The Somali News

06/12/2026

CJ’s Restaurant waa mid ka mid ah maqaayadaha ugu caansan Kenya, gaar ahaan magaalada Nairobi. Maqaayaddan ayaa asalkeedu ka soo jeedaa Uganda, waxaana iska leh ganacsadaha Ahmed Omar Mandela, oo ah nin asal ahaan Soomaali ah kana mid ah ganacsatada ugu waaweyn Bariga Afrika.

Si kastaba ha ahaatee, waxaa bulshada Soomaaliyeed qaarkood isweydiiyaan sababta aan loogu arkin shaqaale Soomaali ah xarumaheeda Kenya ama maamulka sare ee laamaha CJ’s ee Kenya, inkastoo milkiilaha shirkaddu uu yahay qof asal Soomaali leh.

CJ’s ayaa maanta ka shaqeysa laamo badan oo Kenya ku yaalla, iyadoo shaqaalaheeda badankoodu yihiin Kenyan, halka maamulka sare uu yahay Hindi.

Arrintan ayaa dhalisay dood ku saabsan in ganacsatada Soomaaliyeed ay fursado shaqo siiyaan dhalinyarada Soomaaliyeed iyo in kale, gaar ahaan marka ay shirkadahoodu ku fidaan dalal kala duwan oo gobolka ah.

Dhanka kale, CJ’s waxay sii waddaa ballaarinteeda gudaha Kenya, iyadoo noqotay mid ka mid ah silsiladaha maqaayadaha ugu kobaca badan dalka tan iyo markii ay suuqa Kenya gashay sanadkii 2018.

Mexe kula tahay.

06/11/2026

Garsooraha Soomaaliyeed ee Omar Abdulkadir Artan ayaa galay taariikhda kubadda cagta Yurub kaddib markii loo magacaabay inuu dhex dhexaadiyo Final-ka UEFA Super Cup 2026, kulan dhex mari doona kooxaha Paris Saint-Germain iyo Aston Villa.

Magacaabistan ayaa ah mid si weyn u soo jiidatay indhaha bahda kubadda cagta, maadaama taariikhda tartamada waaweyn ee Yurub aysan jirin garsoore Afrikaan ah oo si rasmi ah u qabtay final-ka UEFA Champions League, UEFA Europa League ama finallada horyaallada ugu waaweyn Yurub sida Premier League, La Liga iyo Bundesliga.

Omar Artan ayaa sidaas ku noqday astaan cusub oo muujinaysa horumarka ay sameynayaan garsoorayaasha Afrika, gaar ahaan kuwa Soomaaliyeed, kuwaas oo sannadihii u dambeeyay si weyn uga dhex muuqday garoomada caalamiga ah.

Khubarada ciyaaraha ayaa u arka magacaabistan mid sare u qaadaysa sumcadda Soomaaliya iyo guud ahaan qaaradda Afrika, iyadoo muujinaysa kalsoonida sii kordheysa ee hay’adaha kubadda cagta dunidu ku qabaan tayada garsoorayaasha Afrika.

Final-ka UEFA Super Cup 2026 ayaa lagu wadaa inuu ka dhaco magaalada Salzburg ee dalka Austria 12-ka Agoosto, waxaana indhaha taageerayaasha kubadda cagtu si gaar ah ugu jeedsan doonaan garsoore Omar Artan, oo noqonaya wejiga Afrika ee masraxa weyn ee kubadda cagta Yurub.

06/11/2026

Musharraxa Madaxweynaha Galmudug, Libaan Axmed Xasan, ayaa la sheegay inuu lacag dhan $50,000 guddoonsiiyay garsooraha caalamiga ah ee Soomaaliyeed Cumar Cabdullaahi Cartan, kadib dhacdooyinkii la xiriiray ka maqnaanshihiisii Koobka Adduunka 2026.

Tallaabadan ayaa lagu tilmaamay mid lagu muujinayo taageero iyo garab istaag loo fidinayo Cumar Cartan, oo noqday garsoorihii ugu horreeyay ee Soomaali ah ee loo xulo inuu ka qeyb galo tartanka Koobka Adduunka. Arrintan ayaa dhalisay falcelin iyo taageero ballaaran oo gudaha iyo dibadda Soomaaliya ah.

06/11/2026

Garsooraha Soomaaliyeed ee Omar Abdulkadir Artan ayaa loo magacaabay inuu dhexdhexaadiyo Final-ka UEFA Super Cup 2026 ee dhex mari doona Paris Saint-Germain iyo Aston Villa F.C., kaas oo ka dhici doona magaalada Salzburg 12-ka Agoosto 2026. Magacaabistan waxaa maanta shaacisay UEFA kadib wada-tashi ay la yeelatay CAF.

Arrintan ayaa timid kaddib markii Omar Artan laga reebay Koobka Adduunka 2026 sababo la xiriira diidmada gelitaanka Mareykanka, balse UEFA ayaa ku maamuustay inuu qabto mid ka mid ah ciyaaraha ugu waaweyn kubadda cagta Yurub.

06/11/2026

Magaalada Belfast ee caasimadda Waqooyiga Ireland ayaa waxaa ka dhacay rabshado xooggan kadib markii nin u dhashay dalka Suudaan loo xiray weerar mindi loo adeegsaday oo sababay dhaawac culus.

Hadi Alodid oo 30 jir ah ayaa Arbacadii la soo taagay maxkamad ku taalla Belfast, isagoo wajahaya eedeymo la xiriira weerarkii dhacay Isniintii. Weerarka oo muuqaalkiisa lagu baahiyay baraha bulshada ayaa si weyn u faafay.

Intii uu socday dhageysiga maxkamadda ayaa la sheegay in dhibbanaha oo ah nin ku jira afartameeyada da’diisa uu lumiyay hal il, kadib dhaawacyo culus oo ka soo gaaray indhaha, wejiga iyo dhabarka.

Talaadadii, boqolaal dibadbaxayaal ah oo qaarkood wajiyada soo qariyay ayaa isugu soo baxay meelo kala duwan oo Belfast ah, iyagoo dab qabadsiiyay bas iyo dhowr gaari. Sidoo kale dhismo ku dhow bartamaha magaalada ayaa la gubay, iyadoo dadka deegaanka ay sheegeen in dibadbaxayaashu ay sidoo kale tuureen bambooyin shidaal ah.

Dibadbaxyo kale ayaa ka dhacay magaalada Antrim oo qiyaastii 25 kiiloomitir dhanka galbeed kaga taalla Belfast.

Ra’iisul Wasaaraha Waqooyiga Ireland, Michelle O’Neill, ayaa cambaareysay rabshadaha, iyadoo ku tilmaantay falal fulaynimo ah. Waxay ku baaqday in la ilaaliyo nabadda isla markaana la joojiyo cunsuriyadda, cabsi gelinta iyo rabshadaha.

Kaaliyaha Taliyaha Booliiska Waqooyiga Ireland, Ryan Henderson, ayaa sheegay in dhacdadaasi ay abuurtay cabsi iyo caro bulshada dhexdeeda ah, balse wuxuu shacabka ugu baaqay inay is dejiyaan si loo ilaaliyo amniga bulshada.

Qoyska dhibbanaha ayaa sidoo kale soo saaray bayaan ay ku sheegeen in rabshadaha dhacay aysan ahayn wax la aqbali karo, isla markaana aysan doonayn in dhacdadan loo adeegsado kala qaybinta bulshada ama hurinta naceybka.

Muuqaallo laga duubay weerarka ayaa muujinayay dad rayid ah oo isku dayay inay ka hortagaan weeraryahanka ka hor inta aysan booliisku goobta soo gaarin. Saraakiisha ammaanka ayaa ku amaanay tallaabadaasi, iyagoo sheegay inay badbaadisay nolosha dhibbanaha.

Ra’iisul Wasaaraha Ingiriiska, Keir Starmer, ayaa ku tilmaamay weerarka mid argagax leh oo laga naxo, isagoo sheegay inuusan aqbali karin rabshadaha ka dhacaya waddooyinka dalka.

Dhanka kale, Madaxa Xuquuqda Aadanaha ee Qaramada Midoobay, Volker Turk, ayaa ku tilmaamay rabshadaha ka dhanka ah muhaajiriinta ee ka socda Waqooyiga Ireland kuwo naxdin leh, wuxuuna cambaareeyay hadallada naceybka iyo kicinta rabshadaha ee lagu faafinayo baraha bulshada.

Booliiska ayaa sheegay in weerarka aan loo aqoonsan fal argagixiso, inkastoo uu dhacay xilli ay sare u kaceen xiisadaha la xiriira socdaalka iyo magangelyo-doonka gudaha Boqortooyada Midowday.

Taliyaha Booliiska Waqooyiga Ireland, Jon Boutcher, ayaa sheegay in eedeysanaha uu dalka ku joogay fiiso shan sano ah oo la siiyay bishii Sebteembar 2023, isla markaana uusan h**e uga muuqan diiwaannada amniga qaranka.

Hoggaamiyeyaasha waaweyn ee xisbiyada siyaasadeed ee Waqooyiga Ireland ayaa si wadajir ah u cambaareeyay weerarka, iyagoo ku tilmaamay mid naxdin leh, waxayna bulshada ugu baaqeen inay ilaaliyaan deganaanshaha iyo wada noolaanshaha.

06/10/2026

Sarkaal ka tirsan dowladda Mareykanka ayaa habeenkii Talaadada sheegay in garsooraha Soomaaliyeed ee FIFA, Cumar Cabdulqaadir Cartan, loo diiday gelitaanka Mareykanka sababo la xiriira waxa uu ku tilmaamay “xiriir lala leeyahay xubno looga shakisan yahay inay ka tirsan yihiin ururro argagixiso.”

Sarkaalkan, oo codsaday inaan magaciisa la shaacin sababo la xiriira sharciyada ilaalinta xogta fiisooyinka, ayaa sheegay in go’aanka lagu diiday Cumar Cartan gelitaanka dalka uu salka ku hayo xog amni oo ay hayaan hay’adaha Mareykanka.

Hadalka sarkaalkan ayaa yimid kadib markii Andrew Giuliani, oo ah Agaasimaha Fulinta ee Guddiga FIFA ee Aqalka Cad, uu sheegay in Cartan loo diiday gelitaanka Mareykanka “sababo aad u culus,” balse uu ka gaabsaday inuu bixiyo faahfaahin dheeraad ah.

Hay’adda Kastamyada iyo Ilaalinta Xuduudaha Mareykanka (CBP) ayaa sheegtay in Cumar Cartan lagu joojiyay Garoonka Caalamiga ah ee Miami maalintii Sabtida, iyadoo sababta lagu sheegay “walaacyo la xiriira hubinta amniga.” Si kastaba ha ahaatee, hay’addu ma aysan bixin faahfaahin dheeraad ah.

Safaaradda Soomaaliya ee Kenya, oo ka shaqeysay fiisaha Cartan, ayaa xaqiijisay in garsooruhu uu helay fiisaha Mareykanka toddobaadkii h**e ka hor safarkiisa.

Wareysi uu siiyay wargeyska The New York Times, Cumar Cartan ayaa sheegay in saraakiisha xuduudaha Mareykanka ay ku wareysteen Garoonka Miami muddo 11 saacadood ah. Wuxuu sheegay in la weydiiyay sababta uu Mareykanka u yimid, siyaasadda Soomaaliya iyo kooxda Al-Shabaab.

Cartan ayaa sheegay inuu saraakiisha tusay dukumentiyo rasmi ah oo FIFA ah iyo sawirro muujinaya taariikhdiisa garsoornimo. Si kastaba, wareysiga kadib waxaa la dhigay qol lagu hayo dadka la baarayo, ka hor inta aan dib loogu celin diyaarad ku wajahneyd Istanbul, halkaas oo uu uga soo gudbay Mareykanka.

“Waxaan u maleynayaa inay dhibaatadu la xiriirto dalkayga,” ayuu Cartan u sheegay The New York Times. Wuxuu intaas ku daray inuu watay dhammaan dukumentiyadii saxda ahaa iyo fiisaha loo baahnaa, isla markaana aan loo sheegin sababta rasmiga ah ee loogu diiday gelitaanka dalka.

Cumar Cartan, oo sanadkii 2025 loo doortay garsooraha ugu wanaagsan Afrika, ayaa lagu waday inuu noqdo garsoorihii ugu horreeyay ee Soomaali ah ee dhex dhexaadiya ciyaaraha Koobka Adduunka kadib markii FIFA ay ku dartay liiska ugu dambeeya ee garsoorayaasha tartanka.

FIFA ayaa sheegtay inaanay wax door ah ku lahayn arrimaha socdaalka, isla markaana maamulka Mareykanka uu ku wargeliyay in xaaladda Cartan “aysan hadda wax isbeddel ah ku imaan doonin.”

06/10/2026

Garsooraha caanka ah ee Soomaaliyeed Omar Abdulkadir Artan ayaa dib ugu laabtay dalka uu ka yimid kadib markii laga diiday inuu galo Mareykanka, halkaas oo uu ka qeyb geli lahaa diyaar-garowga Koobka Adduunka ee FIFA 2026.

Omar Artan, oo lagu tilmaamo mid ka mid ah garsoorayaasha ugu sarreeya Afrika, ayaa si rasmi ah loogu xushay inuu ka garsooro Koobka Adduunka, balse waxaa laga celiyay garoonka diyaaradaha ee Miami kadib baaritaan ay sameeyeen hay’adaha socdaalka Mareykanka. Inkastoo uu watay fiiso iyo dukumentiyo sax ah, haddana waxaa lagu sheegay sababo la xiriira “baaritaanno amni” (vetting concerns), taas oo keentay in dib loogu celiyo dalka uu ka yimid.

FIFA ayaa xaqiijisay in Artan uusan ka qeyb gali doonin tartanka, iyadoo sidoo kale sheegtay in arrimaha socdaalka ay gacanta ku hayaan waddanka martigelinaya, halka Soomaaliya iyo xiriirka kubadda cagta ay muujiyeen niyad-jab ku saabsan go’aankaas.

Garsoorahan ayaa h**e u noqday garsoorihii ugu horreeyay ee Soomaaliyeed ee loo xusho Koobka Adduunka, taas oo ahayd guul taariikhi ah oo dalka Soomaaliya u soo hoyatay. Arrintan ayaa dhalisay dood weyn oo ku saabsan saameynta siyaasadda socdaalka iyo ciyaaraha caalamiga ah.

06/10/2026

Ra’iisul Wasaaraha gobolka British Columbia ee dalka Canada, David Eby, ayaa taageero u muujiyay garsooraha Soomaaliyeed Omar Abdulkadir Artan kadib markii loo diiday inuu galo dalka Mareykanka si uu uga qayb galo Koobka Adduunka ee FIFA 2026. Eby ayaa sheegay in Cumar Cartan lagu soo dhoweyn lahaa gobolka British Columbia, isla markaana uu jeclaan lahaa in loo oggolaado inuu ciyaaraha Koobka Adduunka ku dhexdhexaadiyo magaalada Vancouver.

Qoraal uu ku baahiyay barta X, David Eby ayaa sheegay in Cumar Cartan uu mudan yahay in la xuso lana maamuuso guulaha uu gaaray, isagoo xusay in garsooraha Soomaaliyeed uu ka gudbay caqabado badan si uu u gaaro heerka ugu sarreeya ee garsoorka kubadda cagta. Waxa uu si cad u yiri: “Aan ku martiqaadno inuu garsoore ka noqdo Vancouver.”

Cumar Cartan ayaa qorshuhu ahaa inuu noqdo garsoorihii ugu horreeyay ee Soomaali ah ee ka qaybgala Koobka Adduunka, balse waxaa laga celiyay garoonka diyaaradaha ee Miami kadib markii saraakiisha socdaalka Mareykanka ay sheegeen inay jiraan arrimo la xiriira baaritaanka amniga. FIFA ayaa xaqiijisay in uusan hadda ka qayb geli doonin tartanka maadaama garsoorayaasha Koobka Adduunka ay waajib ku tahay inay joogaan xarunta tababarka ee Mareykanka.

Taageerada uu muujiyay David Eby ayaa noqotay mid si weyn looga hadal hayo gudaha Canada iyo Soomaaliya, iyadoo dad badan ay u arkaan tallaabo muujinaysa garab istaag iyo qadarin loo hayo guulaha uu gaaray garsooraha Soomaaliyeed ee Cumar Cartan.

06/05/2026

Madaxweynihii h**e ee Soomaaliya, Sheekh Shariif Sheekh Axmed, ayaa la sheegay inuu dib ugu laabanayo hoygiisa ku yaalla aagga garoonka diyaaradaha Aadan Cadde, kaddib maalmo uu ku sugnaa deegaanka Mirinaayo ee degmada Cabdicasiis, xilli ay magaalada Muqdisho ka jireen xiisado siyaasadeed iyo xaalado amni oo kacsanaa.

Wararka laga helayo ilo kala duwan ayaa tilmaamaya in go’aankan uu yimid kaddib markii xaaladda amniga ee caasimadda ay muujisay deganaansho marka loo eego maalmihii la soo dhaafay. Magaalada Muqdisho ayaa dhowaan martigelisay dhaq-dhaqaaqyo ciidan iyo iska horimaadyo sababay walaac soo foodsaaray shacabka, iyadoo ay sare u kacday cabsida laga qabo in xiisaddu sii fido.

Sheekh Shariif ayaa kamid ah siyaasiyiinta mucaaradka ee sida weyn uga hadlay xaaladda siyaasadeed ee dalka, waxaana maalmihii dambe gurigiisa iyo goobaha uu ku sugnaa hareeyay feejignaan amni oo dheeraad ah. Dib ugu laabashadiisa hoygiisa ayaa loo arkaa tallaabo muujinaysa in xaaladdu ay soo hagaagayso, inkastoo weli ay jiraan walaacyo la xiriira mustaqbalka siyaasadeed iyo amniga caasimadda.

Dhanka kale, dadka reer Muqdisho ayaa si dhow ula socda isbeddellada socda, iyagoo rajeynaya in la helo xal siyaasadeed oo lagu dejiyo xiisadaha soo noqnoqday. Mas’uuliyiinta dowladda iyo hoggaamiyeyaasha mucaaradka ayaa lagu boorriyey inay wadahadal ku xalliyaan khilaafaadka jira si looga fogaado xaalado amni darro oo hor leh.

Ilo xog ogaal ah ayaa sidoo kale sheegaya in dhaq-dhaqaaqii ciidamada ee si weyn looga dareemayay qaybo kamid ah magaalada uu yaraaday saacadihii la soo dhaafay, taasoo sare u qaaday rajada laga qabo in Muqdisho ay dib ugu soo laabato nolol maalmeedkeedii caadiga ahaa.

06/04/2026