05/07/2026
‎Dowlad kasta oo ku faanta ku dhaqanka sharciga iyo dimuqraadiyadda waxaa lagu qiimeeyaa sida ay u dhowrto xorriyadaha muwaadiniinteeda, gaar ahaan xorriyadda saxaafadda. Xorriyadda hadalka ma aha arrin lagu cabbiro hadallo qurux badan oo madal laga jeediyo, balse waxaa lagu cabbiraa ficillada dowladda.
‎
‎Saxaafadda madax-bannaan waa tiirka isla xisaabtanka, waana codka bulshada ee soo bandhiga xaqiiqooyinka iyo arrimaha u baahan in wax laga qabto. Marka wariye loo xiro shaqadiisa ama war uu tebiyey awgeed, waxaa meesha ka dhalanaya cabsi saameyn ku yeelata dhammaan bahda warbaahinta, taas oo wiiqaysa doorkii ay bulshada u hayeen.
‎
‎Dowlad kalsooni ku qabta sharcigeeda iyo hay'adaheeda ma baqdo su'aalaha saxaafadda. Taa beddelkeeda, waxay dhiirrigelisaa jawi ay warbaahintu si xor ah ugu gudan karto waajibaadkeeda iyadoo la ilaalinayo sharciga iyo mas'uuliyadda saaran.
‎
‎Haddii ay jiraan eedeymo sharci oo loo haysto Suways Gacayte, waa in lagu wajahaa hannaan caddaaladeed oo hufan, furan, isla markaana waafaqsan dastuurka iyo shuruucda dalka. Haddii aanay jirinna, xorriyaddiida waa in dib loogu soo celiyaa sida ugu dhaqsaha badan.
‎
‎Waxaan ugu baaqayaa ururrada saxafiyiinta, bulshada rayidka ah, aqoonyahannada iyo dhammaan dadka rumaysan dowladnimada iyo caddaaladda inay cod mideysan ku difaacaan mabda'a xorriyadda hadalka iyo madaxbannaanida warbaahinta.
‎
‎Xorriyadda saxaafaddu waa xuquuq dastuuri ah oo aan cidna hadiyad u siin. Ilaalinteedu waxay xoojinaysaa kalsoonida shacabka iyo sumcadda hay'adaha dowladda, halka xaddidaaddeeduna ay dhaawacayso hannaanka dimuqraadiyadeed ee la doonayo in la dhiso.
