07/09/2026
G***s
Nuwe Vrystelling "COME SATURDAY" vir Gerhard Supra
Beskikbaar vanaf 18 September!
Embrace The Brand Media
Next Music
***snuus: GERHARD SUPRA VIER DIE NAWEEK MET NUWE ENKELSNIT “COME SATURDAY”
Vir Gerhard Supra is daar min dinge beter as die gevoel wanneer ’n lang, besige week uiteindelik tot ’n einde kom. Sy nuwe enkelsnit, “Come Saturday”, is ’n opgewekte country-lied wat dié gevoel vasvang – die verlange na ’n Saterdag vol ontspanning, goeie geselskap, vriende en familie, ’n vuur wat brand en iets kouds in die hand.
“Come Saturday” is deur Supra self geskryf en vervaardig en is geïnspireer deur ’n eenvoudige gesprek met vriende. Hulle het begin praat oor hoe hulle nie kan wag vir die naweek nie en dat die week nou maar moet verbygaan.
Die gedagte het by Supra vasgesteek en uiteindelik in ’n liedjie ontwikkel wat handel oor iets waarmee feitlik almal kan identifiseer: die opgewondenheid wanneer die naweek uiteindelik aanbreek.
“Ons kan nie wag vir die naweek nie. Ná ’n besige week is dit so lekker om net saam met jou mense tyd te spandeer en te ontspan,” vertel Supra. Vir hom gaan die liedjie oor daardie eenvoudige oomblikke wat ’n mens se lewe besonders maak – of dit nou rondom ’n braai saam met vriende is, langs die viswater of om ’n vuur met goeie geselskap en ’n koue ietsie in die hand.
Dit is juis hierdie universele tema wat volgens Supra die liedjie se grootste aantrekkingskrag is. “Dit is ’n lekker saamsing-liedjie en ’n tema waarmee mense kan vereenselwig. Hoeveel keer het iemand al gesê: ‘Ek kan nie wag vir die naweek nie!’”
Met “Come Saturday” lewer Supra sy derde liedjie van die jaar, in samewerking met Embrace the Brand en Next Music. Hoewel hy al ’n hele aantal enkelsnitte op sy kerfstok het, beskou hy elke vrystelling en optrede as iets besonders. Vir hom lê sukses nie net in groot prestasies nie, maar ook in die mense wat ná ’n optrede kom groet, die boodskappe van ondersteuning wat hy op sosiale media ontvang en die geleentheid om sy musiek met ander te deel.
Supra se liefde vir musiek het reeds in sy kinderjare begin. Hy het grootgeword met die musiek van kunstenaars soos Neil Diamond, Don Williams en Bles Bridges. Een van sy kosbaarste herinneringe uit sy jonger dae is toe hy Bles Bridges ontmoet het en deur die bekende sanger uit die skare geroep is om sy ma se plaat vir haar te laat teken. Dit is ’n oomblik wat Supra steeds met hom saamdra.
“Ek kan my nie my lewe indink sonder musiek nie. Dit is net deel van my. Daar is altyd ’n storie wat broei en besig is om ’n liedjie te word, wat ’n wysie moet kry.”
Ná ’n lang breuk van die musiekbedryf is Supra die afgelope paar jaar weer voltyds met musiek besig. Hy het veral die afgelope drie jaar toere vanuit die Kaap onderneem en is besig om sy plek in die Suid-Afrikaanse musiekbedryf verder uit te bou.
Sy inspirasie kom hoofsaaklik uit mense en hul stories – die dinge wat ander mense beleef, sowel as sy eie ervarings. Dit is ook waarom sy musiek oor verskillende genres heen beweeg. Hoewel country ’n belangrike invloed op sy huidige styl is, geniet hy ook rock, pop en Afrikaanse musiek. Kunstenaars soos Bruce Springsteen, Bryan Adams en Snotkop het ’n invloed op sy musieksmaak gehad, terwyl hy terselfdertyd hard daaraan werk om sy eie unieke klank te ontwikkel.
Supra beskryf sy stem en styl as “warm en eg Suid-Afrikaans, met ’n country-klank gemeng met moderne sokkie-energie”. Hierdie kombinasie is duidelik in sy benadering tot musiek: liedjies moet toeganklik wees, emosie hê en mense die geleentheid gee om saam te sing.
Onder Suid-Afrikaanse kunstenaars wat hom tans inspireer, tel Snotkop, Appel en Cordelia. Volgens Supra is daar soveel uitsonderlike talent in Suid-Afrika dat dit moeilik is om net een kunstenaar uit te sonder. Hy sou graag in die toekoms met van hierdie kunstenaars wou saamwerk en terselfdertyd voortgaan om sy eie musikale identiteit te verfyn.
Buite musiek het Supra ’n verskeidenheid belangstellings. Hy speel graag darts, skets wanneer hy die geleentheid kry en is besig om tienerseuns groot te maak – iets wat hy met ’n glimlag beskryf as “nogal ’n storie”. Hy probeer ook om tydens sy reise foto’s en video’s te neem en dit te deel om die mooi van Suid-Afrika aan ander te wys.
Onlangs het hy weer tyd begin maak vir sy liefde vir skets en skilder, iets wat hy lanklaas gedoen het. Hy eksperimenteer ook met nuwe musiek en verskillende style, terwyl hy steeds nuwe country-liedjies skryf. Vir die toekoms het hy groot planne: meer musiek, nuwe optredes op plekke waar hy nog nie was nie en moontlik selfs ’n buitelandse avontuur.
Een van sy groot onvervulde drome is om ’n vlieënier te word. “Ek is mal oor dit en wou dit nog altyd doen,” sê hy. Intussen fokus hy egter daarop om sy musikale droom verder uit te bou en soveel moontlik nuwe ervarings in sy lewe op te doen.
Die musiekbedryf het Supra veral geleer om in homself te glo en nie moed op te gee nie. Een van sy grootste persoonlike uitdagings was om sy skaamheid te oorkom. Hoewel hy baie lief is vir mense, verg dit steeds moed om voor ’n kamera te staan en video-opnames te maak. Hy erken dat dit steeds talle probeerslae verg, maar hy hou aan om homself buite sy gemaksone te druk.
Sy benadering tot musiek word treffend opgesom in sy gunstelingaanhaling: “In elke liedjie is daar ’n stukkie waarheid en ’n stukkie hart.” Dit is ook die filosofie wat hy in sy eie musiek probeer uitleef – om liedjies te skryf wat eg is, mense se harte raak en ’n positiewe verskil kan maak.
Vir Supra gaan sy musiek uiteindelik oor veel meer as net optredes en vrystellings.
Hy wil mense inspireer, mense bymekaarbring en liedjies skep wat almal kan saamsing. Sy grootste doelwit is eenvoudig: om mense se harte te raak en vir hulle musiek te gee waarmee hulle hulself kan vereenselwig.
“Come Saturday” is dus ’n musikale uitnodiging om die werksweek agter te laat en die lewe te geniet. Met sy country-klank, moderne sokkie-energie en herkenbare boodskap is dit die soort liedjie wat jou laat uitsien na daardie oomblik wanneer die week uiteindelik verby is.
Of dit nou om die braai, langs die water of om die vuur saam met vriende en familie is, Supra se boodskap is een wat baie Suid-Afrikaners sal verstaan: Come Saturday, come – ons het lank genoeg gewag.
Kry die liedjie hier: https://open.spotify.com/artist/5X0xyiVN7qe5zmXUYFKES6
Embrace The Brand Media
