24/12/2025
CANSUURTA XAD-DHAAFKA AH EE MAAMULKA KOONFUR GALBEED KA QAADO DEGMADA AFGOOYE IYO SAAMEYNTA AY KU YEELATAY BULSHADA😢
Degmada Afgooye waa mid ka mid ah degmooyinka ugu wax-soo-saarka badan Koonfurta Soomaaliya, gaar ahaan dhanka beeraha, ganacsiga yar-yar iyo suuqyada quudinta ummadda. Si kastaba ha ahaatee, sanadihii u dambeeyay waxaa isa soo tarayay cabashooyin culus oo ka imanaya bulshada degmada, gaar ahaan gacansatada yaryar iyo dadka maasiinka ah, kuwaas oo ka cabanaya canshuur xad-dhaaf ah oo maalin walba laga qaado.
Maamulka Koonfur Galbeed ee Degmada Afgooye ayaa la sheegayaa inuu hirgeliyay nidaam canshuureed aan la jaanqaadi karin awoodda dhaqaale ee dadka deegaanka. Canshuurtaasi ma aha mid ku kooban ganacsiyada waaweyn ama shirkadaha wax-soo-saarka leh, balse si toos ah ayay u taabanaysaa qof kasta oo suuqa wax yar ka iibinaya ama noloshiisa ku maareynaya ganacsi maalinle ah.
Waxa ugu daran ayaa ah in canshuurta laga qaadayo ay tahay mid joogto ah oo maalinle ah, taas oo aan loo eegin xaaladda ganacsadaha, faa’iidada uu helo iyo duruufaha nololeed ee haysta. Gacansatada yaryar, haweenka suuqa ku iibiya qudaarta, kalluunka, miraha iyo badeecadaha kale ee daruuriga ah, ayaa ah kuwa ugu badan ee dhibaatadan wajahaya.
Waxaa sidoo kale jira askar noocyo kala duwan ah oo lagu arkayo waddo kasta iyo bar-kontarool walba, kuwaas oo lacago kala duwan ka qaada gaadiidka, ganacsatada iyo xitaa dadka shacab usoo suuq tagaya, suuqa Afgooye, waxaana qofkii shey muuqada soo iibsada laga rabaa canshuur aan rasiid lahayn, (Tusaale hadii ad hal sariir alwaax ah soo iibsato) waxaa lagaa rabaa 1$ oo lacag ah 😢Lacagahaas badankood lama siiyo rasiidh cad, mana jiro nidaam hufan oo lagu hubin karo halka ay ku dambeynayaan.
Sida ay sheegayaan dad badan oo deegaanka ah, lacago badan oo laga qaado shacabka Afgooye ayaa si toos ah loogu shubaa Baydhabo, halkaas oo xarunta maamulka Koonfur Galbeed ku taallo, iyadoo aan dib loogu celin adeegyo bulsho oo la taaban karo sida horumarinta waddooyinka, caafimaadka, waxbarashada ama amniga dhabta ah ee dadka.
Meesha laga rabay in canshuurta lagu saleeyo awoodda ganacsi, laguna wajaho shirkadaha waaweyn iyo kuwa wax-soo-saarka badan, ayaa maanta loo rogay culays lagu saaray dadka danyarta ah. Tani waxay sababtay in ganacsiyo badan xirmaan, shaqo la’aan ay bataan, sicir-barar ka dhasho suuqyada, isla markaana kalsoonidii shacabka iyo maamulka ay hoos u dhacdo.
Canshuurta xad-dhaafka ah ma aha horumar, balse waa dib-u-dhac dhaqaale iyo mid bulsho. Haddii maamulka Koonfur Galbeed uu doonayo horumar waara, waa inuu dib u eego nidaamka canshuuraha, joojiyo askarta sharci-darrada ah ee shacabka dhibaateynaya, isla markaana sameeyo hannaan cadaalad ah oo canshuur uruurinta lagu saleeyo awood, hufnaan iyo isla-xisaabtan.
Ummadda Degmada Afgooye waxay u baahan tahay cadaalad, maamul u danqada, iyo canshuur loo qaado si waafaqsan sharci iyo awood dhaqaale. Haddii kale, culayska maanta jira wuxuu halis ku yahay nolosha, ganacsiga iyo xasilloonida guud ee degmada.
Ummadda Degmada Afgooye alle ha u gargaaro
