11/09/2026
من الأخطاء البنشوفها كتير في التسويق إننا نتعامل مع أي شخص شاف الإعلان كأنو جاهز يشتري فوراً.
ننزل الإعلان، نكتب السعر، نحط رقم التواصل، وننتظر المبيعات.
لكن الواقع مختلف شوية.
تخيل معاي 4 أشخاص:
الأول شاف اسم مشروعك لأول مرة اليوم.
الثاني شاف ليك كم بوست قبل كده وبدأ يعرف إنت بتقدم شنو.
الثالث مهتم بالخدمة وبدأ يقارن بينك وبين منافسين.
والرابع تقريباً مقتنع، لكن محتاج سبب أخير يخليه ياخد القرار.
هل منطقي نتكلم مع الأربعة بنفس الطريقة؟
أكيد لا.
وده بالضبط البخلينا نحتاج نفهم Customer Journey – رحلة العميل.
العميل غالباً بيمر بعدة مراحل قبل ما يشتري.
في البداية ممكن يكون بس محتاج يعرف إنك موجود.
بعدها يبدأ يهتم ويسأل:
الخدمة دي مناسبة لي؟
شنو الفائدة الحأحصل عليها؟
بعدها يبدأ يقارن:
السعر كيف؟
الجودة كيف؟
في تجارب عملاء؟
ليه أختاركم إنتو؟
وبعدها يصل لمرحلة القرار.
هنا ممكن عرض واضح، ضمان، تجربة عميل سابقة، أو Call To Action مناسب يساعده ياخد الخطوة الأخيرة.
المشكلة بتحصل لما نطلب من شخص لسه أول مرة يسمع بينا:
"اشترِ الآن!"
بدون ما نديه سبب يثق فينا أو حتى يفهم نحن بنقدم شنو.
عشان كده المحتوى ما مفروض يكون كله عروض مباشرة.
محتاج محتوى للتعريف.
محتوى للتعليم.
محتوى لبناء الثقة.
محتوى يثبت جودة المنتج أو الخدمة.
وبعدها محتوى يدفع لاتخاذ القرار.
لما تفهم المرحلة الموجود فيها العميل، بتعرف تقول ليهو شنو ومتى.
المحتوى الصحيح في التوقيت الخطأ ممكن ما يحقق أي نتيجة.
عشان كده:
قدم الرسالة المناسبة… للشخص المناسب… في المرحلة المناسبة. 🎯
هل المحتوى في صفحتك حالياً بيغطي كل رحلة العميل؟ ولا أغلبه مركز على البيع فقط؟
