04/09/2024
في ديسمبر الشتاء مشتي وبكري كانت النو ديما تصب الڨرة تسبع ولا تربع،،وعامتها جا الزيتون والد خيرات ..زيتون لڨيم (جالي وملڨم) مبروك راجل كبير عندو شعبة زيتون ماشاء الله عندو كاتكات كل صباح يخدم و يرمي الصرافة و الخيش وما لازم الكل و يركب المرى معاه من ڨدام و مرات تسكر الباب وتخلي لڨشة مالمحلفة متاعها لبرا مالباب وتجبد الباب لين الكميون يتحرك بكلو ،،يڨلها بالشوي راك دڨدڨتيه و البناويت يركبو من تالي و يرمو على رواحهم كليم شلاليڨ عالصڨع و يقصدو ربي ..وضال يطلبو في ربي تجي ڤرة متاع نو باش يڨعدو يرتاحو،،،يوصلو للزيتون يهبط مبروك يسبڨ ڨدامهم و يهز معاه كان التسرة يبدى يدور في الزيتون يختار زيتونة والدة ويبدى ينظف في الجدرة متاعها و كان تحتها ضرواية صغيرة ينحيها باش يفرشو عالنظافة،،ومرات تزلڨ التسرة تتعدى ليدو ضالي الدم شرتلا ..يڨول يعطيها كية كان جت ماضية تڨصلي إيدي ...يخلطو البناويت و المرى يڨلهم فرشو تحت اذيا والدة خنلمو شوي زيتون مدام الدنيا دافية شكون يعرف يولي ريح ولا تجيش الڤرة ..ويقول لمرتو قصيلي طبة من ملحفتك خنكبس إيدي هاي قريب تقصهالي التسرة ,,أيا تكبسلو ايدو و تمشي تشعل العافية و البناويت يڨعدو يفرشو في الخيش ..يكملو يفرشو و ينادو بالكانون يدفو ايديهم مشوار ويڨلهم هيو نهار الشتاء كمشة ..ينصبو الصرافة من شيرة الشمس و كل مرة وحدة تعثر تڨول كلمات بشوي الله أعلم بيهم شنهي يڨعد إبيها يرعيلها ..من ثما يڨلهم ساعدو رواحكم تقلو ها الصرافة متاع عهد الجاهلية طيحتلنا كتافتا كل عام تقلنا تو نشري وحدة اخرى خفيفة شوي ..أيا يحضر البراد تجيب المرى تسربيلهم التاي و تبرك تحت الزيتونة تلڨط الكعبة لمفرتة ،،و يطلع النهار و تدفى الدنيا شوي وهوما يسخنو مالجميعة ،يبدو يتحدثو ،،تڨلو المرى مشك ڨتلي تو نشريلك برويطة كل سوڨ وانت تڨلي نسيتها ڨعدنا نهزو في الطرنينة متاع المراح في الشكاير ..يڨلها تعرفيش كيفاش هاني الجلالة متاع الزيتون نظفيها و وحطي الزيتون متاعها وحدك وبيعيهم وحدك وخوذيهم و أخطيني خوذي برويطة ولا لتحبي،،وتفز الطفلة من غادي تڨلو بابا ونحنا اش باش تعطينا ،،حتى النعجة لعطيتهالي ماك بعتو ولدها و خذيت حڨو،،يتلفت للمرى يڨلها ايواه هاك حيرتي عليا غار نمالة تو ،،ويرجع لبنتو يڨلها ماني عطيت حڨو لأمكم خذتلكم بيه كتاتين ..الحاصل الوقت اذاكا لتڨلو على حاجة يقلها الله يبارك غير اكبسو رواحكم شوي لمولي الزيتونات كلاهم الفرخ و هزهم الماء وتو بعد الزيتون نهزكم مع أمكم للسوڨ وخوذو لتحبو ..يڨلهم نا هاني خذيت كميون باش متتعبوش ضالي تنڨلو بالرزمة عالبهيمة في الصعادي،،الحاصل ميخلي حد غضبان ،،يسكتو وتفز امهم من غادي تڨلهم ااخ مبلحڨ الصالحة بنت حدي خذت؟؟ أمس سمعت النساوين يعاودو في العين ..تڨلها بنتها شكون خذت ؟ تڨلها ڨالو عطوها الدوار لظهرتنا ابيو يقولو عساس متاع غبات نسيت اسمو ها يعطيه كية،،يفز مبروك راجلها يڨلها ماو اكهذيلي القواد اكالمرة شد الطفل سارح في الجبل وصلو ماني خطوني بخمسة وعشرين الف..تڨلو ضراهو اذاكا ..و تجي الطفلة تحول في الصرافة تعثر في حجرة تجي على عين ڨفاها ..تڨول عزى فيها هي ..أيا تجيها تفززها و تڨعد الصرافة هي ابيها و تمشي الطفلة لطاحت للكانون تشرب اميها و تڨطر البراد وتوخذ نتشة كسرة و ترجع ..تڨلهم قريب كرايمي تتدڨدڨ،،يڨلها إبيها من صغرك مرخوفة انت..تڨلو تي حتى الروك متاعي مڨطع (الروك صباط بلاستيك) نوصي فيك على روك من ڨدام لا نبدو في الزيتون ..وتبدى اتمتم ،،يڨلها تو السوق اذايا نجيبلك روك ..ويڨلب الحديث خلاص ..يڨلهم اكالطفل اندرى شرهش بالسعيات النهار تناصف ،،تڨلو بنتو الاخرى اتو نطلع غادي نطل تمشي لا اطل لا شيء تعمل دورة و تعمل ترتيحة لين يولو يعيطو عليها ..تڨلهم ستنو خنثبت هاي ثما رسلة مندريش هو ولا عمر ولد عمي ..يقلها هيا تو نلغط عليه يحل عليها ..ترجع تجمع تڨلو والله لا فريتو ..يطلع ابيهم ويهز في ايدو التسرة يلغط عالطفل ويڨعد يدور من زيتونة وينظف بالتسرة و مرات يتعدى للكميون يهز الكابوط و يبدى يبرجي في البونبات متاع المازوط على خاطر الصبحة يلكلك في التخديم ..في بالو هواء في الجعب متاع المازوط و هو يصبح بارد و البطرية ضعيفة ،،الحاصل ميرجع كان نصف النهار وقت الفطور ..و العشوة يڨلهم خنمشي نجيب ابادين ماء مالصنطاج يمشي يڨعد محلڨ في الحانوت لوقت المرواح وامهم تڨعد تلڨط وراهم في الزيتون المجموع و آخر تبدى تصفي في الزيتون مالعروش ..البناويت يعيو يقولولها ا يما يزي هاي الشمس ڨريب تتمسى خنروحو يعجلناش باش نطيبو العشاء حتى الحطب معناش ..تڨلهم كملو الحويلة اذيا هاي ظريفة مدام جا بباكم هوما أكاكا و يسمعو كان صوت الكاتكات جاي يون تقلها هاو جا هيا نلمو فيه البركة ..يخلط ابيهم يخلي الكميون يخدم و يعبو الزيتون و يڨلهم الصرافة درڨوها في الضرواية باش نقعدو كل يوم نعانو فيها ..يروحو يخلط يوخر لكدس الزيتون تحت الغرابة نتاع المعمرة يفرغ الزيتون و يحط الكميون قدام المعمورة و ڨدام لا يسكتو يبدى يكسيلاري و الكميون يعيط الحاصل المعمرة تتعبى بالدخان ..تڨلو مرتو سكت لوراثة ردمتنا بالدخان ..
بقلم الاستاذ انو حامدي
