Patrimoine du kef

01/03/2019

15/02/2019

:
يحكيو على راجل من التجار في القرن 19 ڨابسي واتاتو سفرة لبر الكاف ، كي شاف البلاد و اهل البلاد منهم التركي و الطلياني و العربي و السينيوري و الشلحي (الأمازيغ ) و العربي و من كل فية ، جمعهم دين الله و سكنة البلد .
انهار يمشي بين الزقاق شاف طفلة شابه تعمل في عمرها نقولو قريب العشرين ، ياسيدك الشعر ذهبي الخد رماني و العيون موج بحر ، بايضة بياض الحليب المصفي . تضرب فيها حبها و قال هذي هي أم الذرية هاذي هي لالاتي البية . اماليها ما عطاوهاش و هو حبها و هي حبتو ، كيفاش يعمل كيفاش يدير ؟؟ .
قال ماعادش فيها و الروح هامت بيها لازم نجيبها و من كل حاجب نعيذها . خطفها و هرب بيها لبر الرمان ، لڨابس جارت الطليان ، خذاها و جاب منها وليد الخد أحمر مورد و الوجه سمح مفرّد ، قنفيد ياربي تصونو ، رجع بيها التونس و سكنها في زناقي الحاضرة جوّرها بالترك و السبنيور و أشراف الجامع المعمور .
وماو ربي يقول وماتشاؤون الا اي يشاء الله .. ياسيدك شهق شهقة مولا الدار سفر للواحد القهار . قعدتش اك الحورية فريدة في البلاد غريبة ؟ قالت لا يلزمني نقعد و نربي ولدي، و في وسط عمامو لازم يعيش. رجعت بيه لڨابس عاشت بينات اهل راجلها كبر آك العازب خذاتلو ڨابسية بنت بادية و شطوط سماوية ، بنت عمو. جاب منها ثلاثة زغيرات و مات ، زاد المكتوب رحلهم كي العادة التونس ، آك المرى هزت كنتها و عيشتها في العاصمة و خدمت عليها قال لاخر و جرات و شقات و ما خلاتهاش تتخص لا هي لا ذراريها ، كبرو الذرية و الحمل خف عالشابة الكافية ، الطبيب و المحامي و التاجر تبارك الله خير و خمير و من نظرة ريتو و اش صار لا تلزت لماليها و لا لزت روحها لمالي راجلها ، ناضلت عليهم وحدها ، يا والله حرة .
و قالك التوه هالنسل في تونس موجود اسم العويلة ربي يعلم بيه (ماعنديش فكرة )
شعرت و غنات عالي جاها و بدل الحياة .
اش جابا هالغادي في بلاد غير بلاده !
شبيه تحكي بالمحلول ؟
تي موش قلنا جابت و دارت و بر ڨابس جاورت و كنتهم صارت ! اسمع مالا آش قالت
قالت واش جابا و اش غير على بنات بلاده . ماتكون كان جابتا النسمة الكافية .

بقلم محمد أشرف العثماني