01/03/2026
شوف يا صديقي..
إيران عم تنتحر حرفيًا | من شوي عملت أغبى حركة ممكن دولة تعملها وهي بحالة حرب!
تصرف ما عم أقدر أفهم سببه، وليش التصعيد ياخد هالمنحنى الخطير والمتهوّر سياسيًا واستراتيجيًا!
أكد وزير الدفاع البريطاني John Healey بتصريحات صحفية قبل شوي، إنو تم رصد إطلاق صاروخين إيرانيين باتجاه جزيرة Cyprus.
وبالتحديد باتجاه القواعد العسكرية البريطانية اللي عم تُستخدم كمركز دعم لوجستي واستخباراتي للقوات الأمريكية والبريطانية بشرق المتوسط.
طيب وين المشكلة يعني؟ شو الفرق بين قواعد قبرص والقواعد الأمريكية بدول الخليج؟
الفرق كبير كتير يا صديقي… هاي مصيبة!
أولًا: جزيرة قبرص فيها قواعد عسكرية بريطانية، وبريطانيا عضو مؤسس بحلف NATO.
وبحسب اتفاقية الدفاع المشترك تبع الناتو، أي هجوم على القوات البريطانية ممكن ينعبر هجوم على الحلف كله!
وساعتها رح تشوف تحالفات إيران ما فيها تتحملها أبدًا… أول شي ممكن يصير انطلاق مقاتلات من قواعد الناتو بإيطاليا واليونان وتركيا، ليشاركوا بتدمير منصات إطلاق الصواريخ جوّا العمق الإيراني.
ومو بس هيك… ممكن الحلف بقيادة بريطانيا يستهدف كل الدفاعات الجوية الإيرانية (مثل S-300 وباور 373) ليفتح المجال الجوي قدام القاذفات الثقيلة، ووقتها بصير في تدخل صاروخي وجوي شامل.
ونحنا منعرف أصلًا إنو منظومة الدفاع الجوي الإيرانية مو بأحسن حالاتها.
وفي خطوة أخطر كمان… ممكن الناتو يغرق اللي ضايل من الزوارق الحربية والفرقاطات الإيرانية بالخليج، ليضمن عدم إغلاق مضيق هرمز.
وهيك بيكون الحلف ضرب كذا هدف بضربة وحدة: ردّ الهجوم، وحافظ على مرور سفن النفط لأوروبا عبر مضيق هرمز، اللي إيران أصلًا مهددة تسكّره.
غير هيك، ممكن يصير في حصار بحري وجوي كامل، يمنع أي طيارة أو سفينة تدخل أو تطلع من إيران.
باختصار… ضرب الصاروخين هدول على قبرص بيعطي شرعية دولية لتحالف واسع ضد إيران، لإنهاء التهديد من جذوره.
والموضوع ما رح يكون مجرد ضربات محدودة هالمرة… ولا روسيا ولا الصين رح يقدروا يبرروا بسهولة، لأنو إذا أنت اللي بدأت، الموقف بيختلف.
خصوصًا إنو بريطانيا — على الأقل رسميًا — ما شاركت بأي هجمات مباشرة ضد إيران.
بصراحة… خطوة متل هاي إذا صحت، بتشبه الانتحار الاستراتيجي.
والمبرر الوحيد اللي ممكن يخطر عالبال، يكون في تنسيق سري بين إيران وروسيا والصين ليكونوا بصف واحد بوجه الناتو…
بس حتى بهالحالة، شو رح تضيف إيران فعليًا؟
السؤال بيضل مطروح.
