05/21/2026
Ururka Dawladaha Islaamka oo ka Kooban 57 Dal ayaa si adag ugu horyimid ficilada guraca iyo kala qaybinta ay yuhdu ka wado Soomaaliya taas oo baalmarsan sharciga caalamiga ah.
Af-Soomaali (Organisation of Islamic Cooperation OIC waxay cambaareyeen wararka ku saabsan furitaanka safaarad ay yeelanayso waxa loogu yeero “Somaliland” oo laga furayo Al-Qudus-ta la haysto
Jeddah, 20 May 2026
Xoghaynta Guud ee Ururka Iskaashiga Islaamka (OIC) ayaa muujisay walaac weyn iyo cambaareyn adag oo ku saabsan wararka sheegaya qorshaha waxa loogu yeero “Somaliland” ay ku doonayso inay ka furato “safaarad” magaalada Al-Qudus (Jerusalem) ee la haysto. Arrintan ayaa lagu tilmaamay mid si cad uga hor imaanaysa rabitaanka bulshada caalamka isla markaana jebinaysa mabaadi’da Axdiga Qaramada Midoobay iyo go’aannada khuseeya ee QM.
Xoghaynta Guud waxay sheegtay in tallaabadan sharci-darrada ahi ay qayb ka tahay dadaallada Israel ee quusta ah iyo kuwa aan sharciyeysneyn ee ay ku raadineyso aqoonsiyo been abuur ah oo ay ka hesho maamulo aan sharci ahaan loo aqoonsanayn caalamka — oo ay ku jirto waxa loogu yeero gobolka “Somaliland” — iyadoo ujeeddadu tahay in lagu xoojiyo sheegashada sharci-darrada ah ee ay ka leedahay magaalada la haysto ee Al-Qudus (Jerusalem), taas oo si cad uga hor imaanaysa sharciga caalamiga ah.
Xaaladdan gudaheeda, Xoghaynta Guud waxay xaqiijisay in Israel, oo ah awoodda gumeysiga, aysan wax madax-bannaani ah ku lahayn Bariga Al-Qudus (Jerusalem), oo ah caasimadda Dowladda Falastiin. Waxay sidoo kale sheegtay in tallaabo kasta oo lagu beddelayo xaaladda siyaasadeed, dadka, ama juqraafiyeed ee magaaladaasi ay yihiin waxba k**a jiraan marka loo eego sharciga caalamiga ah.
Xoghaynta Guud waxay markale ku celisay taageeradeeda buuxda iyo garab istaaggeeda Jamhuuriyadda Federaalka Soomaaliya, iyo taageerada aan leexleexadka lahayn ee ay u hayso madax-bannaanida qaran, midnimada dhuleed, iyo amniga gobolka ee Soomaaliya. Waxay ugu baaqday dhammaan dalalka caalamka inay cambaareeyaan oo ay ka hortagaan tallaabadan sharci-darrada ah, isla markaana ay diidaan isku day kasta oo lagu siinayo sharciyad caalami ah maamul gooni-u-goosad ah oo aan la aqoonsanayn, ayna ku qasbaan Israel inay u hoggaansanto go’aannada sharciyadda caalamiga ah.
