08/04/2026
Wasiirka Wasaaradda Xannaanada Xoolaha iyo Daaqa Dowladda Puntland, Mudane Siciid J. Cali Qoorsheel, ayaa maanta kulan muhiim ah la qaatay Agaasimaha Guud ee Wasaaradda iyo Agaasimeyaasha Waaxyaha kala duwan ee wasaaradda.
Kulankan oo uu sidoo kale qayb ka ahaa Wasiir Ku-xigeenka Wasaaradda, Mudane Xasan Jaamac Ismaaciil, ayaa ahaa kulan isbarasho, isxogwaraysi iyo dardargelin shaqo, iyadoo diiradda lagu saaray habsami u socodka howlaha wasaaradda iyo sidii loo xoojin lahaa fulinta waajibaadka muhiimka ah ee ay wasaaraddu u hayso bulshada Puntland.
Intii uu kulanku socday, Agaasimaha Guud ee Wasaaradda, Mudane Xasan Maxamed Ciise Goodir, ayaa si guud uga warbixiyey qaab-dhismeedka wasaaradda, nidaamka shaqo, qorshayaasha hortabinta leh, iyo heerka ay marayaan hawlaha muhiimka ah ee wasaaraddu u xil saaran tahay.
Sidoo kale, Agaasimeyaasha Waaxyaha ayaa mid walba si gaar ah uga warbixiyey shaqooyinka ay waaxyahoodu masuulka ka yihiin, caqabadaha jira, guulaha la gaaray, iyo qorshayaasha mudnaanta u leh si loo dardargeliyo adeegyada ay wasaaraddu bulshada u qabato.
Wasiirka ayaa kulanka ku adkeeyey muhiimadda wada shaqaynta, isla xisaabtanka, iyo in la labanlaabo dadaallada lagu horumarinayo adeegyada la xiriira xannaanada xoolaha, daaqa, iyo ilaalinta khayraadka xoolaha oo laf-dhabar u ah nolosha bulshada Puntland.
Ugu dambayn, kulanku wuxuu kusoo dhammaaday is-afgarad iyo dhiirrigelin ku aaddan in si wadajir ah loo xoojiyo shaqada wasaaradda, loona dardargeliyo waajibaadka hor yaalla si looga jawaabo baahiyaha bulshada.
