23/07/2025
မိုးသည်ထန်နေတဲ့ မဲဆောက်ရဲ့ အနိမ့်ပိုင်းရပ်ကွက်မှာ ရေလွှမ်းမိုးမှုကြုံရင် ပြောင်းရွှေ့ရေး အကူအညီတောင်းခံနိုင်တယ်လို့ အာဏာပိုင်တွေထုတ်ပြန်
မဲဆောက်၊ ဇူလိုင်လ ၂၃
ဝီဖါမုန်တိုင်းကြောင့် ထိုင်း-မြန်မာနယ်စပ်၊ တာ့ခ်ခရိုင်၊ မဲဆောက်မှာ မိုးသည်းထန်နေပြီး မိုးလေဝသ သတင်းတွေကို နားထောင်ဖို့နဲ့ ရေလွှမ်းမိုးမှုကြုံတွေ့ခဲ့ရင် အရေးပေါ်ရွှေ့ပြောင်းရေးအတွက် ဖုန်းဖြင့် ဆက်သွယ်အကြောင်းကြား နိုင်တယ်လို့ မဲဆောက်မြို့ ရပ်ကွက်ရုံးတွေနဲ့ မြို့မ ရဲစခန်းက အသိပေးထားပါတယ်။
လတ်တလောမှာတော့ မဲဆောက်မြို့တွင်းက ရေကြီးရေလျှံမှုဖြစ်နေတဲ့ လမ်းတချို့ကို လမ်းလွှဲမောင်းတဲ့ စနစ်နဲ့ ပြုလုပ်ထားပြီး ဂရုစိုက်သွားလာကြဖို့ကိုလည်း အာဏာပိုင်တွေက အသိပေးထားတာပါ။
ဒါ့အပြင် အနိမ့်ပိုင်းနဲ့ ပြောင်းရွှေ့ဖို့ အခက်အခဲရှိသူတွေဟာ မြို့မရဲစခန်း ဖုန်းနံပါတ် 191 နဲ့ အစိုးရရုံးဖုန်းနံပါတ် 081-9716835 ၊ ကယ်ဆယ်ရေးဖုန်းနံပါတ် 082-9797936 ၊ ထဆိုင်လွတ်မီးသတ်ရုံးဖုန်းနံပါတ် 093-4927345 ကို ဆက်သွယ်နိုင်တယ်လို့ ထုတ်ပြန်ပါတယ်။
လက်ရှိမှာတော့ ဝီဖါမုန်တိုင်းဟာ ချင်းခန်းနဲ့ လာအိုနယ်စပ်ကို ဗဟိုပြုတိုက်ခတ်နေပြီး ထိုင်းအရှေ့ဘက်ခရိုင်ဖြစ်တဲ့ နန်ခရိုင်ဒေသန္တရဘက်ကို ဦးတည်နေတယ်လို့ မိုးလေဝသသတင်းအရ သိရပြီး ထိုင်းမြောက်ပိုင်းနဲ့ အနောက်ပိုင်းခရိုင်ဒေသန္တရတွေမှာ ရေကြီးရေလျှံမှုတွေဖြစ်ပေါ်နေပြီး ပြည်သူများ ဘေးကင်းရာကို ပြောင်းရွှေ့နေထိုင်နေရတာပါ။
မုန်တိုင်းနောက်ဆက်တွဲမိုးသည်ထန်မှုကြောင့် ထိုင်း-မြန်မာနယ်စပ်၊ တာ့ခ်ခရိုင်၊ မဲဆောက်မြို့၊ မွေမြစ် (သောင်ရင်းမြစ်) ဟာလည်း တရေးရေးမြင့်တက်နေသလို ပုံမှန်မျက်နှာပြင်အထက် ၁.၅ မီတာ (လိမ္မော်ရောင်အဆင့်) ရောက်ရှိနေတယ်လို့ ထဆိုင်လွတ်ကယ်ဆယ်ရေးအဖွဲ့က ထုတ်ပြန်ပါတယ်။
ရုပ်သံ - ရေမြင့်တက်နေတဲ့ မွေမြစ် (သောင်ရင်းမြစ်) ရဲ့ ယနေ့မနက်မြင်ကွင်းဖြစ်ပါတယ်။
သတင်း - Border Echo
ရုပ်သံ - Paul
