12/09/2025
दुलोमा लुकेर बस्दै टुच्च टुच्च फेसबुकमा पोस्ट गर्ने विभिन्न पार्टी र सङ्गठनमा लाग्नुभएका दिग्गज, साथीभाइ र युवाहरू; तपाईंहरूले जनताको माग, जनताको आशा, जनताको म्यान्डेट त बुझिहाल्नुभयो र त्यसको ज्वलन्त उदाहरण जेन-जीको आन्दोलनले स्पष्ट पारिसकेको छ।
अब पनि किन तपाईंहरू पार्टी र सङ्गठन भनेर आफ्ना भ्रातृ सङ्गठनलाई सडकमा उतार्दै हुनुहुन्छ? 'संविधान बचाऊँ' भन्ने नारा किन लगाउन जरुरी छ, अहिलेको विद्यमान संविधान पनि त हामीले नै चुनेर पठाएका तपाईंहरूले नै बनाएर पास गर्नुभएको हो र यसले सफलतापूर्वक काम गर्न नसकेपछि किन अब संविधान संशोधन गरेर नयाँ परिष्कृत संविधानलाई आत्मसात् नगर्ने?
यदि दुलोमा लुकेर अझै पनि देश र जनताको माया छ भनेर खोक्रा भाषण गर्नुहुन्छ र पार्टी सङ्गठन छाड्न सकिन्न भन्नुहुन्छ भने तपाईंहरू अझै पनि देश र जनताप्रति उत्तरदायी हुनुहुन्न। गलत भएको छ, गलत गरिएको छ भन्ने लाग्छ भने किन अब आउने परिष्कृत संविधानको दायरामा रहेर छानबिनमा आएर आफूलाई चोख्याउन सक्नुहुन्न? आजको दिनसम्म देश र जनताको हितमा काम गरेको भए खुल्ला आकाशमा, आन्दोलनरत साथीहरूका बीचमा आएर आफ्नो देशप्रेमी भावना व्यक्त गर्न सक्नुहुन्थ्यो होला तर विडम्बना दुलोमा लुकेर पोस्ट गर्नुपरेको छ।
अझै पनि ढिला भएको छैन, पार्टी सङ्गठन छाडिदिनुहोस् र खुल्ला मैदानमा स्वतन्त्र नेपाली जसले देशको माया गर्छ, देशको सार्वभौमिकता रक्षा गर्ने आँट गर्छ, त्यस्तो विचार लिएर किन आउनुहुन्न र जनमानसको इच्छा र भरोसामा अगाडि बढ्न सक्नुभएको छैन? अनुरोध छ सबै जना डुलोप्रेमी पार्टी र सङ्गठनका साथीहरूलाई, निजी र पार्टी स्वार्थ छाडेर सडकमा आउनुहोस् र आन्दोलनरत जेन-जी समूहसँग हातेमालो गरेर जेन-जीहरूको माग र एजेन्डामा साथ दिनुहोस्।
