11/06/2026
هل سمعت قبل كدا بمصطلح الخوف من النجاح؟
حتقول لي كيف يعني هو اصلاً الزول في حياته داير يصل لي نجاح، كيف يخاف منه؟!
بس دي حقيقة، في ناس فعلاً بتخاف من النجاح لأسباب كتيرة، و الخوف ده يمكن الما خلاهم ينهضوا من سباتهم لي الآن و يشوفوا احلامهم.
طيب سببه شنو؟
الخوف من النجاح قد يسببه أنك لمّن تنجح حتطلع من منطقة راحتك وتمشي للمجهول و التغيير، ف في خوف من الحتة دي.
إنت لمّن تفشل بترجع لي نقطة الصفر وإنت عارف البعديها و ما بتخاف، أو لمّن تفضل في مكانك في منطقة راحتك برضو ما بتخاف، بس في ناس بتخاف من المجهول، و منو منّا ما بخاف منّه؟
بس إحنا بنحارب الحتة دي و بنضع كذا فرضية و إحتياطات عشان نواجه المجهول
وتخيّل معاي إنك بعد عشرين سنة تكون ياهو ذاتك، نفسك في محلك و نفس وضعك، مافي تحسّن... هل حتكون سعيد بي الوضع دة؟
صح إنك لمنّ تصل لي النجاح في تغييرات حتطرأ، بس مع مرور الوقت حتلقى نفسك اتعوّدت عليها.
اتغلّب على خوفك من النجاح و حتلقى آفاق جديدة اتفتحت قدامك، تخلّيك تنسى الخوف ده و تطمح للأعلى، بس إنت أمشي الخطوة الأولى حتى لو ما كنت جاهز، ابدأ بس.
💬ورّينا في الكومنتات: هل قبل كدا خفت من النجاح؟ و لمن واجهته حصل ليك شنو؟
