27/09/2026
တောင်ငူတွင် ၇ နှစ်အရွယ် ကလေးငယ်အား အဓမ္မပြုကျင့်သည်ဟု စွပ်စွဲခံရသည့် ဒုလ္လဘဘုန်းကြီးကို
ရာဇသတ်ကြီးပုဒ်မ ၃၇၆ ဖြင့် ရုံးထုတ်စစ်ဆေး။
အင်းလေး #၂၇-စက်တင်ဘာ-၂၀၂၆
ပဲခူးတိုင်းဒေသကြီး၊ တောင်ငူမြို့နယ်တွင် အသက် ၇ နှစ်အရွယ် မိန်းကလေးငယ်တစ်ဦးအား အကြိမ်ကြိမ် အဓမ္မပြုကျင့်ခဲ့သည်ဟု စွပ်စွဲခံထားရသည့် ဘုန်းကြီး ဦးသီလ (ခ) ဦးနှင်း ကို စက်တင်ဘာ ၂၅ ရက်က တောင်ငူခရိုင်တရားရုံး၌ ရုံးထုတ်စစ်ဆေးခဲ့ကြောင်း ဒေသတွင်း သတင်းရင်းမြစ်များနှင့် တရားရုံးနှင့် နီးစပ်သူများထံမှ သိရသည်။
ဖြစ်စဉ်မှာ ပြီးခဲ့သည့် စက်တင်ဘာလ ၄ ရက်က ကင်းဆိပ်ကျေးရွာဘက်သို့ ကန်စွန်းရွက် သွားရောက်ရောင်းချသည့် ဖခင်ဖြစ်သူသည် အသက် ၇ နှစ်အရွယ် သမီးဖြစ်သူအား ၎င်းကိုယ်တိုင် ဝေယျာဝစ္စ လုပ်ကိုင်ပေးနေသည့် ဇလီထောင့်ဘုန်းကြီးကျောင်းတွင် ခေတ္တအပ်နှံထားခဲ့ရာမှ စတင်ခဲ့ခြင်းဖြစ်သည်။
မိခင်ဖြစ်သူက ကလေးငယ်အား ကျောင်းမှ ပြန်လည်ခေါ်ဆောင်လာပြီးနောက် နေအိမ်အရောက်တွင် ကလေးငယ်က ဘုန်းကြီးကျောင်းတွင် ထားခဲ့သည့် အကြိမ်တိုင်း၌ ဘုန်းကြီး ဦးသီလက အဓမ္မပြုကျင့်ခဲ့ကြောင်း ဖွင့်ဟပြောဆိုခဲ့ခြင်းဖြစ်သည်ဟု သိရသည်။
ယင်းဖြစ်စဉ်နှင့် ပတ်သက်၍ ဒေသခံတစ်ဦးက သူ့အဖေက ကန်စွန်းရွက်သွားရောင်းရင်း သူဝေယျာဝစ္စလုပ်နေတဲ့ ဘုန်းကြီးကျောင်းကို ယုံပြီး အပ်ခဲ့တာ။ အမေဖြစ်သူက သွားခေါ်တော့ အိမ်ရောက်မှ ကလေးက ထားခဲ့တဲ့အချိန်တိုင်း ဘုန်းကြီးက အဓမ္မပြုကျင့်တယ်လို့ ပြောတာ။ အဓမ္မပြုကျင့်တယ်လို့ စွပ်စွဲခံရတဲ့ ဘုန်းကြီးက ငယ်ဖြူမဟုတ်ဘူး၊ ဒုလ္လဘဝတ်ထားတဲ့ ဘုန်းကြီးပါ။ ကလေးကတော့ ထိခိုက်ဒဏ်ရာတွေကြောင့် ဆေးရုံတောင် တင်လိုက်ရတယ် ဟု ပြောကြားသည်။
အဆိုပါဖြစ်စဉ်အား မိခင်ဖြစ်သူက သိရှိပြီးနောက် စက်တင်ဘာလ ၅ ရက်တွင် တောင်ငူမြို့နယ်ရဲစခန်းသို့ သွားရောက်တိုင်ကြားခဲ့သဖြင့် သက်ဆိုင်ရာက ဒုလ္လဘဘုန်းကြီး ဦးသီလ (ခ) ဦးနှင်း အား ဖမ်းဆီးခဲ့ပြီး (ပ) ၁၀၆/၂၀၂၆၊ ရာဇသတ်ကြီးပုဒ်မ ၃၇၆ (မုဒိမ်းမှု) ဖြင့် အမှုဖွင့်အရေးယူခဲ့ခြင်း ဖြစ်သည်။ ထို့နောက် စက်တင်ဘာလ ၂၅ ရက်တွင် တောင်ငူခရိုင်တရားရုံး၌ ပထမဆုံးအကြိမ် ရုံးထုတ်စစ်ဆေးခဲ့ခြင်း ဖြစ်သည်။
မြန်မာနိုင်ငံတွင် ကလေးသူငယ်များအပေါ် လိင်ပိုင်းဆိုင်ရာ အကြမ်းဖက်မှုနှင့် ကျူးလွန်မှုများ ဆက်တိုက်ဖြစ်ပွားနေပြီး ပြီးခဲ့သည့် စက်တင်ဘာလ ၂၀ ရက်ကလည်း ရန်ကုန်တိုင်း၊ လှည်းကူးမြို့နယ်၊ ကျွန်းကလေးကျေးရွာတွင် အသက် ၆ နှစ်အရွယ် သီလရှင်ကလေးငယ်တစ်ဦးအား အဓမ္မပြုကျင့်ခဲ့သည်ဟု စွပ်စွဲခံရသည့် အမျိုးသားတစ်ဦးကို ဖမ်းဆီးအရေးယူထားသည့် ဖြစ်စဉ် ဖြစ်ပွားခဲ့သည်။
