02/07/2021
QUULLE
Quulluhu, waa nooc ka mid ah miraha ama iniinyaha ay sooraan geedaha qaarkood gaar ahaan nooca loo yaqaanno qodaxleyda oo ka tirsan bahda Xananka.
Quullaha, ugu badan waxaa soo saara 4 geed oo kala ah; Jiiqjiiqlaha, Jeerinka, Dheerdheeraha iyo Gumarka. Mid kasta oo ka mid ah geedahani quullihiiisu waxa uu leeyahay qaab dhismeed u gaar ah.
Quullaha waxaa aad u jecel xoolaha gaar ahaan Riyaha iyo Dabogaallaha. Xilliga uu quulluhu soo go’o waa xilliyada xagaaga gaar ahaan xilliyada cadarka. Waxaa na xilligaas loo yaqaannaa Quulle-gurad. Waxaa xilligaas aad u qooqa ari-cadka.
Xilligaas ri’yuhu marka ay rimaan waxa ay dhalmadoodu ku beegantaa dabaadiga Deyrta. Inta badanna orgida waa lagu fasaxaa oo lagama qabto.
Dabogaalluhu, gabsasta ugu badan ee adeegsada quullaha, kuna quudiya dhallaankiisa asna quuta. Inta badan wuu aasaa, halkaasna waxaa ka dhalatay maahmaah lagu sheego doqonnimada Daboggaallaha. Waxaa la yiri; “Mir quulle marka uu so qaato, inta uu cirka eego buu dhahaa Allaa ilehe halkaan baan cirka iyo dhulka kala barkiisa ahe, halkaan ku aaso, hadhow buu damcaa in uu la soo baxo mise meesha uu istaaga ba waa u kala barka cirka iyo dhulka, sidaas buu mirtii ku waayaa waxaana halkaas ka soo baxa geed kale”.
Quulaha ayaa aad uga baxa dhulka ciidka.
Quullaha hoose geedka uu ka soo go’ay idinkaan idiin daayey.
Gudbi adoo galladsan.