انو *نيااه* السعر غالي خليني اشوف أي حاجه امشي بيها الحال و لقدام اغير اللوقو للوقو احترافي
اول حاجة خلينا نتفق شعل الشعارات مش بالسهوله البتخيلها الانسان الغير مصمم ليه؟ ببساطة لأننا لازم نطلع بفكره مميزه جديدة بدون تقليد من هنا او من هناك او بدون سرقة أفكار ليه؟ لانو دي اول حاجة سرقة (copyright) تاني و اهم حاجة انو اللوقو اتعمل أساسا عشان نبني صورة للبراند او البزنس مختلفة عن غيره عشان كدا شغل اللوقو بياخد وقت و ناخد و ندي مع بعض في الكلام و نشيل و نخت لمن نصل للمطلوب ف عشان كدا الطبيعي أي مصمم بياخد في اللوقو وقت مش بسيط فاكيد السعر ✨ح يكون مناسب للوقت و المجهود دا صح؟
طيب ليه استثمر في اللوقو الاحترافي؟✨
عشان ارسم فكره ثابته وقوية عند الجهور الانا بستهدفه لاني لو بديت بلوقو يمشي الحال ح اخسر في المستقبل كتير و دا حصل مع شركات عالمية ح اركز على الموضوع دا اكتر في البوست الجاي باذن الله
طيب الحل شنو؟✨
واحد من الحلول اللي عن نفسي بقترحها لعملائي دايما هي البداية باستيكرات او خط انتاج احترافي اول ثم نضيف اللوقو لاحقا
كيف؟✨
طيب ح يكون الشغل مركز على استايل مميز و نمط لوني ثابت,خط واضح و مميز تدي مظهر للبراند واضح و تبني ثق عن الجمهور و دا ح يخلي عندنا اتثاق و ثبات و نضيف اللوقو فيما بعد بنفس امتداد الهوية البصرية اللي قدمنها اول بنفس النمط و الأسلوب والثبات و الاتزان و كدا نكون حافظنا على صورة البراند
لكن الشغل الغير مدروس والمستعجل ممكن يخلينا نخسر اكتر من اننا نوفر
فالموضوع م بسب *سعر اللوقو كم؟*😌
و دا كان حل بسيط في المرات الجايه ح اشرح اكتر باذن الله تعالى
وداعا الى اللقاء سبتكم بعافية الى ان القاكم من جديد
#بزنس
#تسويق
