29/01/2023
عايز اقول ليك شويه تفاصيل كدا تخليك تحب الصلاة وتوصل لدرجة الخشوع وتنتظم فيها لأنها هي الأساس اللي حتخلي مزاجك كويس ونفسيتك مطمئنة.
امشي بمبدأ انه صلاتك ما حاجة روتينية و مُجبر تعملها، لا بالعكس انت بتكون ماشي تقعد مع ربك شويه وحتقعد معاه خمس دقائق بس فى كل فرض.
كتير على اللي أنعم عليك بكل حاجه ؟؟
قبل كل فرض استعد للصلاة و كأنك ماشي تقابل واحد بتحبه جدًا
امشي و أنت ملهوف .. ولو واحد سألك ماشي وين : قول ماشي اقعد مع ربنا شوية خليه احساس داخلي جواك ..
و أول ما ترفع ايدك وتقول : الله اكبر .. ابتسم ابتسامة مشتاق .. انسى الدنيا كلها بمشاكلها و همومها فى اللحظة دي .. اقرا الفاتحة بكل راحة واسمع جواب ربك بعد كل اية، و ما تقراها بسرعة و كأنه واحد جاري وراك .. و فى الاعتدال من الركوع لما تقول " سمع الله لمن حمده
احمده انت بطريقتك .. قول" الحمدلله يارب على كل النعم اللي انعمت علي بيها" .. "الحمدلله حمدًا طيبًا مباركًا كما ينبغي لجلال وجهك ولعظيم سلطانك "
و اول ما توصل للسجود اتذكر انه أقرب ما يكون العبد لربه وهو ساجد .. لما تهمس ببطن الأرض و بيسمعك من في السماء
سبح ربك و إبداء احكي ليه كل الفي قلبك قول يارب انا بحبك .. (يارب خليك معايا فى المحنه دى)
( يارب انا تائه وجهني للطريق الصحيح )
( يارب انا محتار فى الموضوع الفلاني ساعدنى ) .. احكي وفضفض لإنه مافي واحد حيفهمك ولا حيحس بيك زى اللي خلقك .. لما تحكي معاه ما حتلاقى حواجز بينكم، احكي بالدارجي ما لازم لغه عربية فصحى يعنى، هو اعلم بحالك منك بس بيحب يسمع صوتك .
يمكن تتلخبط في كلامك بس هو فاهم انت عايز تقول شنو، و صدقنى مهما كانت مشكلتك كبيرة و صعبه، فى آخر كلامك حتحس براحه ما طبيعيه و حتبتسم لانك سلمت امرك لرب العباد
و بعد ما تخلص صلاة، سلم عليه بس ما السلام التقليدي، لانك بتسلم على ربنا حبيبك.. تخيل انك بتقول :
( حشتاق ليك يا رب وللكلام معاك، يارب متين تجي الصلاة الجاية عشان أرجع اقعد معاك تاني لسة في كلام كتير فى قلبي عايز احكيهو ليك )
صدقني اول ما تخلص صلاه حتحس بعدها براحة وطمأنينة لانك كنت قاعد مع ربك حبيبك، و سلمت امرك وتوكلت عليه ولانه لما تواجهك اي مشكلة فى يومك ما حتهز شعره منك عارف لشنو ؟
لانك حتمشي فى الصلاة الجاية و تحكي لربك وتطلب منه يساعدك.
ربنا يرزقنا و اياكم الثبات والخشوع فى الصلاة💙.
