10/21/2026
නාමල්ගේ පෞද්ගලික ලේකම් සංජය සමරසිංහ ඇප මත මුදා හැරේ
පාර්ලිමේන්තු මන්ත්‍රී නාමල් රාජපක්ෂ මහතාගේ පෞද්ගලික ලේකම් සංජය සමරසිංහ මහතා අල්ලස් කොමිසම මගින් අත්අඩංගුවට ගෙන අධිකරණයට ඉදිරිපත් කිරීමෙන් අනතුරුව ඇප මත මුදා හැරීමට කොළඹ ප්‍රධාන මහේස්ත්‍රාත් අධිකරණය අද (20) නියෝග කළේය.
සැකකරු රුපියල් ලක්ෂ 10 බැගින් වූ ශරීර ඇප දෙකක් මත මුදාහැරුණු අතර, ඔහුට විදෙස් ගමන් තහනමක් ද පැනවීය.
අල්ලස් හෝ දූෂණ චෝදනා විමර්ශන කොමිෂන් සභාවට ලද තොරතුරකට අනුව, පසුගිය සිකුරාදා මධ්‍යම රාත්‍රී 12ට පමණය ගල්කිස්ස ටෙම්ප්ලර්ස් පාරේ පිහිටි සංජය සමරසිංහ මහතාගේ නිවසේ විශේෂ සෝදිසි මෙහෙයුමක් දියත් කෙරිණි. පැය 4කට ආසන්න කාලයක් සිදුකෙරුණු සෝදිසි මෙහෙයුමෙන් අනතුරුව නිවසේ තිබී සේප්පුවක් විමර්ශන නිලධාරින් භාරයට ගෙන තිබුණි. එහිදී සැකකරු පවසා තිබුණේ එහි ආරක්ෂිත මුර පදය තමන්ට අමතක වී ඇති බවයි.
පසුව එම නිෂ්පාදිත සමාගමේ තාක්ෂණ නිලධාරීන් ගෙන්වා සේප්පුව විවෘත කළ අවස්ථාවේදී එහි තිබී රුපියල් 1,805,000/- මුදල්, රුපියල් ලක්ෂ 08 ක් පමණ වටිනා "කාටියා" වර්ගයේ අත් ඔරලෝසුවක් සහ රන් ආලේපිත යැයි සැලකෙන පා සලඹ අටක් සොයා ගැනුණි. සොයාගත් මුදල්වලින් රුපියල් ලක්ෂ පහළොවක් තමන්ගේ බවත්, ඉතිරිය මව්පියන්ගේ බවත් සැකකරු පවසා තිබුණි.
සැකකරු මුලින් ලබාදුන් ප්‍රකාශය සහ පසුව ලබාදුන් ප්‍රකාශය අතර පරස්පරතා නිරීක්ෂණය වීම නිසා ඔහු ඊයේ (19) අත්අඩංගුවට ගෙන ඇත. අද අධිකරණයට ඉදිරිපත් කළ අවස්ථාවේදී අල්ලස් කොමිසම සැකකරු රක්ෂිත බන්ධනාගාරගත කරන ලෙස ඉල්ලා සිටියද, මහේස්ත්‍රාත්වරයා දෙපාර්ශ්වයේ කරුණු සලකා බැලීමෙන් පසු ඇප මත මුදා හැරීමට නියෝග කළේය.
නඩුව දෙසැම්බර් 18 වැනිදා යළි කැඳවීමට දින නියම කර ඇත.
